सिन्धुलीको दुधौलीमा सर्पले डस्दा युवकको मृत्यु- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

सिन्धुलीको दुधौलीमा सर्पले डस्दा युवकको मृत्यु

राजकुमार कार्की

सिन्धुली — विषालु सर्पले डसेर सिन्धुलीको दुधौली नगरपालिकामा एक युवकको मृत्यु भएको छ । दुधौली नगरपालिका ५ सिर्थौलीका २१ वर्षीय शिवाज गोराइतको विषालु सर्पले टोक्दा मृत्यु भएको हो ।


स्थानीय शिक्षक दाताराम गौतमका अनुसार विषालु सर्पले राति सुतेको ठाउँमा मृतकको दाहिने हातमा टोकेको थियो । प्राथमिक स्वास्थ्य केन्द्रमा सर्पदंश उपचार केन्द्र भएपनि चिकित्सक नहुँदा ज्यान गएको परिवारजनले आरोप लगाएका छन् । सर्पदंश उपचार केन्द्र दुधौलीमा लैजानका लागि साधन नपाएकाले अकालमै ज्यान गुमाएका भन्दै स्थानीय र परिवारजनले विरोध गरेपछि सिर्थौलीमै चिकित्सक राख्ने सहमती भएको वडाध्यक्ष चन्द्रकिशोर थारुले बताए ।

मृतकका बुबा लक्ष्मण गोराइतले सिर्थौलीको प्राथमिक स्वास्थ्य केन्द्रमा करिब एकघण्टा डाक्टरको पर्खाइमा बसेको बिरामीलाई सामान्य पट्टी बाँधिदिने कामसमेत नगरिदिएकाले छोराको अकालमै ज्यान गएको गुनासो गरे । गर्मी बढेसँगै कमलाखोंच क्षेत्रमा सर्पदंशका घटना बढ्ने गरेका छन् । कमलाखोंच क्षेत्रमा विषालु गोमन, करेत, धामन लगायतका सर्पहरु बढी मात्रामा पाइन्छन् ।

प्रकाशित : असार ६, २०७७ १४:२४
प्रतिक्रिया
पठाउनुहोस्

सिन्धुलीमा पनि दीप प्रज्ज्वलन

राजकुमार कार्की

सिन्धुली — निशान छापमा नयाँ नक्सा राखिएको विधेयक संघीय संसद्को प्रतिनिधिसभाबाट सर्वसम्मत पारित भएको खुसियालीमा सिन्धुलीमा शनिबार साँझ दीप प्रज्ज्वलन गरिएको छ । 

सर्वसाधारण, जनिप्रतिनिधिलगायतको उपस्थितिमा दीप प्रज्ज्वलन गरी खुसियाली मनाइएको हो । लोकतान्त्रिक चोकमा कालापानी, लिपुलेक र लिम्पियाधुरा समेटिएको नेपालको नक्सा बनाएर दीप प्रज्ज्वलन गरिएको थियो ।

निशान छापमा आफ्नो भूमि समेटिएकाले हर्षविभोर भएको सुनकोसी गाउँपालिकाकी अध्यक्ष दीपा बोहोरा दाहालले बताइन् । स्थानीयहरुले खुसियालीमा घरघरमा दीपावलीसमेत गरेका छन् । ‘हाम्रो सान, हाम्रो स्वाभिमान, हाम्रो देश, हाम्रो पहिचान’ यो नै मूलमन्त्र भएकाले स्थानीयले खुसियाली घरघरमा दिपावली गरेको कमलामाइ नगरपालिका ६ का कृष्णहरि घिमिरेले प्रतिक्रिया व्यक्त गरे ।

प्रकाशित : जेष्ठ ३१, २०७७ २०:३२
पूरा पढ्नुहोस्
प्रतिक्रिया
पठाउनुहोस्
×