लाङटाङमा १५ हजार पर्यटक- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

लाङटाङमा १५ हजार पर्यटक

बलराम घिमिरे

(रसुवा) — लाङटाङ क्षेत्रमा विदेशीभन्दा धेरै स्वदेशी पर्यटकले भ्रमण गरेका छन् । चालु आर्थिक वर्षको ६ महिनामा करिब १५ हजार पर्यटकले लाङटाङ क्षेत्रको भ्रमण गरेका छन् । यस अवधिमा ८ हजार ६ सय ५० स्वदेशी र सार्कसहित अन्य मुलुकबाट ६ हजार ३ सय ६ पर्यटक आएको लाङटाङ राष्ट्रिय निकुञ्जमा रेन्जर रमेश बस्नेतले बताए । 

आन्तरिक पर्यटकको आगमन निकै कमी हुने लाङटाङ र गोसाइँकुण्ड पदमार्ग दुई वर्षयता स्वदेशी पर्यटकको रोजाइमा पर्न थालेको छ । लाङटाङ राष्ट्रिय निकुञ्जले ०७५ असोज २९ देखि लाङटाङ र गोसाइँकुण्ड जाने स्वदेशी पर्यटकको तथ्यांक राख्न थालेको छ । स्वदेशी पर्यटकसँग प्रवेश शुल्क लिन थालेपछि तथ्यांक राख्न थालिएको निकुञ्जले बताएको छ । स्वदेशी पर्यटकले एक सय रुपैयाँ प्रवेश शुल्क तिर्नुपर्छ । यहाँ आउने पर्यटक पदयात्राका लागि लाङटाङ, गोसाइँकुण्ड र तामाङ सम्पदामार्ग जाने गर्छन् ।


रसुवामा पर्यटकका लागि तीन वटा पदमार्ग छन् । धुन्चे–गोसाइँकुण्ड हुँदै सिन्धुपाल्चोकको हेलम्बुसम्म गोसाइँकुण्ड पदमार्ग, स्याफ्रुबेँसी हुँदै लाङटाङसम्म लाङटाङ पदमार्ग र स्याफ्रुबेँसीदेखि गोल्जुङ, गत्लाङ, चिलिमे, थुमन, टिमुरे, बृदिम हुँदै स्याफ्रुबेँसीसम्म तामाङ सम्पदा मार्ग छन् । यस क्षेत्रमा आउने पर्यटकले गणेश तथा लाङटाङ हिमालको मनोरम दृश्य, निकुञ्ज क्षेत्रभित्रका जैविक विविधता, रामसार साइटमा सूचीकृत धार्मिक तीर्थस्थल गोसाइँकुण्ड, तामाङ सम्पदामार्गमा रहेको तामाङ कला र संस्कृति अवलोकन गर्छन् ।


लाङटाङ राष्ट्रिय निकुञ्जमा विश्वमै दुर्लभ वन्यजन्तु रेडपान्डा, हिमचितुवा र कस्तुरीमृग लगायतका जीवजन्तु पाइन्छ । लाङटाङ पदमार्गमा यस वर्ष धेरै स्वदेशी पर्यटक घुम्न आएको घोडातबेलाका होटल व्यवसायी ढिण्डुप तामाङले बताए । अफ सिजन भए पनि अहिले निकुञ्जको ब्राबल चेक प्वाइन्टबाट दैनिक १० देखि १५ जना विदेशी तथा स्वदेशी पर्यटक प्रवेश गर्ने गरेका छन् । यो सिजनमा कोरियन पर्यटक घुम्नका लागि आउने गरेको लाङटाङका पर्यटन व्यवसायी तेम्बा लामाले बताए । सार्क मुलुकलगायत रसुवामा अस्ट्रेलिया, क्यानडा, इजरायल, फ्रान्स, जर्मन, जापान, अमेरिका, कोरिया, बेलायतका पर्यटक आउने गरेका छन् ।

प्रकाशित : माघ १७, २०७६ ०७:५६
प्रतिक्रिया
पठाउनुहोस्

शर्माको फाइल अख्तियारबाट गायब

कान्तिपुर संवाददाता

काठमाडौँ — सर्वोच्च अदालतबाटै भ्रष्टाचारी ठहर नेपाल आयल निगमका पूर्वमहाप्रबन्धक युवराज शर्माको भ्रष्टाचार मुद्दाको मिसिल अख्तियार दुरुपयोग अनुसन्धान आयोगबाट ‘गायब’ भएको खुलेको छ । 

