दोलखामा जेठ ५ सम्म तरकारी र खाद्यान्‍न आयातमा प्रतिबन्ध- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

दोलखामा जेठ ५ सम्म तरकारी र खाद्यान्‍न आयातमा प्रतिबन्ध

राजेन्द्र मानन्धर

दोलखा — लकडाउन अवधि जेठ ५ गतेसम्म दोलखा जिल्ला बाहिरबाट खाद्यान्‍न, तरकारी र फलफूल ल्याउन प्रतिबन्ध लगाइएको छ ।

कोभिड— १९ संक्रमणको भयावह हुनसक्ने अवस्थालाई ध्यान दिएर जिल्ला बाहिरबाट उक्त वस्तुहरु ल्याउन प्रतिबन्ध लगाउनु परेको प्रमुख जिल्ला अधिकारी भीमकान्त शर्माले बताए ।

खासगरी कोभिड— १९ फैलिरहेका तराईका जिल्लाहरुबाट खाद्यान्‍न, फलफूल र तरकारी आउने क्रम बढेपछि त्यस्तो नीति लिइएको प्रजिअ शर्माले बताए । जिल्लाका दुई प्रमुख नाका किर्नेटार र खरिढुंगाबाट तरकारी र फलफूल पूर्णतः प्रतिबन्ध लगाइएको हो । खाद्यान्‍नको हकमा कोभिड— १९ को संक्रमण नदेखिएको जिल्लाहरुबाट भने प्रकृया पूरा गरेर ल्याउन दिइने प्रजिअ शार्माले बताए ।

दोलखाका मुख्य बजारहरुमा तराई र राजधानीबाट तरकारी र फलफूल आयात हुन्छ । लकडाउन पनि उक्त जिल्लाहरुबाट दिनहुँ तरकारी र फलफूल आयात भइरहेका थिए । जिल्लाभित्र नै उत्पादित तरकारीले पुग्‍ने र खाद्यान्‍नको पनि मौज्दात रहेकाले उक्त वस्तुहरु आयातमा प्रतिबन्ध लगाउने निर्णय बुधबार गरिएको हो ।

हाल दोलखा जिल्लाभित्र उत्पादित काउली, बन्दाकोभी, सागहरु प्रशस्त मौज्दात छन् । काउली र बन्दाकोभी किसानका बारीमा छिप्पिदै गएको छ । राजधानीका बजारमा बिक्री हुन छाडेपछि ठूलो मात्रामा तरकारी उत्पादक किसानहरुले सम्बन्धित स्थानीय तहहरुसँग क्षतिबारे गुनासो र परिपूर्तिबारे छलफल गरिरहेका थिए ।

पाँच दिनका लागि बाहिरबाट तरकारी आउन नआउँदा जिल्लाभित्र उत्पादित तरकारीहरुको मौज्दात घटेर किसानलाई राहत हुने देखिन्छ । जेठ ५ पछिको अवस्था हेरेर अर्को निर्णय लिइने कोभिड— १९ जोखिम न्यूनीकरण जिल्ला समन्वय समितिले जनाएको छ ।

प्रकाशित : जेष्ठ १, २०७७ १६:०२
प्रतिक्रिया
पठाउनुहोस्

अत्यावश्यक सेवावाहेकका गाडीलाई दोलखा प्रवेशमा रोक 

राजेन्द्र मानन्धर

दोलखा — जेठ १ गतेदेखि लागू हुनेगरी अनिश्चितकालका लागि अत्यावश्यक सेवावाहेक अन्य सवारीसाधनलाई दोलखा प्रवेशमा रोक लगाइएको छ । कुनै पनि बाहनामा सवारीसाधन आएमा दोलखाका दुई नाका किर्नेटार र खरिङ्गाबाट फर्काइने छ । 

जिल्ला प्रशासन कार्यालयले जारी गरेको सूचनामा जिल्ला प्रवेश गर्ने मुख्य नाकाहरुमा सुरक्षा व्यवस्था कडा पारिने उल्लेख छ । सूचनामा भनिएको छ, ‘अत्यावश्यक सेवावाहेक सबै सावारीसाधनलाई जिल्ला प्रवेशमा रोक लगाइएको छ ।’

कोभिड—१९ को खतरापछि लकडाउनलाई प्रभावकारी बनाउन जारी सूचनाअनुसार जेठ १ गतेदेखि जिल्लाभित्रका औषधि पसलबाहेक अन्य सबै व्यवसाय बन्द गर्नुपर्ने छ । सामान्य चिया पसलहरु पनि नखोल्न अनुरोध गर्दै औषधिबाहेक सबैखाले व्यवसायहरु बिहान १० बजेबाट पूर्ण रुपमा बन्द गर्ने उल्लेख छ ।

बैंकिङ र सहकारीहरुले सीमित सेवामात्रै दिनेगरी व्यवस्था मिलाउन भनिएको छ । सूचनाअनुसार स्थानीय प्रशासनले लकडाउनलाई कडा पर्नेगरी प्रस्तुत हुने संकेत गरिएको छ । प्रमुख जिल्ला अधिकारी भीमकान्त शर्माले कोभिड—१९ को खतरा बढ्दै गएकाले जिल्लालाई सुरक्षित बनाउन थप कडा कदम चालिने जानकारी दिए ।

प्रकाशित : वैशाख ३१, २०७७ २३:३७
पूरा पढ्नुहोस्
प्रतिक्रिया
पठाउनुहोस्
×