धादिङमा जीप दुर्घटना, एक १ को मृत्यु, ८ घाइते- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

धादिङमा जीप दुर्घटना, एक १ को मृत्यु, ८ घाइते

हरिहरसिंह राठौर

धादिङ — बेनिघाट रोराङ ४ आरन भञ्ज्याङमा जीप दुर्घटना हुँदा १ जनाको मृत्यु भएको छ । दुर्घटनामा ८ जना घाइते भएका छन् ।

मलेखु बजारबाट तरकारी बेचेर फर्केका किसानहरुलाई लिएर वडा नं ४ को खहरे जाँदै गरेको बा. १ क ८७३६ नम्बरको उक्त जीप अपरान्ह ४ बजे आरन भन्ज्याङको सडकबाट अन्दाजी ४ सय मिटर तल खसेको थियो ।

जीप दुर्घटनामा मातातीर्थ औंसीमा आमाको मुख हेर्न आउँदै गरेकी ज्वालामुखी १ देविटारकी सरु बस्यालको घटनास्थलमै मृत्यु भएको र अन्य ८ जना घाइते भएको गजुरीस्थित प्रहरी नायब उपरिक्षक खगेन्द्रबहादुर खड्काले बताए ।

सख्त घाइते भएका ३ जनालाई थप उपचारका लागि काठमाडौंस्थित ट्रमा सेन्टर पठाइएको छ भने ३ जनाको राजमार्ग सामुदायिक अस्पताल मलेखुमा उपचार भइरहेको छ । सामान्य घाइते २ जनालाई प्राथमिक उपचारपछि घर फर्केका छन् ।

प्रकाशित : वैशाख ७, २०७७ २०:५४
प्रतिक्रिया
पठाउनुहोस्

दोस्रो चरणको राहत वितरणमा अन्योल

संघीय र प्रदेश सरकारबाट अनुमति नआउँदा राहत तयार भए पनि जनप्रतिनिधिले वितरण गरेका छैनन्
गणेश राई

(ललितपुर) — महालक्ष्मी नगरपालिकाका जनप्रतिनिधिहरू यतिखेर दोस्रो चरणको राहत वितरणको तयारीमा छन् तर संघीय सरकारबाट बाँड्ने अनुमति नआउँदा उनीहरू राहत वितरण गर्ने कि नगर्ने भन्ने अन्योलमा छन् । ज्यालामजदुरी गरेर बसेका सर्वसाधारण रासनको अभाव भएपछि वडा कार्यालय धाइरहेका छन् । वडा कार्यालयले भने ‘माथिबाट दिन नभनेसम्म पर्खिन’ आग्रह गर्दै आएका छन् ।

लकडाउन भएपछि महालक्ष्मी नगरपालिकामा ९ हजारभन्दा बढीले राहतका निम्ति आवेदन दिएका थिए । नगर कार्यपालिकाले तोकेको मापदण्डअनुसार आवेदकमध्ये साढे आठ हजार जनालाई पहिलो चरणमा राहत दिइएको वडा नं.४ का वडाध्यक्ष लक्ष्मण रोकाले बताए । प्रतिपरिवारलाई १० किलो चामल, एक–एक किलो दाल, तेल, नुन तथा एक–एक वटा साबुन दिइएको थियो ।

‘अब संघीय र प्रदेश सरकारबाट अनुमति नआएसम्म दोस्रो चरणमा राहत दिने/नदिने भन्नेबारे निर्णयमा पुगेका छैनौं तर पनि राहत तयार छ,’ वडाध्यक्ष रोकाले भने, ‘व्यक्तिगत रूपमा राहत वितरण नगर्न भनेका छौं । एकद्वार प्रणाली अपनाउने सरकारको नीतिअनुसार व्यक्ति र संस्थालाई नगरपालिकाको विपत् व्यवस्थापन समितिमा सहयोग संकलन गर्न भनेका छौं ।’ वडा नं.४ हात्तीवन क्षेत्रमा १ हजार १ सय ८४ जनालाई राहत वितरण गरिएको वडाध्यक्ष रोकाले बताए ।

नगरपालिकाले राहत वितरण रोके पनि विभिन्न संस्थाले राहत वितरण गर्दै आएका छन् । नगरपालिकाको वडा नं.४ हात्तीवन क्षेत्रमा स्थानीय नयाँ नेपाल समाज सुधार युवा क्लबले अध्यक्ष पंकज खड्काको पहलमा रासन बाँडेको छ । उक्त टोलीले साता दिनदेखि १ हजार ४ सय ८२ जना मजदुर तथा विद्यार्थीलाई रासन वितरण गरेको हो । प्रतिपरिवार ५ किलो चामल, १ लिटर तेल, १ किलो दाल, १ किलो चिउरा, १–१ प्याकेट नुन, मिट मसला, पापड, अचार, गेडागुडी र मास्क वितरण गरेको छ । ‘टोलछिमेकमा आपतविपत् परेकाले व्यक्तिगत पहलमा रासन बाँड्दै आएका छौं,’ क्लबका अध्यक्ष खड्काले भने, ‘नगरपालिकाले जथाभाबी नबाँड्नु भनेकाले अब रोक्छौं ।’

त्यसैगरी काठमाडौंको बत्तीसपुतली क्षेत्रका मारवाडी परिवारले हात्तीवनस्थित सुमेरु अस्पतालमा नि:शुल्क खाना उपलब्ध गराएको छ । ‘पशुपतिमा दैनि सात–आठ सय जनालाई खाना खुवाउँदै आएका थियौं, प्रशासनले रोक्यो,’ परिवारका सदस्य मिलेर सामग्री जुटाएको उल्लेख गर्दै कमल अग्रवालले भने, ‘अहिले अस्पतालसँग अनुरोध गरेर बिरामी कुरुवा, बिरामी र अस्पताल परिवारलाई खाना उपलब्ध गराएका छौं । यो कुनै प्रचारप्रसार होइन, सेवा मात्र हो ।’ दैनिक सय जनालाई दाल, भात, तरकारी खुवाउने गरेको जनाइएको छ ।

प्रकाशित : वैशाख ७, २०७७ २०:५२
पूरा पढ्नुहोस्
प्रतिक्रिया
पठाउनुहोस्
×