राहत वितरणमा ठगी : चामल बोरामा ३ केजी कम

लकडाउनमा मजदुरका लागि वितरण गरिएको चामलमा घोटाला भएको भन्दै ६ राजनीतिक दलले छानबिनको माग गरेका छन् ।
राजकुमार कार्की

सिन्धुली — कमलामाई नगरपालिका-१४ का वडाध्यक्ष जितलाल अधिकारी दनुवारले राहत वितरणका लागि वडामा आएको ३ सय २० बोरा चामलसहितको प्याकेज बुझे । चामलको बोरा उचालेपछि उनलाई शंका लाग्यो ।

नजिकै रहेको पसलमा बोरा तौलिए । २० किलो हुनुपर्नेमा १८ किलोमात्र भयो । एउटा बोरा त्यस्तो भएको हो कि भनेर १० बोरा पालैपालो तौलिए तर कुनै बोरा पनि पूरा तौलका थिएनन् ।

कम तौलका चामल पाइएपछि उनले वडा कार्यालयमै राहत प्याकेज थन्क्याएर छानबिनको माग गरेका छन् । वडा १ मा पनि चामलको १७ किलोको मात्र पाइएको छ ।

३ जना वा त्योभन्दा बढी परिवार संख्या भएकालाई २० किलो चामलसहितको राहत प्याकेज वितरण गर्नुपर्नेमा तौल कम भएपछि आफूले नगरप्रमुख खड्गबहादुर खत्रीलाई जानकारी गराएको वडा नं १ का अध्यक्ष महेश्वर खतिवडाले बताए ।

व्यापारी र कर्मचारीहरु मिलेर राहतमा घोटाला गरिएको उनको आरोप छ । वडा नं १४ का अध्यक्ष दनुवारले छानबिन भएर दोषीलाई कारबाही नभएसम्म वितरण नगर्ने बताए । 'एक बोरामा नै ३ किलो कम छ,' उनले भने, 'जानीजानी विपन्न मजदुरलाई ठगी गर्नेलाई कठघरामा नउभ्याई हुन्न ।'

लकडाउनका बेला विपन्न तथा मजदुरका लागि वितरण गरिएको राहतको चामलमा घोटाला भएको भन्दै तत्काल छानबिन गर्न ६ राजनीतिक दलले माग गरेका छन् । विपक्षी कांग्रेस नेतृत्वमा जनता समाजवादी, राप्रपा, देशभक्त गणतान्त्रिक मोर्चा, क्रान्तिकारी माओवादी र राष्ट्रिय जनमोर्चाले सोमबार प्रमुख जिल्ला अधिकारीको ध्यानाकर्षण गराएका छन् ।

राहत वितरणमा भएको घप्लाबाजी र कालोबजारी नियन्त्रणका लागि विपक्षी दलले लकडाउनको अवधिमा प्रमुख जिल्ला अधिकारीको ध्यानाकर्षण गराएको यो दोस्रोपटक हो । १७ बुँदे ध्यानाकर्षणपत्रमा कालोबजारी नियन्त्रण, जिल्ला दररेटको नियमन, बढ्दो सवारीसाधन दुरुपयोग नियन्त्रण, पीसीआर परीक्षणको जिल्लामै व्यवस्था, आइसोलेसन कक्ष विस्तार, स्वास्थ्यकर्मी र सुरक्षाकर्मीलाई पीपीईको व्यवस्था, बजारका सबै पसल बिहान २ घण्टा लागि खोल्ने व्यवस्थालगायत माग गरिएको छ ।

'कतै तौल कम छ, कतै एउटै चामल बोरामै २ सयको मूल्य फरक परेको छ,' कांग्रेस सभापति उज्ज्वल बरालले भने, ‘यस्तो महामारीमा समेत लुट मच्चाएको कसरी टुलुटुलु हेरेर बस्नु ?’ कमलामाईले खरिद गरेको सोना मन्सुली २० किलोको प्रतिबोरा एक हजार ३ सय ६० मूल्य छ भने सोही चामल उत्ति नै परिमाणको सुनकोसी गाउँपालिकामा एक ५ सय ६० राखिएको छ ।

ध्यानाकर्षणपत्र बुझ्दै प्रजिअ योगेन्द्रप्रसाद पाण्डेले राहत वितरणका लागि कम तौल भएको चामलको बोरा तत्काल नियन्त्रणमा लिएर जाँच गर्ने र अन्य माग सक्ने जति पूरा गर्ने प्रतिबद्धता प्रकट गरे ।

प्रकाशित : जेष्ठ १९, २०७७ २०:४८
प्रतिक्रिया
पठाउनुहोस्

३५ हजारको टिकट १ लाखमा बिक्री, नेवानिका ३ जहाजमा ५ सय ८७ नेपाली सोमबार राति हङकङ उडे

