संक्रमित बालक बसेको धादिङको स्वास्थ्यचौकी सिल

हरिहरसिंह राठौर

धादिङ — लमजुङका कोरोना संक्रमित ३ वर्षीय बालक ५० दिन बसेर गएकाे पाइएपछि गंगाजमुना–४ गुम्दीस्थित स्वास्थ्य चौकी अनिश्चितकालका लागि बन्द गरिएको छ ।

उनका हजुरबुबा सोही स्वास्थ्य चौकीमा कार्यरत रहेकाले उनी लमजुङको सुन्दरबजारबाट आमासहित चैत ९ गते गुम्दी आएर वैशाख २९ गते काठमाडौं गएका थिए । काठमाडौंमा घरधनीले कोरोना परीक्षण नगरी घरभित्र पस्न नदिएपछि जाँच गर्दा बालकमा संक्रमण पुष्टि भएको थियो । सँगै रहेकी आमालाई भने कोरोना देखिएन ।

ती बालकका हजुरबुबासहित उनको सम्पर्कमा आएकाहरू, गुम्दीमा उनीहरूले डेरा लिएको घरका परिवारको कन्ट्याक्ट ट्रेसिङ गरी स्वाब संकलन गर्न टोली खटाइएको प्रमुख जिल्ला अधिकारी अस्मान तामाङले बताए ।

‘उनीहरूको डेरावरपर अरू १५ वटाजति घर छन् । ती परिवारको पनि लगत संकलन गर्दै छौं, सबैभन्दा नजिकका नातेदारको पीसीआर गरेपछि त्यसको नतिजाबमोजिम थप कारबाही अगाडि बढाउँछौं,’ गंगाजमुना गाउँपालिकाका स्वास्थ्य संयोजक दीपक अधिकारीले भने ।

प्रकाशित : जेष्ठ ८, २०७७ १२:३४
प्रतिक्रिया
पठाउनुहोस्
ADVERTISEMENT

क्याम्पसलाई क्वारेन्टाइन बनाउन खोजेपछि कोहलपुरमा स्थानीयको विरोध

ठाकुरसिंह थारु

नेपालगन्ज — बाँकेको कोहलपुर नगरपालिकाले क्वारेन्टाइन निर्माण गर्न खोजेपछि स्थानीय विरोधमा उत्रिएका छन् । बागेश्वरी बहुमुखी क्याम्पसमा क्वारेन्टाइन बनाउन खोजेपछि त्यस क्षेत्रका स्थानीय सडक बन्द गरेर विरोधमा उत्रिएका हुन् । उनीहरुले भारतबाट आउने व्यक्तिहरुबाट कोरोना सर्न सक्ने भन्दै विरोध जनाएका हुन् ।

यसअघि कोरोनाका सक्रमितहरुलाई राख्न थालेको भन्दै कोहलपुरको पीपरीका स्थानीय विरोधमा उत्रिएका थिए । पीपरीस्थित कृषि विकास बैंकको तालिम कक्षमा २५ जनालाई क्वारेन्टाइन बनाएर राखिएको थियो । उनीहरुको पीसीआर जाँच नेगेटिभ आएपछि घर पठाइएको छ । उनीहरु घर फर्किएपछि त्यहाँ ४१ जना कोरोना संक्रमितलाई राखिएको छ ।

कोहलपुर प्रहरीका प्रमुख डीएसपी कुलचन्द्र चन्दले स्थानीयका विरोधलाई पन्छाउँदै कोरोना संक्रमितलाई राखिएको बताए । बुधबार भारतबाट फर्किएका ६० जनालाई राख्नका लागि नगरपालिकाले तीन स्थानमा क्वारेन्टाइन बनाउने निर्णयपछि स्थानीयले सडक बन्द गरेर विरोधमा उत्रिएपछि समस्या भएको छ ।

प्रकाशित : जेष्ठ ८, २०७७ १२:३१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×