कान्तिपुर वेबसाईट
AdvertisementAdvertisement

प्रदेशसभामा ‘बर्थडे’ बहस : ‘प्रधानमन्त्रीको परिवार पुँजीवादसँग जोडिएको छ’

‘नेकपाले जारी गरेको आचारसंहितामा जन्मदिन परिवारमा मात्रै सीमित गर्न भनिएको छ,’ सांसदले व्यंग्य गर्दै भने, ‘प्रधानमन्त्रीको परिवार पुँजीवादसँग जोडिएको छ । यती होल्डिङ्स उहाँको परिवार हो । त्यसैले यो जन्मउत्सव जायज छ ।’ 
सुवास विडारी

(मकवानपुर) — प्रधानमन्त्री केपी शर्मा ओलीले आफ्नो जन्मथलो तेह्रथुममा पुगेर ६९ औं जन्मदिन मनाएको विषयले वाग्मती प्रदेशसभाको बैठकमा प्रवेश पाएको छ । प्रधानमन्त्रीले आइतबार जन्मघरमा पुगेर नेपालको नक्सा अंकित केक काटेको र करिब ६ हजारभन्दा बढी नागरिकमाझ चारवटा हेलिकोप्टर चाटर्ड गरेर तामझामका साथ जन्मदिन मनाएको विषयले सोमबार प्रदेशसभाको बैठकमा चर्चा पाएको हो । 

प्रदेशसभाको बैठकअन्तर्गत शून्य समयमा बोल्ने सांसदहरूले महिनाअघि नेकपाले आफ्ना नेता तथा कार्यकर्ताका लागि जारी गरेको आचारसंहितामा ‘जन्मदिवस, पास्नी तथा व्रतबन्धजस्ता संस्कारलाई घरभित्रै सीमित गर्न’ दिएको निर्देशन भुलेर विवादमा तानिएको यती समूहको खर्चमा हेलिकप्टरमार्फत केक लगेर प्रधानमन्त्रीले जन्मगाउँमा जन्मदिन मनाएको भन्दै सांसदहरूले असन्तुष्टि जनाए ।


विवेकशीलका सांसद रमेश पौडेलले ‘कम्युनिस्ट प्रधानमन्त्रीको पुँजीवादी जन्मदिन’ भन्दै आफैंले जारी गरेको आचारसंहिता उल्लंघन गरेकोमा विरोध गरे । ‘नेकपाले जारी गरेको आचारसंहितामा जन्मदिन परिवारमा मात्रै सीमित गर्न भनिएको छ,’ उनले व्यंग्य गर्दै भने, ‘प्रधानमन्त्रीको परिवार पुँजीवादसँग जोडिएको छ । यती होल्डिङ्स उहाँको परिवार हो ।


त्यसैले यो जन्मउत्सव जायज छ ।’ सांसद बिजुला बर्माले प्रधानमन्त्रीले नेपालको अखण्डतालाई नै चुनौती दिने गरी जन्मदिन मनाएको भन्दै सार्वजनिक रूपमा माफी माग्नुपर्ने बताइन् । सांसद जीवन डंगोलले प्रधानमन्त्रीको जन्मदिनले गलत सन्देश प्रवाह भएको टिप्पणी गरिन् । ‘महोत्सवजस्तै गरी प्रधानमन्त्रीको जन्मदिन मनाइयो,’ उनले भनिन्, ‘प्रधानमन्त्रीले के सन्देश दिन खोजेको हो ?’ सांसद नरोत्तम वैद्यले सर्वहारा र समाजवादी प्रधानमन्त्रीको जन्मदिनले गलत सन्देश दिएको टिप्पणी गरे ।


मन्त्रिपरिषद् समावेशी बनाउन माग

वाग्मती प्रदेशको मन्त्रिपरिषद्मा महिला सहभागिता शून्य रहेको भन्दै सत्तापक्षकै महिला सांसदहरूले सरकारको आलोचना गरेका छन् ।


