वाग्मती प्रदेशको नीति तथा कार्यक्रम बहुमतले पारित

सुवास विडारी

मकवानपुर — वाग्मती प्रदेश सरकारको आगामी आर्थिक वर्ष २०७७/०७८ को नीति तथा कार्यक्रम बहुमतले पारित भएको छ ।

प्रदेश प्रमुख विष्णु प्रशाईंले मंगलबार प्रदेशसभामा पेश गरेको नीति तथा कार्यक्रम बुधबार बहुमतले पारित भएको हो । नीति तथा कार्यक्रमको पक्षमा नेकपा सांसद्हरु रहँदा विपक्षमा सदनमा प्रतिनिधित्व गर्ने अन्य दलहरु रहेका थिए ।

नीति तथा कार्यक्रममा सांसदहरु रमेश पौडेल, निमा लामा, प्रभात तामाङ, पुकार महर्जन, सन्तबहादुर प्रजा, रिता माझी, रिना गुरुङ र शोभा शाक्यले दर्ता गराएको संशोधन प्रस्ताव बहुमतले अस्वीकृत भएको छ ।

नीति तथा कार्यक्रममा विभिन्‍न दलका सांसदहरुले उठाएका प्रश्‍नहरुको जवाफ मुख्यमन्त्री डोरमणि पौडेलले दिएका थिए । उनले कोभिड–१९ रोकथामका लागि प्रदेश सरकारले काम गरिरहेको दाबी गरे । ‘हामीले हालसम्म १७ करोड रुपैयाँ खर्च गरिसकेका छौं । स्थानीय तहलाई आवश्यकताका आधारमा अझै थप बजेट उपलब्ध गराउनेछौं ’, मुख्यमन्त्री पौडेलले भने । उनले सांसदहरुले भने जस्तो कोरोना नियन्त्रणमा सरकार उदाशिन नभएको दाबी गरे ।

मुख्यमन्त्री पौडेलले प्रदेशका स्वास्थ्य संस्थाहरुको स्तरोन्नति र स्वास्थ्य क्षेत्रमा गर्ने कार्यहरु पनि नीति तथा कार्यक्रममा उल्लेख गरेको बताए । आगामी आर्थिक वर्षबाट प्रदेश सरकारले कृषि क्षेत्रमा दिँदै आएको अनुदान बैंकमार्फत् दिइने बताए । उद्योगीलाई राहत उपलब्ध गराउनका लागि प्रदेश सरकारले संघीय सरकारलाई आग्रह गरेको उनले बताए ।

कोरोना भाइरको जोखिमका कारण प्रदेशसभाको बैठकलाई छोट्याइएको थियो ।

प्रकाशित : जेष्ठ १४, २०७७ १५:३०
प्रतिक्रिया
पठाउनुहोस्

लकडाउन उल्लंघन गरेको आरोपमा २८ नेपाली भारतीय जेलमा

सुम्निमा चाम्लिङ

इटहरी — भारत उत्तर प्रदेशको बागपत जिल्लामा २८ जना नेपाली नागरिक जेलमा रहेको पाइएको छ । सुनसरीको कोसी गाउँपालिकाका १७, भोक्राहा नगरसिंह गाउँपालिकाका १ जना र १० जना सप्तरीका नागरिक रहेको पाइएको हो ।

लकडाउन उल्लघंन गरेको अभियोगमा उनीहरुलाई गत बिहीबारदेखि बागपत जिल्ला कारागारमा राखिएको हो । जेलमा रहेका नागरिकले भ्वाइस म्यासेजमार्फत आफूहरु जेलमा रहेकाले उद्धार गरिदिन आग्रह गरेको कोसी गाउँपालिकाका अध्यक्ष अयुब अन्सारीले बताए ।

अन्सारीका अनुसार गत फागुन ५ गत सप्तरीमा सम्पन्‍न इस्लामिक भेलामा सहभागी टोली ज्ञान बाँड्ने उद्देश्यले भारतको विभिन्न स्थान हुँदै भारतको उत्तर प्रदेश पुगेका थिए । भारतको दिल्लीमा आयोजित मुस्लिम कार्यक्रममा सहभागीमा कोरोना संक्रमण देखिएपछि भारतले कडाइ गरेको थियो ।

सोही क्रममा उत्तर प्रदेश पुगेको नेपाली टोलीसहित अन्य भारतीय नागरिकलाई ३९ दिन कृष्ण उच्च माविको क्वारेन्टाइनमा राखिएकोे अध्यक्ष अन्सारीको भनाइ छ । भारतीय नागरिकलाई छाडिए पनि नेपाली नागरिकलाई कारागार चलान गरिएको खबर आफूलाई आएको अध्यक्ष अन्सारीले जानकारी दिए ।

कोसी गाउँपालिका वडा ४ का जहाँगिर मन्सुरीका बुवा कैयम मन्सारी जेलमा छन् । उनका अनुसार क्वारेन्टाइनमा रहँदासम्म बुवासँग फोनमा कुराकानी भइरहन्थ्यो । ६ दिनदेखि भने सम्पर्क हुन सकेको छैन । उनले भने, ‘पाँच दिनपछि हामीलाई घर पठाउँछन् भन्नुहुन्थ्यो । तर अहिले उहाँहरुलाई जेलमा राखिएको रहेछ ।’

‘व्रत बसेका बुवाले पानी पनि खान पाउनु भयो/भएन । घरका सबै पिर गरिरहेका छन् । सरकारले चाँडै घर ल्याइदिए हुने थियो,’ उनले भने ।

उनीहरु बसेको क्वारेन्टाइनमा २८ नेपालीसहित २ सय ५० जना भारतीय नागरिक रहेका थिए ।

‘बागपतका जिल्लाका एसपीसँग कुरा गर्दा नागरिकलाई नेपाल पठाइसकेका छौ‌ भन्छन् । तर अहिलेसम्म जेलबाट भने छाडिएको रहेनछ,’ कोसी गाउँपालिका अध्यक्ष अन्सारीले भने । उनका अनुसार उद्धारका लागि संघीय सांसद ज्ञानेन्द्र कार्कीले मगंलबार परराष्ट्र मन्त्रालयमा घटनाबारे जानकारी गराइसकेका छन् ।

यस्तै, कोसी गाउँपालिकाको सिफारिसमा जिल्ला प्रशासन कार्यालय सुनसरीमार्फत समेत घटनाबारे परराष्ट्र मन्त्रालयमा जानकारी गराउने तयारी भएको उनले बताए ।

प्रकाशित : जेष्ठ १४, २०७७ १५:०८
पूरा पढ्नुहोस्
प्रतिक्रिया
पठाउनुहोस्
×