त्रिशुलीमा जीप खस्यो, सशस्त्र प्रहरीको गोताखोरले खोजी गर्दै
चितवन — पृथ्वी राजमार्ग अन्तर्गत धादिङ जिल्लाको सिमानामा पर्ने मौवाखोला बाँदरेमोडबाट बिहीबार बिहान एउटा जीप त्रिशुली नदीमा खसेर बेपत्ता भएको छ । गाडीको कुनै पनि भाग देखिएको छैन । स्थानीय सुनमाया चेपाङले एम्बुलेन्सजस्तो देखिने सानो खाले गाडी नदीमा खसेको जानकारी गराइन् । सोही जानकारीको आधारमा प्रहरीको टोली गाडीको खोजीमा जुटेको छ ।
चितवन कुरिनटारमा रहेको सशस्त्र प्रहरीको तालिम शिक्षालयका प्रमुख रहेका सशस्त्र प्रहरीका वरिष्ठ उपरीक्षक (एसएसपी) कालिदास धौबजीले खोजीमा गोताखोर परिचालन भएको बताए । ‘स्थानीयले बताएको विवरण अनुसार गाडी खसेको पक्का भएको छ । स्कारपियोजस्तो देखिने सानो गाडी नदीमा खसेको हुनुपर्छ । बिहान त्यस्तै साढे ६ बजेको आसपासमा घटना भएको हुनुपर्छ । अरु विवरण खुलेको छैन’ एसएसपी धौबजीले भने ।
कुरिनटारको विपद् व्यवस्थापन टोली गोताखोरसहित नदीमा गएर जीपको खोजी गरी रहेको उनले बताए । नदीमा खसेको जीप कहाँदेखि कता जाँदै थियो वा त्यसमा के कति मान्छे थिए भन्ने जस्ता विवरण पत्ता लाग्न सकेको छैन ।
प्रकाशित : असार १८, २०७७ १०:५५