वडाध्यक्ष, सडक प्रमुख र प्रशासकीय अधिकृतविरुद्ध मुद्दा

अनिश तिवारी

सिन्धुपाल्चाेक — अख्तियार दुरुपयोग अनुसन्धान आयोगले सिन्धुपाल्चोक लिसंखुपाखर गाउँपालिका– ६ का वडाध्यक्ष कैलाश थापासहित ६ जना र सडक डिभिजन कार्यालय, मोरङका तत्कालीन कार्यालय प्रमुख (उपसचिव) जितेन्द्रकुमार चौधरीविरुद्ध विशेष अदालतमा भ्रष्टाचार मुद्दा दायर गरेको छ ।

आयोगले वडाध्यक्ष थापा र लिसंखुपाखर गाउँपालिकाका तत्कालीन प्रमुख प्रशासकीय अधिकृत निरञ्जन पाख्रिनसहितका कर्मचारीको मिलोमतोमा खानेपानी आयोजनाको रकम नक्कली बिल भर्पाइ बनाई भुक्तानी लिएर भ्रष्टाचार गरेकाले मुद्दा दायर गरिएको अख्तियारले जनाएको छ । मुद्दा दायर गरिएकामा थापा र पाख्रिनका अतिरिक्त तत्कालीन लेखापाल सुरेन्द्रबहादुर तितज, सब–इन्जिनियर लिलबहादुर पाण्डे गाउँपालिका–५ का बाबुलाल जोशी र दलबहादुर श्रेष्ठ छन् ।


उनीहरूले कुनै पनि कामै नगरी जिल्ला खानेपानी आयोजनामा किर्ते कागज बनाई रकम निकासा गरी खाएको अनुसन्धानबाट खुलेको अख्तियारको अभियोगपत्रमा उल्लेख छ । उनीहरूले पेट्कु खानेपानी र मायाखोला मुहान फरक–फरक आयोजनालाई एउटैमा समावेश भएको हो भनी स्वीकृत नभएको योजनालाई बजेट विनियोजन गरेर सरकारी अनुदान रकम हिनामिना गरेको आरोप छ ।


३५ लाख रुपैयाँ भ्रष्टाचार गरेको छानबिनबाट पुष्टि भएकाले सडक डिभिजन कार्यालय, मोरङका तत्कालीन प्रमुख चौधरीविरुद्ध मुद्दा दायर गरिएको अख्तियारले जनाएको छ ।


चौधरीले कार्यालय प्रमुख हुँदा ठेकेदार कम्पनी भूमि इन्फ्रास्ट्रक्चर प्रालिका सञ्चालकबाट सडक निर्माण आयोजनाहरूको काम सुरु गर्दा दिइने मोबिलाइजेसन रकमबाट ३५ लाख रुपैयाँ कमिसन लिई श्रीमतीको खातामा जम्मा गरेको अख्तियारको अभियोगपत्रमा उल्लेख छ । प्रकाशित : फाल्गुन ३, २०७६ १९:४१

ADVERTISEMENT
प्रतिक्रिया
पठाउनुहोस्
ADVERTISEMENT

विमानस्थलमा भएको आगलागीबाट ६ करोडको क्षति 

आगो सुरु भएको क्याफे सर्वोच्च अदालतको अन्तरिम आदेशमा ४ वर्षदेखि सञ्चालनमा
सुरज कुँवर

काठमाडौँ — त्रिभुवन अन्तर्राष्ट्रिय विमानस्थलको अन्तर्राष्ट्रिय टर्मिनल भवनभित्र सोमबार आगलागी भएको कफीसप सर्वोच्च अदालतको अन्तरिम आदेशकै भरमा ४ वर्षदेखि सञ्चालनमा रहेको देखिएको छ। 


विमानस्थलको कर्पोरेट महाशाखाका अनुसार, एयरपोर्ट टि कफी एन्ड कन्फेक्सनरी नामको उक्त पसलको ठेक्का अवधि ०७२ चैतमै सकिइसकेको थियो। तर, उक्त कफी सप सर्वोच्चको अन्तरिम आदेशमा चार वर्षदेखि सञ्चालनमा रहेको देखिएको छ। ‘मुद्दा किनारा नलागेकाले अझै कति चल्ने हो थाहा छैन,’ कर्पोरेटका एक अधिकारीले भने, ‘हाम्रो विमानस्थलभित्र अदालतको आदेशमा ७/८ वर्षदखि चलेका यस्ता थुप्रै पसल छन्। विमानस्थल व्यवस्थापन छ।’

