निर्माण सामग्री र खाद्यान्न अभावपछि नौ सय मजदुर फिर्ता

जिल्लामा विद्यालय, निजी आवास पुननिर्माण र सडक पूर्वाधारलगायतमा कार्यरत मजदुरले काम नपाएपछि सवारी साधनको व्यवस्था गरी घर फिर्ता पठाइएको हो । निर्माण सामग्री र मजदुरका लागि खाद्यान्‍न जुटाउन नसकेपछि गाडी व्यवस्था गरी घर पठाइएको हो । उनीहरुलाई पठाउन गाडीको व्यवस्था निर्माण व्यवसायीहरुले गरेका थिए ।

यसैबीच बुधबारदेखि स्थानीय प्रशासनले सवारी पासलाई कडाई गरेको छ । सवारी पास लिनेका कारण संक्रमणको त्रास फैलिएको भन्दै स्थानीय प्रशासनको आलोचना भइरहेको बेला सवारी पासमा कडाई गरिएको हो ।

मंगलबार बिनाअनुमति ३३ जना यात्रु खाँदेर रामेछापको दोरम्बा आउँदै गरेको जिप राकाथुममा दुर्घटना परेपछि सवारी पासको निन्दा भएको थियो । स्थानीय बासिन्दाले सवारी पासका कारण निर्बाध सवारी चलेको भन्दै त्यसलाई नरोके लकडाउनको अर्थ नरहने गुनासो गरेका थिए ।

जिल्ला प्रशासन कार्यालय रामेछापले मात्र लकडाउनको अवधिमा करिब ४ सय सवारी पास उपलब्ध गराएको जनाएको छ । बाहिरी जिल्लाबाट पास लिएर जिल्ला भित्रिने सवारी साधनको संख्या त्यसको झण्डै दोब्बर छ ।