अख्तियारले पटकपटक ‘मिसिल नभेटिएको’ जवाफ लेखेपछि सर्वोच्चले १५ दिनभित्र मिसिलसहित उपस्थित हुन अख्तियारका सचिवको नाममा आदेश दिएको छ । सर्वोच्चले कारबाहीको चेतावनी दिँदै अख्तियारका सचिव महेश्वर न्यौपानेलाई अभिलेख खोजेर फाइलसहित १५ दिनभित्र उपस्थित हुन आदेश दिएको हो । यसअघि गत जेठमा पनि विशेष अदालतबाट भ्रष्टाचारी ठहर पूर्वमन्त्री गोविन्दराज जोशीको फाइल नभेटिएपछि सर्वोच्चले यस्तै आदेश दिएको थियो । अहिले पनि सर्वोच्चमा विचाराधीन उक्त मुद्दाको फाइल भेटिएको छैन ।

सर्वोच्चबाटै भ्रष्टाचारी ठहर भए पनि ‘फैसलामा कैफियत हुन सक्ने’ भन्दै शर्माको मुद्दा पुनरावलोकनका लागि अनुमति भएको थियो । ‘यसलाई जिम्मेवारपूर्ण कामकारबाही मान्न मिल्ने देखिँदैन,’ न्यायाधीशहरू मीरा खड्का, ईश्वरप्रसाद खतिवडा र सुष्मालता माथेमाको पूर्ण इजलासले बिहीबार दिएको आदेशमा भनिएको छ, ‘सामान्य प्राविधिक कारण देखाई अदालतबाट माग गरिएको मुद्दासँग सम्बन्धित अभिलेख पेस गर्न आलटाल गर्ने र जिम्मेवारीबाट पन्छिन खोज्ने प्रवृत्तिलाई उचित ठान्न सकिँदैन ।’

सर्वोच्चले २०७५ कात्तिक ८ मा युवराज शर्मामाथि भ्रष्टाचार मुद्दा दायर गर्दाको अवस्थामा अनुसन्धान अधिकृत तोकिएको निर्णयको फाइल मगाएको थियो । अख्तियारले २०७५ मंसिर २३ मा फाइल नभेटिएको जवाफ दियो ।

सर्वोच्चले २०७५ फागुन २३ मा फेरि पत्र पठायो । अनि अख्तियारले ०७६ असार ३० मा निर्णयको कागज फेला नपरेको भनी जवाफ दियो । अख्तियारले बिहीबार मुद्दाको पेसीको दिन सचिव स्वयंलाई निर्णय, फाइल र अभिलेख लिई इजलासमा उपस्थित हुन आदेश गरेको हो । एक अन्तर्वार्ताका क्रममा तत्कालीन प्रधानन्यायाधीश सुशीला कार्कीले केही भ्रष्टाचार मुद्दाको पेसी योजनाबद्ध रूपमा सारिएको र त्यसमा अदालतकै कतिपय कर्मचारीको मिलेमतो रहेको प्रतिक्रिया दिएकी थिइन् । पुनरावलोकनको अनुमतिपछि २०७१ सालमा दर्ता भएको मुद्दा २४ पटक विभिन्न कारणले स्थगित भइसकेको छ ।

अख्तियारका एक उच्च अधिकारीका अनुसार विभिन्न भ्रष्टाचारको उजुरी फरक–फरक गर्न अनुसन्धान अधिकृत तोक्ने टिप्पणीको फाइल हराएकाले समस्या भएको हो । ‘गोविन्दराज जोशी र युवराज शर्माको टिप्पणीको फाइल सायद एउटै हो,’ अख्तियार स्रोतले भन्यो, ‘त्यो हराएकैले यसको पनि हराएको हो । हामी फेरि खोजेर जे भेटिन्छ, त्यही पठाउँछौं ।’ संयोग कस्तो छ भने भ्रष्टाचारको आरोप लागेका व्यक्तिका कानुन व्यवसायीहरूले नभेटिएकै फाइल मगाउनुपर्ने विषयलाई बहसमा प्राथमिकता दिइरहेका छन् ।

२०६९ पुस २५ मा तत्कालीन प्रधानन्यायाधीश खिलराज रेग्मी र न्यायाधीश सुशीला कार्कीको इजलासबाट शर्मा भ्रष्टाचारी ठहर भएका थिए । उनले ५३ लाख ९९ हजार गैरकानुनी आर्जन गरेको ठहरसहित एक वर्ष कैद र त्यति नै रकम जरिवानाको फैसला भएको थियो ।

प्रकाशित : माघ १७, २०७६ ०७:५२
पूरा पढ्नुहोस्
प्रतिक्रिया
पठाउनुहोस्
×