सोमबार प्रदेशसभाको शून्य समयमा बोल्दै नेकपाका महिला सांसदहरूले संविधानको भावनाविपरीत प्रदेश सरकारको मन्त्रिपरिषद् गठन भएको भन्दै सरकारको आलोचना गरेका हुन् । सांसद सरस्वती बाटीले संविधानले व्यवस्था गरेको समानुपातिक समावेशी प्रावधान वाग्मती प्रदेशको मन्त्रिपरिषद्मा नदेखिएको भन्दै निर्णायक नेतृत्वमा महिलाहरूको सहभागिता सुनिश्चित गर्न सरकारसँग माग गरिन् । ‘हालै पुनर्गठन गरिएको मन्त्रिपरिषद्मा पनि महिलाको सहभागिता भएन,’ उनले भनिन्, ‘सरकारले संविधानको मर्मविपरीत काम गरिरहेको छ ।


महिलाहरूको निर्णायक तहमा सहभागिता हुन जरुरी छ ।’ सत्तारूढ सांसद सीता अधिकारीले वाग्मती प्रदेश सरकारले संविधानकै उल्लंघन गरेको आरोप लगाइन् ।


‘युवा परिषद् भर्ती केन्द्र नबनोस्’

प्रदेशको युवा परिषद् कार्यकर्ता भर्ति केन्द्र बनाउन नहुने सांसदहरूले सुझाव दिएका छन् ।


प्रदेशको सामाजिक विकास मन्त्रालयले तयार गरेको प्रदेश युवा परिषद्सम्बन्धमा व्यवस्था गर्न बनेको विधेयकमाथि सोमबार सैद्धान्तिक छलफलमा भाग लिँदै सांसदहरूले भर्ती केन्द्रको रूपमा परिषद् हुन नहुने बताएका छन् ।


लोक सेवा विधेयक पास

प्रदेशसभाको सोमबारको बैठकले लोक सेवा आयोगको संशोधन विधेयक पारित गरेको छ ।


आइतबार प्रदेश मामिला समितिले छलफल गरी तयार गरेको प्रतिवेदन पेस गरिएको थियो । उक्त प्रतिवेदनसहित सोमबार विधेयक पारित भएको छ ।


मुख्यमन्त्री तथा मन्त्रिपरिषद्को कार्यालयले तयार गरेको विधेयक पारित भएसँगै आयोगले थप सहज रूपमा काम गर्न सक्ने विश्वास लिइएको छ । प्रकाशित : फाल्गुन १३, २०७६ ०९:३५

ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

‘छाउगोठ छैन, डर पनि छैन’

हालसम्म ६ हजार छाउगोठ भत्काइएको अछामलाई फागुनभित्रै छाउगोठमुक्त जिल्ला घोषणा गर्ने तयारी
मेनुका ढुंंगाना

ढकारी, अछाम — कहिले गाइगोरुसँगै त कहिले खेतबारीको कान्लामा । रातभर असहज र अनिँदै बस्नुपर्ने सास्तीबाट छुटकारा पाइने भएपछि ढकारी गाउँपालिका–१ का किशोरी दंग छन् । ढकारी–१ लाई आइतबार छाउगोठमुक्त घोषणा गरिएपछि उनीहरू खुसी भएका हुन् ।

‘गोठमा जान्नँ, घरभित्रै बस्छु भन्दा गाउँसमाजकै बुढापाका विभिन्न किसिमका डर देखाउँथे,’ स्थानीय कविता बुढाले भनिन्, ‘विवाह गरिसकेपछि पनि देउता लाग्ने भन्दै नानाथरी डर देखाएपछि घरभित्र बस्न सकेकी थिइनँ । अहिले त गोठ पनि छैन । डर पनि छैन ।’ गुरुकुल मावि, ढकारीमा कक्षा १० मा पढ्ने निशा बुढा महिनावारी भएका बेला सुरक्षित रूपमा सबैसँग घरमै बस्नुपर्ने बताउँछिन् । ‘गाउँका महिलाहरूको स्वर छाउगोठविरुद्ध भए मात्रै रूढिवादी परम्परा अन्त्य हुने हो,’ उनले भनिन्, ‘अब त भत्काइएका छाउगोठ फेरि बनाउन दिन्नौं ।’

