ढुक्क भएर कृषिकर्ममा व्यस्त

अनिश तिवारी

सिन्धुपाल्चोक — कोभिड १९ को संक्रमण त्रासमा देशभर लकडाउन छाएपछि मुख्य र साना बजारक्षेत्रमा सुरक्षाकर्मीबाहेक अन्यलाई देख्नै मुस्किल छ । पूर्व तातोपानीदेखि पश्चिम हेलम्बु बजारसम्मका स्थानीय घरबाट बाहिर निक्लिएका छैनन् ।

तर, लकडाउनको शून्यबीच सबै गाउँक्षेत्रका बासिन्दा भने ढुक्क भएर दैनिकी खेतीपाती र कृषिकर्ममा व्यस्त देखिएका छन् । चैते धान रोपाईमा व्यस्त चौतारा साँगाचोकगढी नगरको झ्याडी टोलका माझी, दनुवार समुदायमा भने छुट्टै रौनक छाएको छ । इन्द्रावती किनारको फाँटमा आलोपालो गरी रोपाईमा व्यस्त छन् ।


‘काम नगरी कसरी बाँच्ने, अब यहाँ बाहिरबाट आएका कोही छैनन्, कोरोना कहाँबाट सर्नु हजुर ,’ झ्याडी टोलका सुरेन्द्र माझीले भने । साबुन पानीले हात धोएर सचेतना अपनाएरै माझी र दनुवार समुदाय एक भएर दैनिक काममा खटिरहेको उनले बताए ।



नजिकै रहेको अरनिको राजमार्गस्थित काभ्रेको दोलालघाट, बन्देउ हुँदै सुकुटे, बलेफी जस्ता सबै बजार सुनसान देखिएको छ । ‘ ज्याला मजदुरी गरेर खाइन्थ्यो, त्यसको पनि केही अर्थ रहेन, लकडाउनको आलु खन्न सदुपयोग गरियो,’ मेलम्ची नगरपालिकाको फाँटमा आलु भित्राइरहेका नवराज श्रेष्ठले भने ।


खेतैपिच्छै आलु खनेर ठड्याइएको बोरा देखाएर उनले उत्साह पोखे । हल्लाकै भरमा कोरोना भाइरसको बारेमा चर्चा सुनेकी जुगल गाउँपालिका–३, तेम्बाथान्की माइली शेर्पा निर्धक्क सामुहिक रुपमा बाख्रा चराउछिन् । छिमेकीसँगै झण्डै सय वटा बाख्रा चराइरहेकी उनले कोरोना भाइरसबारे सबैकुरा थाहा नपाइसकेको खुलाइन् । ‘यता नेटकवर्क र फोन केही लाग्दैन्, बिजुली छैन्, टेलिभिजन, रेडियो कहाँबाट हेर्नु सुन्नु र, तैपनि यो रोगबारे हल्ला चाही सुनेको छु, ,’ उनले भनिन् ।




अझैसम्म सडक नजोडिएको जुगल गाउँपालिकाको अन्तिम गाउँ दिपु, तेगा र तेम्बाथान् गाउँमा स्वास्थ्य चौकी पुग्न झण्डै दुई दिन लाग्छ । स्वास्थ्य परीक्षण गर्न लामो दूरी हिड्नुपर्ने भएकाले अरुले भनेको सुनेको आधारमा साबुन पानीले हात धुने र अपरिचितसँग टाढा रहेर नबोल्ने गरिएको उनको भनाइ छ । ‘हाम्रो लेक गाउँमा पनि कोरोना आउछ र ?,’ उनले प्रश्न गरिन् ।




बाटैमा दाउराको भारी बोकेर आइरहेकी बाह्रबिसे नगरपालिका–६ घुम्थाङ गाउँकी डोमा शेर्पाले साबुन पानीले हात धुने र नचिनेको मान्छेसँग दूरी राखेर भेट्ने गरेको सुनाइन् । ‘हामी त ढुक्क छौ, केही गरी कोरोना आएपछि हेरौंला, अरु सचेतना जसरी पनि अपनाइएकै छ, अरु के गर्नु र ?,’ उनले भनिन् । उनका अनुसार गाउँभर विदेशबाट आएका सबैको अवस्था सामान्य रहेको र होम क्वारेन्टाइनमा बसेकोले खासै समस्या देखिएको छैन् । ‘साबुन पानीले हात पहिलेदेखि धुँदै आएका हौं, अब अरु नयाँ थपियो,’ उनले भनिन् ।


जनप्रतिनिधि र स्वास्थ्यकर्मीसँगै प्रहरी खट्दै


तीन नगर र नौ गाउँपालिकाका जनप्रतिनिधि स्वास्थ्यकर्मीलाई लिएर कोरोना भाइरस फैलिन नदिन स्वास्थ्य परीक्षण र सचेतना फैलाउन कस्सिएका छन् । बाह्रबिसे, मेलम्ची नगरदेखि हेलम्बु, इन्द्रावती गाउँपालिकाले कोरोना सचेतना अभियान व्यापक बनाएका छन् ।


‘जनप्रतिनिधि, स्वास्थ्यकर्मीसँगै सुरक्षाकर्मी पनि दौडिरहेका छन् , कोरोना रोकथामको लागि घरमै पुगेर सचेतना फैलाईरहेका छौं ’ इलाका प्रहरी बाह्रबिसेका प्रहरी निरीक्षक नवराज न्यौपानेले भने । प्रकाशित : चैत्र २५, २०७६ १६:२८

ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

सुलभ अग्रवाल पक्राउ गर्न ग्राहक बनेर गएको थियो प्रहरी

उनले प्रयोग गरिरहेको कूटनीतिक नियोगको नम्बर प्लेट गाडी पनि अवैध रहेको भेटिएको छ ।
मातृका दाहाल

काठमाडौँ — ‘तपाईंसँग ज्वरो नाप्‍ने थर्मल गन छ भन्ने सुन्यौं, हामीलाई चाहिएको छ, १ सय थान जति मिलाइदिनु पर्‍यो,’ शनिबार सुलभ अग्रवालसँग एक अपरिचित व्यक्तिले फोन गरे । 


त्यसपछि सुलभले फोन गर्ने ग्राहकलाई हुन्छ, प्रतिपिस १६ हजार पर्छ भने । ग्राहकले त्यत्रो त महंगो भयो, अलि मिलाइदिनुस् भन्दै आग्रह गरे । त्यसपछि सुलभले १५ हजारमा कुरा मिलाए । ती ग्राहक एक्लैले सय पिस थर्मल गन मागेपछि त्यसको जोहो गर्दै सुलभले मंगलबार बिहान उपलव्ध गराउने वचन दिए । तर ग्राहकले एकमुष्ट पैसा छैन भनेपछि सुलभले जति पैसा छ, त्यतिको मात्रै लैजानुस भनेपछि ग्राहकले १० लाख रुपैयाँ जोहो गरे ।

सुलभले मंगलबार बिहान नक्सालमा सामान लिन ग्राहकलाई बोलाए । पहिले भएको कुराकानी बमोजिम नै ग्राहक उनलाई भेट्न नक्साल गए । सुलभ कूटनीतिक नियोग तथा राजदूतावासले प्रयोग गर्ने २०९ एचसीसी–१ नम्बर प्लेटको गाडीमा भेटिए । ग्राहकले फोन गरेर उनको गाडी नजिकै गए । सामान निकालेर १० लाख रुपैयाँ बुझाउन नपाउँदै सुलभलाई ती ग्राहकले नियन्त्रणमा लिए ।

आफू प्रतिष्ठित उद्योगपति रहेको भन्दै पक्राउ नगर्न सुलभले आग्रह गरेका थिए । उनी शंकर ग्रुपका सञ्चालक पनि हुन् । ‘हामी थर्मल गन किन्ने ग्राहक होइनौं, प्रहरी हौं,’ यति भनेर सुलभलाई प्रहरीले नियन्त्रणमा लियो । अनि मात्रै थाह भयो, थर्मल गन खरिदका लागि ग्राहक बनेर आएका ती व्यक्ति महानगरीय अपराध महाशाखाका प्रहरी अधिकृत थिए ।

त्यसपछि हतास देखिएका सुलभले आफूलाई छाड्न बारम्बार आग्रह गरेका थिए । ग्राहक बनेर आएका ती व्यक्तिसँगै छेउछाउमा निगरानी गरेर अन्य प्रहरी पनि खटिएका थिए । हातमा प्रहरीको परिचय पत्र देखाएर सुलभलाई महाशाखाले नियन्त्रणमा लियो । उनलाई गाडीमै हालेर टेकुस्थित कार्यालय पुर्‍याइयो ।

अग्रवालले प्रयोग गरिरहेको कूटनीतिक नियोगको नम्बर प्लेट गाडी । यो गाडी पनि अवैध रहेको प्रहरी अनुसन्धानबाट खुलेको छ । तस्बिर सौजन्यः नेपाल प्रहरी ।

सुलभ नेपालका लागि किर्गिजस्तानका अवैतनिक दूत समेत हुन् । तर उनले प्रयोग गरिरहेको कूटनीतिक नियोगको नम्बर प्लेट गाडी पनि अवैध रहेको भेटिएको छ । सुलभ पक्राउलगत्तै महाशाखाले अवैतनिक दूतले कूटनीतिक नियोगको गाडी प्रयोग गर्न पाउने/नपाउनेबारे बुझेको थियो । परराष्ट्रले त्यस्तो सुविधा अवैतनिक दूतलाई नरहेको जानकारी गराएको छ । बरामद गाडीबारे पनि अनुसन्धान भइरहेको प्रहरीले जनाएको छ ।

महाशाखाका एसएसपी सहकुल थापाका अनुसार गतसाता मात्रै सुलभले चीनबाट थर्मल गन ल्याएका थिए । नेपाल एयरलाइन्सको जहाजमार्फत उनले २० हजार थान थर्मल गन ल्याएका थिए । बजार मूल्य ५ हजारसम्म भए पनि उनले कालोबजारी गरेर प्रतिगोटा १५ देखि २० हजार रुपैयाँसम्म लिएर बेच्ने गरेको खुलेको थापाले बताए ।

‘थर्मल गन महँगोमा बिक्री हुँदै छ भन्ने सूचना पाएपछि हामी आफैं ग्राहक बनेर अनुसन्धानमा जुट्यौं,’ थापाले कान्तिपुरसँग भने, ‘डील गर्न देखि सामान लिन जाँदासम्म ३ दिन लाग्यो ।’ एकैपटक १ सय थान किन्ने सोचले डिल गरेको तर धेरै डिल गर्दा अनुसन्धानको सुइको पाउने देखेर ६६ थानमात्रै किन्ने गरी अघि बढ्यौं ।’

यो पनि पढ्नुहोस्ः

प्रकाशित : चैत्र २५, २०७६ १६:०३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×