दुई जोडीको बालविवाह रोकियो

हेटौंडा उपमहानगरपालिका—१४ की १५ वर्षीया बालिका र हेटौंडा उपमहानगरपालिका— १३ का १९ वर्षीय किशोरबीच हुन लागेको बालविवाह रोकेको हो ।

सिविन हेल्पलाइनलाई बालविवाह हुन लागेको जानकारी स्थानीय किशोरी समूहले दिएका थिए । उनीहरुले दिएको जानकारीअनुसार विवाह हुन लागेको बालिका र बालकको घरमा नै पुगेर वडाध्यक्ष दीपक खडका, स्थानीय प्रहरी प्रमुख र सिविन हेल्पलाइन मकवानपृुरका प्रमुख झविन्द्र ज्ञवाली गएर दुवैका अभिभावकहरुलाई सम्झाइबुझाइ गरेर बालविवाह रोकेका थिए । बिहीबार बेलुका विवाह गर्ने तयारीमा उनीहरु जुटेका थिए । ‘सम्झाइबुझाइ गरेपछि वालविवाह रोके,’ वडाध्यक्ष दीपक खडकाले भने ।

यसैगरी मकवानपुरगढी गाउँपालिका—७ की १४ वर्षीया किशोरी र सोही गाउँपालिका–२ का १७ वर्षीय किशोरबीच बिहीबार बालविवाह हुन लागेको थियो । त्यो पनि रोकिएको छ । वडाध्यक्ष बखानसिहं पाख्रिन र स्थानीय प्रहरी प्रमुुखमा र सिविन हेल्पलाइनका प्रतिनिधिहरुको सक्रियतामा उक्त बालविवाह रोकिएको हो ।

दुवै पक्षका अभिभावकहरुलाई सम्झाइबुझाइ गरेर बालविवाह रोकेको सिविन हेल्पलाइनका प्रमुख ज्ञवालीले भने । स्थानीय किशोरीहरुले गाउँमा बालविवाह हुन लागेको खवर सिविन हेल्पलाइनमा फोन गरेर जानकारी दिएका थिए । सिविन हेल्पलाइन मकवानपुरको सक्रियतामा ५ महिनाको बीचमा २६ वटा वालविवाह रोकिएको छ । मकवानपुरको जनजाति र आदिवासी समुदायमा बालविवाह प्रथा अझै कायम छ । अहिले अधिकांश बालविवाह प्रेमविवाहको रुपमा हुने गरेको छ । अभिभावकहरुले भन्दा पनि कलिलै उमेरमा आफै विवाह गर्ने प्रचलन झाँगिएको छ ।