विद्यार्थीलाई नयाँ पुस्तकसँगै 'लकडाउन गृहकार्य'
सिन्धुली — कमलामाई नगरपालिका-१३ को प्रभात मावि रानीवासले कक्षा १ देखि ५ सम्मका विद्यार्थीलाई पाठ्यपुस्तक वितरण गरेको साता नबित्दै दुई साताका लागि गृहकार्य थमाइदिएको छ । विद्यालयका प्रधानाध्यापक अरुणकुमार थिङका अनुसार विद्यार्थीलाई विषयगत शिक्षकले १५ दिनका लागि गृहकार्य दिएका छन् ।
'सबै शिक्षकको बैठक राखेर सामाजिक दुरी कायम गर्दै टोलटोलमा पुगेर पहिलो चरणमा ‘लकडाउन होमवर्क’को अभ्यास गरिएको छ,’ उनले भने, 'विद्यालयले होमवर्कका लागि स्टेसनरीको समेत व्यवस्था गरेको छ ।'
'हामी तपाईंको टोलटोलमा आउनेछौं, विद्यालय आउनु पर्दैन, अतिरिक्त शुल्क लाग्दैन' भनेर विद्यालयले सूचना जारी गरेको थियो । ५ कक्षासम्मका ८५ जना विद्यार्थीका लागि होमवर्क प्याकेजमा मास्क पनि दिइएको छ । केही दिन नयाँ किताब हेरेका विद्यार्थीहरु जिज्ञासु भई प्रश्न गर्ने बेला भयो भनेर टोलटोलमा पुगेको सहायक प्रधानाध्यापक मीनप्रसाद बरालले बताए । ‘अभिभावक र विद्यार्थीको पढाइको चाहना देखेर हामीमा जाँगर पलाएको छ । पाठ्यपुस्तक मात्र वितरण गरेर बस्ने हो भने विद्यार्थीको च्यात्ने कामभन्दा केही नहुने ठानेर होमवर्कको विकास गरेका हौं,' उनले थपे ।
शिक्षकमा मात्र होइन विद्यार्थीहरु पनि नयाँ किताब लिएर होमवर्कको जिम्मेवारी पाएपछि दंग छन् । कक्षा ४ बाट प्रथम भई ५ मा पुगेकी छात्रा क्रिश्चला कार्कीले नयाँ किताबसँगै होमवर्क समेत पाएपछि पढ्न रहर लागेको बताइन् । ‘विद्यालयमा गएर पढ्न नपाए पनि सर र मिस टोलमै आएपछि खुसी लागेको छ,' उनले भनिन्, 'नजानेको सोध्न पनि पाइयो ।’
अभिभावक मोहनबहादुर कार्की टोलमा शिक्षक-शिक्षिका आएर होमवर्क दिँदा नानीबाबुहरु खुसी भएको बताए । कोरोना माहमारीले विद्यालय खुल्ने/नखुल्ने चिन्ता भइरहेकै बेला विद्यालयको यो अभियानले अभिभावकको टाउको हलुंगो भएको उनको भनाइ छ ।
होमवर्क मात्र होइन, टोलटोलमा पुगेका शिक्षकहरुले लकडाउन हुनका कारण र कोरोना भाइरसका विषयमा विद्यार्थीलाई बुझाउने प्रयास गरेका थिए । विद्यालयबाट समुदायमा कोरोना संक्रमण नफैलियोस् भनेर विद्यालय बन्द भए पनि पढाइ बन्द नभएकाले होमवर्क दिने, नबुझेको विषयमा अभिभावकमार्फत शिक्षकलाई प्रश्न गर्ने र उत्तर मौखिक वा लिखित लिन सुझाइएको प्रअ थिङले बताए । प्रभात माविले अंग्रेजी माध्ययमा पढाइ थालेपछि स्थानीयस्तरमा खोलेको बोर्डिङसमेत तीन वर्षअघि बन्द भइसकेको छ ।
पहिलो चरणमा कक्षा ५ सम्मका लागि गरिएको प्रयासबाट अभिभावक र विद्यार्थीहरुमा जागरण पैदा हुने र टोलटोलमा शिक्षक पुग्ने नीतिलाई अवलम्बन गरी १० कक्षासम्मका विद्यार्थीलाई जोड्ने विद्यालय व्यवस्थापन समितिका अध्यक्ष प्रदीप दाहालले सुनाए । विद्यालयलाई क्वारेन्टाइनस्थल बनाए पनि टोलमा शिक्षक पुग्ने र विद्यार्थीसँग प्रश्नोत्तरको संवाद जारी राख्दा फाइदा पुग्ने वडाध्यक्ष किरण माझीको बुझाइ छ । विद्यालयमा कार्यरत २४ शिक्षकलाई विषयगत पालैपालो टोल विभाजन गरिएको छ । विद्यालयमा १० कक्षासम्म ४८२ विद्यार्थी छन् ।
जिल्ला शिक्षा समन्वय इकाइका प्रमुख नेत्रप्रसाद गजुरेल विद्यालय सञ्चालन गर्नुस् भन्ने परिस्थिति नभएकाले सामाजिक दुरी कायम गरेर शिक्षकहरुले गरेको मेहनत कदरयोग्य भएको बताउँछन् । कमलामाई नगरपालिकामा सामुदायिकतर्फ ९८ र २६ वटा निजी विद्यालय छन् । इकाइका अनुसार बालविकाससहित जिल्लाका ९ वटा स्थानीय तहमा ५७५ वटा विद्यालय रहेका छन् ।
प्रकाशित : जेष्ठ १८, २०७७ २०:५६