भिआइपीको भिडमा गैंडा [तस्बिरहरुसहित]- वाग्मती - कान्तिपुर समाचार

भिआइपीको भिडमा गैंडा [तस्बिरहरुसहित]

रमेशकुमार पौडेल

चितवन — वागमती प्रदेशका पर्यटकीय स्थलहरु घुम्न काठमाडौंबाट निस्केका राजदूत र अन्य अधिकारीहरुको टोली सोमबार मध्यान्ह सौराहा आइपुग्यो । १२ भन्दा बढी देशका राजदूत आउने भनिए पनि तोकिएको समयभित्र सौराहामा नेपालका लागि मलेसिया र श्रीलंकाका राजदूत मात्रै आए । राजदूतहरुसहित भ्रमण वर्षका राष्ट्रिय संयोजक सुरज वैद्य, रत्ननर नरपालिकाका मेयर नारायण वनसहितको टोली निकुञ्ज घुम्न जाँदै थिए ।


चितवन निकुञ्ज दुर्लभ वन्यजन्तु ठूलो एकसिंगे गैंडाको मुख्य बासस्थल हो । निकुञ्ज घुम्दा यो जनावर देख्न पाइन्छ । जीप सफारी गरेर निकुञ्ज जान लागेका पाहुना टोली जब होटलबाट निस्कँदै थिए बारीमा चर्दै गरेको गैंडा नै देखियो । गैंडा बिस्तारै विशिष्ट व्यक्तिहरु भएतर्फ नै आयो । यो गैंडा जंगल नबसेर प्राय सौराहा नजिकका खेत र गल्लीहरुमा नै डुल्ने गर्दछ । यो खासै आक्रमक पनि हुँदैन ।


स्वभाव बुझेका कारण रत्ननगर नगरपालिकाका मेयर नारायण वन गैंडाको आडैमा गएर फोटो खिचाए । त्यसपछि पाहुना टोली पनि फोटो खिच्न हौसियो । श्रीलंकन राजदूतले अलि परबाटै फोटो खिचिन् । मेलेसियन राजदूतले केही नजिक गएर सेल्फी लिए । बालबच्चा र नगर प्रमुखलाई आडैमा राखेर फोटो पनि खिचे । नेपाल भ्रमण वर्षका संयोजक सुरज वैद्य झनै उत्साहित देखिए ।


उनले गैंडालाई ढाडमा मुसार्दै तस्बिर खिच्न थाले । अन्य व्यक्तिहरु पनि नजिक नजिक गएर तस्बिर लिन थाले । विशिष्ट व्यक्तिहरुलाई जीप सफारीमा जान हतार थियो । केही बेरपछि उनीहरु निकुञ्जतर्फ सोझिए । गैंडा पनि बिस्तारै आफ्नो बाटो लाग्यो।


सौराहामा यसरी बजार, वस्ती र खेतमा डुल्ने दुईवटा गैंडा छन् । एउटा गैंडा त निकै आक्रमक छ । कम आक्रमक मानिएको गैंडा पनि बेला बेलामा रिसाउने सौराहाका बासिन्दा बताउँछन् । तर गैंडा देखेपछि जोपनि नजिकै गएर फोटो खिच्न हुरुक्कै हुन्छन् ।

प्रकाशित : माघ १३, २०७६ १८:०४
प्रतिक्रिया
पठाउनुहोस्

प्रधानमन्त्रीले शुभारम्भ गरे सीमा नियमन प्रणाली

कान्तिपुर संवाददाता

काठमाडौँ — प्रधानमन्त्री केपी शर्मा ओलीले ‘नेपाली पोर्ट’ नामक अध्यागमन व्यवस्थापन तथा सीमा नियमन प्रणालीको शुभारम्भ गरेका छन् । प्रधानमन्त्री तथा मन्त्रिपरिषद्को कार्यालय सिंहदरबारबाट सोमबार प्रधानमन्त्री ओलीले ‘नेपाली पोर्ट’ को शुभारम्भ गरेका हुन् । 

अध्यागमनको सूचनाको सुरक्षा संवेदनशीलतालाई मध्यनजर गर्दै नेपालमै उपलब्ध विज्ञ र विभागका प्राविधिकहरुको टोलीले १ वर्ष लगाएर ‘नेपाली पोर्ट’ नामक प्रणालीको विकास गरेका हुन् । नेपाली पोर्टको विकासपछि नेपाली भिसाको दुरुपयोग तथा राजस्व चुहावटको सम्भावना अन्त्य हुने विश्वास अध्यागमन विभागले लिएको छ ।

नेपाल प्रवेश गर्ने र बाहिरीने सबै विदेशीहरुको बायोमेट्रिक इन्फरमेसन, इरिस, फिङ्गर प्रिन्ट र फोटोसमेत प्रणालीमा रहने छ । यही प्रणालीबाट राहदानी विभागबाट जारी हुने राहदानी, बैदेशीक रोजगार विभागबाट जारी हुने श्रम स्वीकृति, शिक्षामन्त्रालयले जारी गर्ने एओसी र इन्टरपोल सम्वद्ध सूचनाहरु हेर्न मिल्ने गरी व्यवस्था समेत मिलाइएको छ ।

भिसा आवेदन, विदेशी नागरिकको नेपाल बसाइको अनुगमन र भिसा दस्तुर तिर्न समेत सहज हुने विश्वास विभागको छ । विमानस्थलमा शंकास्पद कागजातको पहिचानका लागि अत्याधुनिक उपकरण सहितको फरेन्सिक डिटेक्सन ल्याबको समेत स्थापना गरिएको छ ।

अध्यागमन सुधार कार्यक्रम अन्तर्गत करिब २२ करोड खर्च हुने अनुमान गरिएकोमा अहिलेसम्म १६ करोड खर्च भएको छ ।

प्रकाशित : माघ १३, २०७६ १७:४७
पूरा पढ्नुहोस्
प्रतिक्रिया
पठाउनुहोस्
×