लकडाउन सुरु भएको ७७ दिनयता हङकङका लागि भएको यो पहिलो उडान हो ।
सुरज कुँवर

काठमाडौँ — आफन्त भेट्न र पुरानो थलो आएर लकडाउनका कारण अलपत्र हङकङ आईडीवाहक नेपालीले फर्कनका लागि टिकटमा दोब्बरभन्दा बढी तिर्नुपरेको छ । लकडाउनले जान नपाएर छटपटिएका १ हजार ४ सय जनामध्ये सोमबार राति ५ सय ८७ जना फर्किएका छन् । नेपाल वायुसेवा निगमका तीनवटा जहाजमा काठमाडौंबाट हङकङका लागि उडेका अधिकांश यात्रुबाट टिकट बिक्रेताले निर्धारित भाडाभन्दा दोब्बर असुलेका छन् ।

छोराछोरीको स्कुलको पठनपाठनको समय भेटाउन, भिसाको म्याद सकिनबाट जोगिन, अस्पतालको नियमित चेकजाँच नछुटाउन एकतर्फी ३५ हजार रुपैयाँमा बिक्री हुने काठमाडौं हङकङको रुटमा ८५ हजारदेखि १ लाख रुपैयाँ तिरेर उनीहरू फर्कनुपरेको हङकङस्थित गैरआवासीय नेपाली संघकी अध्यक्ष टीका गुरुङले बताइन् ।

त्रिभुवन अन्तर्राष्ट्रिय विमानस्थलका महाप्रबन्धक देवेन्द्र केसीका अनुसार निगमका चार्टर टुंगो लागेपछि दुईटा न्यारोबडी र एउटा वाइडबडी गरी तीनवटा विमानको उडान तालिका एक–एक घण्टाको अन्तरमा सोमबार राति साढे ८ देखि साढे १० बजे समय दिइएको हो । तीनवटै जहाजमा सिट संख्याअनुसार पूरा यात्रु थिए । स्रोतका अनुसार तीन चार्टर उडानमध्ये हङकङको सनराइज ट्राभलले एउटा वाइडबडी र काठमाडौंको हारभेस्ट मुन ट्राभल एजेन्सीले दुइटा न्यारोबडी विमान चार्टर गरेको हो ।

दुइटा न्यारोबडीमा १ सय ५५ का दरले ३ सय १० र एउटा वाइडबडीमा २ सय ७३ यात्रु फर्किएका छन् । यात्रुमा २१ महिनामुनिका ५ शिशु पनि छन । एनआरएनए अध्यक्ष गुरुङले चैतअघि नेपाल आएका विद्यार्थी, कामदारलगायत हङकङको भिसा तथा आईडी भएका नेपाली फर्किएको बताइन् । सोमबार हङकङ फर्किन यात्रुहरू विहानै ८ बजे विमानस्थलमा पुगेका थिए । यसरी आउनेमा काठमाडौं, ललितपुरबाहेक झापा, धरान, सुनसरी, चितवन, भैरहवा, पोखरा, तनहुँ, म्याग्दीलगायतबाट गाडी रिजर्भ गरेर आइपुगेका थिए ।

‘१४ सय चानचुन नेपालमा रहेको देखियो । यीमध्ये सोमबार करिब ६ सय जना फर्किने कार्यक्रम हो,’ पोखरा मूलघर भएकी गुरुङले भनिन्, ‘बाँकी बिहीबार र शुक्रबार निगमकै चारवटा न्यारोबडी जहाजमा फर्कने कार्यक्रम छ ।’ अध्यक्ष गुरुङले एकतर्फी ३५ हजारमा बिक्री हुने टिकट एजेन्टहरुबाट तेब्बर महँगोमा किन्नुपरेको बताउँदै नेपाल सरकार र पर्यटन मन्त्रालयले कुनै नियमन नै नगरेको गुनासो पोखिन् । ‘वाइडबडीमा जानेले १ लाख र न्यारोबडीमा जानेले ८५ हजारमा टिकट किनेका छन्,’ अध्यक्ष गुरुङले भनिन्, ‘कतिपय कोरोनाको डरले, कतिपयका बच्चाहरुको स्कुल बिदा सकिसक्यो, कतिपयको अस्पतालमा नियमित चेकजाँच छुटेकाले फर्किनुपर्ने बाध्यता आइलाग्यो ।’

यसअघि हङकङ फर्किन चाहने यी नेपालीलाई हिमालय एयरलायन्सले जेठ ९ गते ६५ हजारमा लैजाने सहमति भएको थियो । तर, हिमालयलाई हङकङको अनुमति नपाएपछि यात्रुहरुले निगमको जहाज छनोट गर्नुपरेको थियो । निगमले टिकट बिक्री गर्ने एजेन्टलाई न्यारोबडी प्रतिघन्टा ८ हजार ७ सय डलर र वाइडबडी १८ हजार डलर भाडा तिर्ने शर्तमा चार्टर गराएको हो ।

टिकट बिक्री गर्ने एजेन्टले यात्रुलाई महँगो टिकट बिक्री गरेर आम्दानी गर्नेबाहेक निगमबाट कुल कारोबारमा ५ प्रतिशत कमिशन पनि पाउँछन् । यो उडानमा भने वाइडबडीको टिकट बिक्रि गर्ने एजेन्टलाई कमिशन छैन ।

लकडाउन सुरु भएको ७७ दिनयता हङकङका लागि भएको यो पहिलो उडान हो ।


प्रकाशित : जेष्ठ १९, २०७७ २०:२५
पूरा पढ्नुहोस्
प्रतिक्रिया
पठाउनुहोस्
×