जंगली हात्तीकाे आक्रमणबाट वृद्धकाे मृत्यु

रमेशकुमार पौडेल

चितवन — जंगली हात्तीले आक्रमण गर्दा पूर्वी चितवनमा एकजना वृद्धकाे ज्यान गएकाे छ । चितवन जिल्ला प्रहरी कार्यालयबाट प्राप्त जानकारी अनुसार शुक्रबार दिउँसाे एक बजे रत्ननगर-७  बद्रहनी बस्ने ९३ वर्षीय मनबहादुर तमाङलाई जंगली हात्तीले आक्रमण गरेकाे थियाे । उनकाे घटनास्थलमै ज्यान गएकाे प्रहरीले बताएकाे छ ।

ZenTravel

चितवन निकुञ्ज पूर्वी सेक्टर कार्यालउका प्रमुख गाेपालबहादुर घिमिरेका अनुसार ती वृद्ध भैंसी चराउन गाउँ नजिककाे खाेरसाेर जंगल गएका थिए ।

बद्रहनी गाउँ वन्यजन्तुबाट निकै प्रभावित हुने गाउँ हाे । त्याे क्षेत्रमा हात्ती प्रजनन् केन्द्र छ । राेनाल्डाे नाम गरेकाे जंगली भाले हात्ती त्याे क्षेत्रमा डुल्ने गर्दछ । अघिल्लाे महिना पश्चिम चितवन मेघाैली पुगेकाे साे हात्ती अहिले खाेरसाेर फर्केकाे छ । साेही राेनाल्डाेले नै तमाङलाई आक्रमण गरेकाे स्थानीयले बताए ।

Meroghar

प्रकाशित : फाल्गुन २, २०७६ १५:५५
प्रतिक्रिया
पठाउनुहोस्
ADVERTISEMENT
ADVERTISEMENT

नेपाल फर्कन चाहने विद्यार्थीहरुका लागि दूतावासले जारी गर्‍यो सूचना

कान्तिपुर संवाददाता

काठमाडौँ — चीनका लागि नेपाली राजदूतावासले नेपाल फर्कन चाहने विद्यार्थीहरुका लागि सूचना जारी गरेको छ । चीनस्थित नेपाली राजदूतावासले जारी गरेको सूचनामा विद्यार्थी फर्काउने प्रक्रिया अन्तिम चरणमा पुगेको उल्लेख छ ।

शनिबार नेपाल एयरलाइन्सको चार्टर्ड फ्लाइट ९ बजे वुहान विमानस्थलमा अवतरण हुनेछ। वुहानबाट यात्रुहरुलाई लिएर विमान ११ बजे (चिनियाँ समयअनुसार) उड्नेछ। र त्रिभुवन अन्तर्राष्ट्रिय विमानस्थलमा अवतरण हुनेछ। आइतबार बिहान २ बजेर १५ मिनेटमा काठमाडौंमा अवतरण हुनेछ।

विद्यार्थीहरुले के-के नियम पालना गर्नुपर्छ?

  • सबै विद्यार्थीलाई विश्‍वविद्यालयसँग समन्वय गर्न दूतावासले आग्रह गरेको छ। दूतावासले यसअघि १४ वटा विश्‍वविद्यालयलाई आधिकारिक पत्र पठाइसकेको छ। सबै विश्‍वविद्यालयले पर्सनल प्रोटेक्टिभ इक्युपमेन्टहरु उपलब्ध गराउने वाचा गरेका छन्।
  • त्यसैगरी यातायातका लागि दूतावासले सबैलाई जहाज उड्नुअघि ५ घण्टाअघि नै एयरपोर्टमा उपस्थित हुन जानकारी गराएको छ। बस ड्राइभरको नम्बर, फोन नम्बर, पिक अप टाइम बुझ्न सबै विद्यार्थीलाई दूतावासले आग्रह गरेको छ। यसका लागि विद्यार्थी स्वयंसेवकले सहयोग गर्नेछन्।
  • खाना र पानीका लागि आफूले नै प्याक गरेको खानेकुरा खाने र बोतलको पानी पनि आफै ल्याउनु पर्ने जनाएको छ। सकेसम्म बाहिरको खानेकुरा खाँदै नखान जोड दिएको छ।
  • दूतावासले विशेष उद्धार प्रक्रिया भएकाले लगेजमा २० केजीभन्दा बढी सामान नबोक्न विद्यार्थीहरुलाई आग्रह गरेको छ।
  • साथै दूतावासले तापक्रम देशअनुसार फरक पर्ने भन्दै केही सावधानी अपनाउन आग्रह गरेको छ। धेरै बाक्लो लुगाले शरीरको तापक्रम बढाउने भएकाले ठिक्कको लुगा लगाउन दूतावासले सुझाव दिएको छ। चस्मा, मास्क, पञ्जा, ह्यान्ड स्यानिटाइजर बोक्न भनिएको छ।केही समस्या परेमा स्वयंसेवकहरुको मद्दत लिन भनिएको छ।
  • विद्यार्थीहरु वुहान विमानस्थलमा हेल्थ स्टेटमेन्ट कार्ड अनिवार्य रुपमा भर्नुपर्नेछ। अध्यागमनले कार्ड संकलन गरी क्वारेन्टाइन प्रक्रियाको लागि पठाउनेछ। विद्यार्थीहरुले अध्यागमनमा खोकीको केही औषधि प्रयोग गरिँदैछ भने जानकारी गराउनुपर्छ।
  • मेडिकल टेस्टका कारण नेपाल फर्कन नपाएका विद्यार्थी आफ्‍नै विश्‍वविद्यालयमा फर्किनुपर्छ। यसका लागि विमानस्थलको काउन्टरमा फर्किनका लागि सम्पर्क गर्न सकिनेछ।
  • क्वारेन्टाइनका लागि स्वास्थ्य तथा जनसंख्या मन्त्रालयले खाने बस्न, सुरक्षा, सरसफाइ, खानको राम्रो प्रबन्ध गरेको दूतावासले जनाएको छ। अधिकारीहरुले जारी गरेको आदेश मजाले पालना गर्न दूतावासले आग्रह गरेको छ।
  • थप सम्पर्कका लागि दूतावासका यी नम्बर(+86-186 1408 4380, 156 5072 0069, 157 0128 5763 ) मा सम्पर्क गर्न विद्यार्थीलाई आग्रह गरेको छ।

प्रकाशित : फाल्गुन २, २०७६ १५:४८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×