अत्याधिक कारोबार हुने यो कफीसप ०६९ चैतमा अन्तर्राष्ट्रिय यात्रु प्रस्थान गर्ने स्थानमा वार्षिक ३४ लाख रुपैयाँ भाडा तिर्ने सर्तमा तीन वर्षकालागि लिएको सञ्चालनको अनुमति पाएको थियो। विमानस्थलले सार्वजनिक लेखा समितिलाई बुझाएको प्रतिवेदन अनुसार, यसको समयअवधि ०७२ चैतमा सकिसकेको छ। विमानस्थलको कर्पोरेटका ती कर्मचारीका अनुसार, त्यसभित्र भएका कफिसपमध्ये सर्वाधिक कारोबार हुने यो कफीसपका साझेदार सोनिगा सर्भिस नामले विमानस्थलभित्र अत्याधिक ठेक्का गर्ने सुवास श्रेष्ठ हुन्।

सोमबार साँझको उक्त कफीसपबाट सल्केको आगोबाट करिब ६ करोड रुपैयाँ बराबरको क्षति भएको अनुमान छ। विमानस्थलका महाप्रबन्धक देवेन्द्र केसीका अनुसार प्रारम्भिक अनुमानमा उक्त आगलागीबाट क्याफेका सञ्चालक गोपाल बाबु श्रेष्ठले टि कफी एन्ड कन्फेक्सनरीमामात्रै २ करोड रुपैयाँ बराबरको क्षति भएको दाबी गरेको बताए।

उनका अनुसार एक घन्टासम्म लागेको आगोबाट विमानस्थलको टर्मिनल भवनमा २ करोड रुपैयाँ बराबरको भौतिक पूर्वाधारमा क्षति पुगेको छ। त्यस्तै ६० लाख रुपैयाँको विद्युतिय उपकरण नष्ट भएको, ७५ लाख रुपैयाँ बराबरको सीसीटिभी क्यामरा लगायतका सुरक्षा उपकरण जलेको, २५ लाख रुपैयाँको रेडियो उपकरणमा क्षति पुगेको गरी करिब ६ करोड रुपैयाँ बराबरको क्षति भएको विमानस्थलले प्रारम्भिक अनुमान गरेको छ।

‘हाम्रो प्रारम्भिक अनुमान अनुसार ६ करोड रुपैयाँ बराबरको क्षति भएको आँकलन गरेका छौं,’ महाप्रबन्धक केसीले कान्तिपुरसँग भने। क्याफेबाट सुरु भएको आगलागीले विमानस्थलको प्रस्थानतर्फ रहेको स्टेरायल हलमा क्षति पुर्‍याएको छ। विमानस्थलको कर्पोरेट महाशाखाका एक अधिकारीले क्याफे बिना विमा सञ्चालन गर्न दिइएको बताए। उनका अनुसार आगलागीबाट भएको क्षतिको कतै पनि विमा सोधभर्ना हुने प्रावधान छैन। आगलागी लगत्तै संस्कृति पर्यटन तथा नागरिक उड्डयन मन्त्रालयका सचिव केदारबहादुर अधिकारीको अध्यक्षतामा बसेको बैठकले आगोबाट क्षतिग्रस्त बनेको प्रस्थान क्षेत्रमा तत्काल पुननिर्माण थाल्न निर्देशन दिएको थियो।

महाप्रबन्धक केसीले ३० घन्टापछि उक्त क्षेत्र पुन सञ्चालनमा ल्याएको बताए। हाल त्यस क्षेत्रको सरसफाइ पुननिर्माणको काम कुलेश्वरको सिनर्जी बिल्डर्सले गरीरहेको छ। उक्त ठेक्का कम्पनीका कामदारको भुक्तानी र सामान खरिद विमानस्थलले नै गर्ने भएको छ। सचिव अधिकारीको बैठकले खर्च पछि नागरिक उड्डयन प्राधिकरणबाट भराउने निर्णय गरेका छन्।

यसैबिच अगलागी भएको राति नै विमानस्थल सुचारु गराउन सकेको भन्दै त्यहाँ रहेका अन्तर्राष्ट्रिय वायुसेवाहरुको संस्था एयरलायन्स अपरेटर्स कमिटी नेपालले विमानस्थलका महाप्रबन्धक केसी र उनको टिमलाई शुक्रबार कदर गरेको थियो।
भिडियाे :

प्रकाशित : फाल्गुन ३, २०७६ १९:३६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×