मकवानपुरमा लकडाउनलाई कडाई गर्ने प्रशासनको निर्णय

बैठकले मकवानपुरमा लकडाउन प्रभावकारी बनाउन कडाइका गर्नुका साथ प्रहरी परिचालन गर्ने, बजारमा अनावश्यक भीड बढेको र कोरोना संक्रमणको जोखिम बढेको भन्दै मकवानपुरमा सोमबारबाट अत्यावश्यक बाहेकका सवारी साधन पूर्णरुपमा रोक लगाउने निर्णय गरेको जिल्ला प्रशासन कार्यालय मकवानपुरका सूचना अधिकारी देवचन्द्र गर्तौलाले जानकारी दिए ।

औषधि किन्न जान लागेको, खाद्यान्न तरकारी किन्न जान लागेको भन्दै सर्वसाधारणहरु अनावश्यक रुपमा मोटरसाइकलमा हिँडेको पाइएकोले ठूलो संख्यामा प्रहरी परिचालन गरी सोधपुछमा कडाइ गरिएको उनले बताए । 'प्रहरीलाई शंका लागेमा सोधपुछ गर्छ, अत्यावश्यक भन्दै झुटो बोलेर बजार डुलेको पाइएमा नियन्त्रणमा लिई कडा कारबाही गर्छौं,' उनले भने ।

१ सय ३५ सवारी नियन्त्रणमा

मकवानपुर प्रहरीले लकडाउनको १४ औं दिन सोमबार १ सय ३५ सवारी साधन नियन्त्रणमा लिएको छ । लकडाउन उल्लंघन गरी चलेका १ सय ३५ सवारी र पसल खोल्ने, व्याड्मिन्टन खेल्ने १० जनालाई प्रहरीले नियन्त्रणमा लिएको लिएको हो ।

मकवानपुरका प्रहरी प्रवक्ता एवम् प्रहरी निरीक्षक सुजन पाठकले लकडाउन बेवास्ता गर्दै सवारी सञ्चालन गरेपछि नियन्त्रणमा लिएको बताए ।