छाउगोठ परम्परा हटाउन बुढापाका र गाउँका अगुवाले आफ्नै घरबाट सुधार गर्नुपर्ने बताउँछिन् ढकारी–१ कि चन्द्रा नेपाली । ‘समाजमा अझै पनि ठूलाबडा र हुनेखानेले जे गर्‍यो, त्यही देखासिखी गर्ने चलन छ,’ उनले भनिन्, ‘स्थानीय जनप्रतिनिधि, शिक्षक, कर्मचारी र नेताहरूका घरमा पहिले परिवर्तन हुनुपर्छ ।’ उनका अनुसार प्रहरी जनप्रतिनिधि र समाजका अगुवाले निरन्तर अनुगमन गरे परम्परादेखि जरा गाडेर बसेको छाउपडी मानसिकता भत्काउन गाह्रो हुँदोरहेनछ भन्ने यसपाला प्रस्ट भएको छ । नेपालीले भनिन्, ‘गोठ भत्काएर तामझामसाथ छाउगोठमुक्त वडा घोषणा गरिएको छ । अब फेरि जनप्रतिनिधिको घरमा छाउगोठ बन्नु भएन । समाज आफैं परिवर्तन हुनेछ ।’ पुरुषको सोचाइ र व्यवहारकै कारण छाउपडी कायम रहेको ढकारी–१ डुफाका मीन बुड्थापाको दाबी छ । ‘छाउगोठमा महिलाले दुःख भोग्छन् तर घोषणामा पुरुषले भाषण गर्छन् । हामी पुरुषले आमा, बहिनी, श्रीमतीलाई बुझाउन सक्नुपर्छ,’ उनले भने, ‘पुरुषहरू पनि समूहमा आबद्ध भएर अभियानमा जुट्नुपर्छ । गोठ भत्काएर घोषणा गर्नु त औपचारिकता मात्रै हो ।’ उनले छाउगोठलाई अन्य काममा उपयोग गर्ने नाममा नभत्काउने तर केही समयपछि महिलाहरू पुनः छाउगोठमै हेलिनुपर्ने बाध्यता रहेको बताए ।

छाउगोठ भत्काउने क्रममा कुनै पनि वडामा अवरोध नआएको ढकारी गाउँपालिकाका प्रमुख प्रशासकीय अधिकृत टेकबहादुर वलीले बताए । उनका अनुसार ८ वटा वडा रहेको ढकारीमा आठ सय छाउगोठ भत्काइएका छन् । सबै वडा छाउगोठमुक्त वडा घोषणा भइसकेकाले फागुन १४ मा गाउँपालिकालाई नै छाउगोठमुक्त घोषणा गर्ने तयारी गरिएको उनले सुनाए । जिल्लाका १० स्थानीय तहमध्ये कमलबजार नगरपालिका र तुर्माखाँद गाउँपालिकाले छाउगोठमुक्त घोषणा गरेका छन् । अरु सात स्थानीय तह पनि छाउगोठमुक्त घोषणाको अन्तिम चरणमा छन् । अछाममा हालसम्म ६ हजार छाउगोठ भत्काएको प्रहरीले जनाएको छ । फागुन मसान्तभित्र छाउगोठमुक्त जिल्ला घोषणाको तयारी गरिएको प्रमुख जिल्ला अधिकारी भोजराज श्रेष्ठले बताए । ‘गृह मन्त्रालयको परिपत्रपछि जिल्लामा अभियानले तीव्रता पाएको छ । अब जिल्लालाई नै छाउगोठमुक्त घोषणा गर्छौं,’ उनले भने ।

प्रकाशित : फाल्गुन १३, २०७६ ०९:३२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×