नुवाकोट भैरवीको सिन्‍दुरे जात्राको खट उठेन

कृष्ण थापा

नुवाकोट — कोरोना भाइरस (कोभिड १९)का कारण यस वर्ष चैत्र शुक्लपूर्णिमा जालपादेवी मन्दिरमा लगिने भैरवीको खट उठ्न सकेन । स्थानीय प्रशासनले जात्रा गर्न रोक लगाएपछि सिन्दुरे जात्राको लागि गत बिहिबार चैत्र शुक्ल नवमीमा सिन्दुरे जात्राको अक्षता उठाउने कार्य रोकिएपछि देवीको विधि रोकिएको थियो । 

चैत्र शुक्ल नवमीमा अक्षता उठाउने कार्य र बुधबार देवीको खट उठाउने कार्य रोकिएको राजप्रतिनिधि एवं नुवाकोट मौला अमाल प्रमुख द्वारे महेन्द्रकुमार शाहीले जानकारी दिए ।


लिच्छविकालीन शक्तिशाली देवी नुवाकोटकी भैरवीदेवीको सिन्दुरे (भैरवी वर्ष बन्धन) अवसरमा चैत्र शुक्ल पूर्णिमाबाट हुने जात्रा रोकिएको शाहीले बताए ।


यसअघि भैरवीको सिन्दुरे जात्रा २०११ सालमा राजा त्रिभुवनको निधन भएपछि एक वर्ष रोकिएको थियो । जात्रा स्थगित भएको यो दोस्रो पटक हो ।


भैरवीको खट बोक्न सूर्यगढी गाउॅपालिका १ लच्याङका गुठियार आउने गरेका थिए । भिडभाडले कोरोनाको संक्रमण हुन नदिन जात्रा रोकिएको प्रमुख जिल्ला अधिकारी द्रोण पोखरेलले बताए ।


विदुर नगरपालिका २ स्थित पुरानो सदरमुकाम भैरवीथानमा चैत्र शुक्ल चतुर्दशीको दिन धार्मिक विधि अनुसार बुढी भैरवी र भैरवीथानमा लिंगोसमेत उठेन । बिहिबार भैरवीको मुकुटलाई खटमा राखेर पूजा सुरुवात गर्दै धामी र धमिनीसहित नगरपालिकाको वडा नं ५ मा रहेको बहिनी जालपादेवी मन्दिरमा लैजाने गरिन्छ । खट सूर्यगढी गाउॅपालिका १ लच्याङका गुठियार लच्याङवासीले पुर्खौदेखि बोक्दै आएका थिए ।


चैत्र पूर्णिमाको दिन खटलाई जलपादेवी मन्दिर पुर्याउने र द्वादशीको दिन नुवाकोटको भैरवीथान मुनि धरमपानी पार्टी ल्याइ भोलिपल्ट भैरवीथानमा पूजाआजा गरेर राजप्रतिनिधि एवं नुवाकोट मौला अमाल प्रमुख द्वारे शाहीले धामी र धमिनीलाई सिन्दुर छर्केपछि सिन्दुरे जात्रा सुरु भएको मानिन्छ ।

प्रकाशित : चैत्र २६, २०७६ २०:३६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

हावाहुरी र चट्याङको सम्भावना, सचेत रहन महाशाखाको आग्रह

कान्तिपुर संवाददाता

काठमाडौँ — जल तथा मौसम पूर्वानुमान महाशाखाले केही दिन हावाहुरी र चट्याङको सम्भावना अत्यधिक भएकाले सतर्कता अपनाउन सर्वसाधारणलाई आग्रह गरेको छ ।


महाशाखाले बुधबार विशेष बुलेटिन निकालेर उच्च वेगमा हावाहुरी र चट्याङसहित असिना पर्ने सम्भावना देखिएको उल्लेख गरेको छ । ‘६२ किलोमिटर प्रतिघण्टाको गतिमा हावाहुरी चल्ने देखिन्छ,’ महाशाखाले भनेको छ, ‘मेघगर्जन र बादल विकसित हुने क्रम पश्चिमबाट पूर्वतिर सरिरहेको छ ।’

भारतको उत्तरप्रदेशबाट नेपाल प्रवेश गरेको मौसमी प्रणालीका कारण मुलुकको मध्य भूभागसम्म असर गरेको छ । उक्त प्रणाली कास्की, पर्वत, लमजुङ, स्याङ्जा, तनहुँ हुँदै प्रदेश ३ को भूभागतिर आएको महाशाखाले उल्लेख गरेको छ ।

चितवन, मकवानपुर, धादिङ, काठमाडौं, काभ्रे, ललितपुर, भक्तपुरका क्षेत्रमा ६२ किलोमिटर प्रतिघण्टा वा सोभन्दा उच्च गतिमा हावाहुरी र चट्याङसहित असिना पानीसमेत पर्न सक्ने महाशाखाले बताएको छ । प्रि–मनुसन (मनसुन अवधिअघि) का बेला चैतदेखि जेठसम्म नेपालमा हावाहुरी र चट्याङको सम्भावना हुन्छ ।

गृह मन्त्रालयको विपद् प्रतिवेदनका अनुसार अघिल्ला दुई वर्षमा हावाहुरी र चट्याङबाट २ सय ५४ जनाको ज्यान गएको थियो भने ६ सय ५४ जना घाइते भएका थिए । दुई वर्षमा हावाहुरी र चट्याङका ४ सय ३२ वटा घटना भएका थिए । केही वर्षयता हावाहुरी र चट्याङले विपदको ठूलो रूप लिन थालेको छ ।

महाशाखाका वरिष्ठ मौसमविद् वरुण पौडेलका अनुसार चट्याङ अनुगमन गर्न जल तथा मौसम विज्ञान विभागले देशका ९ स्थानमा लाइटिङ नेटवर्क स्थापना गरेको छ ।

‘ती स्टेसनले चट्याङ पार्न मद्दत गर्ने बादल कसरी विकसित भइरहेको छ र कतातिर गइरहेको भनेर पूर्वानुमान गर्न सहयोग गर्छन्,’ पौडेलले कान्तिपुरसित भने, ‘जसले गर्दा सम्भावित चट्याङबारे पनि हामीले फरकास्ट गर्न सक्छौं ।’ त्यस्ता स्टेसन काठमाडौंसहित नेपालगन्ज, भैरहवा, सुर्खेत, विराटनगर, ओखलढुंगालगायत स्थानमा छन् ।

जोगिन के गर्ने ?
– रुखमुनि नबस्ने
– घरमा झ्याल तथा ढोका बन्द गरेर बस्ने
– विद्युतीय सामग्री तथा विद्युत् प्रवाह बन्द गर्ने
– मोबाइल र टेलिफोनको सकभर न्यूनतम प्रयोग गर्ने ।
– फलामजन्य धातुबाट बनेको भित्तामा आड नलिने

प्रकाशित : चैत्र २६, २०७६ २०:१२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×