सिन्धुली अस्पतालमा उपकरण खरिदमा अनियमितताको आरोप

राजकुमार कार्की

सिन्धुली — सिन्धुली अस्पतालमा भएको उपकरण खरिदमा अनियमितता गरेको भन्दै अख्तियार दुरुपयोग अनुसन्धान आयोगमा उजुरी दर्ता भएको छ ।

उपकरण खरिदको बोलपत्रको सूचनाका आधारमा छनौट भएका पाँच सप्लायर्समध्ये कमदर रेटका पहिलो, दोस्रो र तेस्रोलाई पन्छाएर प्रलोभनमा परि चौथोलाई छनौट गरिएकाले लाखौं रकम भ्रष्टाचार भएको भन्दै अख्तियार कार्यालय टंगाल काठमाडौंमा उजुरी परेको हो । लकडाउनको मौका छोपी आपूर्तिकर्ताहरुलाइ थाहै नदिई प्राविधिक मूल्यांकनको नाममा प्रलोभनमा परि बढी दररेटमा उपकरण आपूर्ति गर्ने कम्पनी छनौट भएको भन्दै भन्दै नारायण क्षत्रीले अख्तियारमा उजुरी गरेका हुन् ।

अस्पताल विकास समितिका अध्यक्ष प्रल्लाद पोखरेल, मेडिकल सुपरिटेन्डेन्ट डाक्टर लक्ष्मण खड्का र बायोमेडिकल इन्जिनियर राजन डाँगीले बोलपत्रको सूचना बमोजिम कमदर रेटको सप्लायर्सलाई पन्छाएर प्रलोभनमा परि बढि दररेटेको छनौट गरेको भन्दै उजुरीमा कारबाहीको माग गरिएको छ । सिन्धुली अस्पतालले गत फागुन १ गते ७ दिने सूचना प्रकाशित गरी उपकरण खरिदको बोलपत्र आह्वान गरेको थियो ।

कम दररेटमा उपकरण सप्लाइ गर्ने लुम्बिनी हेल्थ केयरलाई पन्छाएर बढी दररेटको मेडेक्टा्रेनिक्स प्रालिलाई छनौट गरिएको उजुरीमा उल्लेख गरिएको छ । लुम्बिनीले २४ लाख ७३ हजार ५ सय ७० र मेडिटा्रेनिक्स नेपाल प्रालिले ३१ लाख ९८ हजारमा उपकरण आपूर्तिको प्रस्ताव गरेका थिए । यी दुई कम्पनीको फरक ७ लाख २४ हजार ४ सय ३० छ । उपकरण आपूर्तिका लागि ७ वटा कम्पनीले प्रस्ताव पेस गरेकोमा पाँच वटा कम्पनी छनौट भएका थिए । दुवै कम्पनीले दक्षिण कोरिया र कोरियाका कम्पनीको ब्राण्डअनुसारको उपकरण सप्लाई गर्ने प्रस्तावमा उल्लेख छ ।

अस्पताललाई चाहिने उपकरणको सूची आफूहरुले दिएको र क्याटलग विधिबाट बायोमेडिकल इन्जिनियरले सबै खरिद प्रक्रिया कानुनसम्मत गरेको सिन्धुली अस्पतालका अध्यक्ष प्रल्लाद पोखरेलले बताए । वाग्मती प्रदेशको सामाजिक विकास मन्त्रालयले उपकरण खरिदका लागि रकम पठाएको थियो ।


प्रकाशित : जेष्ठ २२, २०७७ ११:०१
प्रतिक्रिया
पठाउनुहोस्

चक्रवात ‘निसर्ग’ को प्रभाव : देशभर मौसम बदलीसँगै वर्षाको सम्भावना

रासस

काठमाडौँ — चक्रवात ‘निसर्ग’ को प्रभावले आगामी तीन दिन देशभर बदलीसँगै वर्षाको सम्भावना देखिएको छ । अरब सागरको दक्षिणपूर्वी भूभागमा बुधबारदेखि विकसित भएको ‘निसर्ग’ चक्रवातको अप्रत्यक्ष प्रभाव नेपालमा पनि पर्ने मौसमविद् शान्ति कँडेलले बताइन् ।

उक्त चक्रवातको असर नेपालमा शुक्रबार र शनिबार बढी पर्ने बताइएको छ । 'नेपालको अधिकांश स्थानमा मध्यमदेखि भारी वर्षा गराउनुको साथै उच्च पहाडी तथा हिमाली भूभागमा यसले हिमपात गराउने सम्भावना छ,' मौसमविद् कँडेलले भनिन् ।

भारतमा बुधबारदेखि प्रवेश गरेको निसर्ग चक्रवातको प्रभाव अम्पुनको तुलनामा नेपालमा बढी देखिने मौसमविद्को अनुमान छ । निसर्ग चक्रवात हाल भारतको अलिवाग नजिकै मुम्बईबाट ७५ किमी र पुणेबाट ६५ किमी टाढा रहेको छ । त्यसपछि यो चक्रवात क्रमशः कमजोर बन्दै उत्तरपूर्वी दिशातर्फ मोडिने सम्भावना रहेको छ । यस चक्रवातको अप्रत्यक्ष प्रभाव नेपालमा परिसकेको छ । देशको खासगरी मध्य र पूर्वी क्षेत्रका अधिकांश स्थानमा बदली रही केही ठाउँमा हल्लका वा मध्यम वर्षा भएको छ ।

दिउँसो सुदूरपश्चिम प्रदेश कर्णाली तथा गण्डकी प्रदेश र प्रदेश नम्बर ५ मा पूर्ण बदली रही केही स्थानमा मेघगर्जनसहित वर्षाको सम्भावना रहेको मौसम पूर्वानुमान महाशाखाले जनाएको छ । शुक्रबार सुदूरपश्चिम प्रदेश, कर्णाली तथा गण्डकी प्रदेश र प्रदेश नम्बर ५ का धेरै स्थानमा र बाँकी प्रदेशका केही स्थानमा वर्षाको सम्भावना छ । शनिबार प्रदेश नम्बर १, प्रदेश नम्बर २, वाग्मती प्रदेशका केही र अन्य प्रदेशका एक-दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको औँल्याएको छ ।

प्रकाशित : जेष्ठ २२, २०७७ १०:४६
पूरा पढ्नुहोस्
प्रतिक्रिया
पठाउनुहोस्
×