पुजारीको घरबाट मूर्ति चोरी

कान्तिपुर संवाददाता

काठमाडौँ — साँखुस्थित पुजारीको घरबाट सुनको जलप लगाइएको ज्योतिलिंगेश्वर महादेवको चतुर्मुखी मूर्ति चोरी भएको छ । ज्योतिलिंगेश्वर महादेव मन्दिरका पुजारी सुधनराज उपाध्यायको घरबाट ढलोटको साढे दुई फिटको मूर्ति आइतबार राति हराएको हो ।

ZenTravel

प्रहरीले माधवनारायण तथा स्वस्थानी व्रत मेलामा हुन सक्ने चोरी, डकैती र पाकेटमारका घटनालाई ध्यानमा राखेर सुरक्षा व्यवस्था चुस्त बनाएको भनिरहेका बेला मूर्ति चोरिएको हो । शिवरात्रि र जनैपूर्णिमाको एक दिनअघि शंखरापुर नगरपालिका–७ स्थित ज्योतिलिंगेश्वर मन्दिरमा उक्त चतुर्मुखी मूर्ति प्रतिस्थापन गर्ने चलन छ । जनैपूर्णिमामा खटमा राखेर सांस्कृतिक बाजागाजासहित जात्रा गर्दै नगर परिक्रमा गरिन्छ ।

Meroghar

शालीनदीमा हुने भीडलाई ध्यानमा राखेर शालीनदी सुधार समितिले सामुदायिक प्रहरी सेवा केन्द्र र महानगरीय प्रहरी प्रभाग साँखुअर्न्तगत विषेश टोली परिचालन गर्ने निर्णय गरेको थियो । प्रहरी प्रभाग साँखु र मूर्ति राखिएको स्थान करिब पाँच सय मिटरको दुरीमा पर्छ । पुजारी उपाध्यायले भाडामा बसेका व्रतालु आउजाउ भइरहने भएकाले घरको मूलढोकामा ताला नलगाउँदा घटना भएको बताए ।

प्रहरीका अनुसार चोरी भएको मूर्ति साढे तीनतले घरको पहिलो तलामा राखिएको थियो । घर कम्पाउन्डले घेरिएको छ । उत्तर र पूर्वतर्फ खेत छ । महानगरीय प्रहरी प्रभाग साँखुका प्रहरी निरीक्षक गोविन्द पन्थीले खेतबाट कम्पाउन्डभित्र पसेका व्यक्तिले चोरी गरेको हुन सक्ने बताए । ‘घटना राति १/२ बजे भएको देखिन्छ,’ उनले भने, ‘शंकास्पद तीन जनालाई नियन्त्रणमा लिएर अनुसन्धान गरिरहेका छौं ।’ थप अनुसन्धान गर्न अपराध महाशाखाबाट सात जनाको टोलीसमेत खटिएको उनले बताए ।

स्वस्थानी व्रत पुस २५ गतेदेखि सुरु भएको हो । व्रतका क्रममा माधवनारायणको मूर्ति पशुपति, फर्पिङ, पनौती र चाँगुनारायण लैजाने परम्परा छ । प्रहरी निरीक्षक पन्थीले माधवनारायणको मूर्तिको विषेश सुरक्षा दिँदै आएको बताए । ‘चोरी भएको मूर्ति त्यहाँ थियो भन्नेबारे प्रहरीलाई कुनै जानकारी थिएन,’ उनले भने, ‘घटनाबारे जानकारी आइसकेको छ । चोरीमा संलग्न व्यक्तिको खोजी गरिरहेका छौं ।’

प्रकाशित : माघ १४, २०७६ ०७:२३
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

‘ट्रम्पका पूर्वराष्ट्रिय सुरक्षा सल्लाहकार बोल्टनको बयान लिनुपर्छ’

एजेन्सी

वासिङ्टन — अमेरिकी राष्ट्रपति डोनाल्ड ट्रम्पमाथिको महाअभियोग सुनुवाइमा उनका पूर्वराष्ट्रिय सुरक्षा सल्लाहकार जोन बोल्टनसँग बयान लिन डेमोक्र्याट सांसदले पुनः माग गरेका छन् । राजनीतिक प्रतिद्वन्द्वी जो बाइडनविरुद्ध अनुसन्धान नगरे युक्रेनलाई दिँदै आएको सहयोग रोक्ने चेतावनी ट्रम्पले दिएको दाबी बोल्टनले गर्दै आएका छन् । 

राष्ट्रिय सुरक्षा सल्लाहकारको जिम्मेवारीमै रहँदा बोल्टन गत सेप्टेम्बरमा बर्खास्तीमा परेका थिए । आफूले युक्रेनलाई कुनै दबाब नदिएको ट्रम्पले बताउँदैआएका छन् ।

बोल्टनको दाबी ट्रम्पका वकिलहरूका लागि भने चुनौती हुन सक्छ । गत साता सञ्चारकर्मीसँगको कुराकानीमा राष्ट्रिय सुरक्षाको विषय देखाउँदै ट्रम्पले बोल्टनसँग बयान नलिइयोस् भन्ने चाहना व्यक्त गरेका थिए ।

ट्रम्पमाथि आफ्ना राजनीतिक प्रतिद्वन्द्वी बाइडन र उनका छोरा हन्टरविरुद्ध भ्रष्टाचार अनुसन्धान गर्न युक्रेनी राष्ट्रपति भोलोदिमिर जेलेन्स्कीलाई दबाब दिएको आरोप छ । यदि अनुसन्धान नगरिए अमेरिकी सैन्य सहायता रोक्ने चेतावनी दिएको भन्ने विषयमा उनीविरुद्ध अमेरिकाको माथिल्लो सदन सिनेटमा महाअभियोग सुनुवाइ चलिरहेको छ ।

उपल्लो सदन सिनेटमा ट्रम्पकै रिपब्लिकन दलको बहुमत रहेकाले महाभियोग पास हुने सम्भावना छैन । अमेरिकी इतिहासमा महाअभियोग सुनुवाइको सामना गर्ने ट्रम्प तेस्रो राष्ट्रपति हुन् । उनीविरुद्ध तल्लो सदन ‘हाउस अफ रिप्रिजेन्टेटिभ्स’मा महाअभियोग प्रस्ताव पारित भइसकेको छ ।

प्रकाशित : माघ १४, २०७६ ०७:२३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×