डीपीआरले रोकियो एकीकृत बस्ती निर्माण

रामेछापको सबैभन्दा बढी प्रभावित मन्थली नगरपालिकाको गाईखुरा माझी बस्तीमा एकीकृत बस्ती निर्माण गर्ने राष्ट्रिय पुनर्निर्माण प्राधिकरणको ०७५ भदौ १७ को निर्णय कार्यान्वयन नभइरहेका बेला ०७५ पुस २० मा गुन्साल र दुरागाउँ एकीकृत बस्ती विकास गर्ने निर्णय गरिएको थियो । प्राधिकरणले एकीकृत बस्ती स्वीकृत गरे पनि त्यसको विकासका लागि आवश्यक जनशक्ति जिल्लामा नपठाएका कारण योजनाको काम अघि बढ्न नसकेको हो ।

प्राधिकरणले उक्त तीन वटै एकीकृत बस्तीको डीपीआर बनाएर पठाउन जिल्ला आयोजना कार्यान्वयन इकाइ (भवन) मा भनेको । तर उक्त कार्यालयमा दरबन्दी बमोजिमको प्राविधिक नहुँदा काम अघि बढेको छैन । आयोजना प्रमुख बीरवहादुर रावलका अनुसार प्राधिकरण र केन्द्रीय आयोजना कार्यान्वयन इकाइमा एकीकृत बस्तीको डीपीआर बनाउन जनशक्ति माग गरिएको छ । ‘जनशक्ति पठाए हामी चाँडै डीपीआर तयार पारेर कार्यान्वयनका लागि पठाउछौं,’ रावलले भने, ‘अहिलेकै जनशक्तिले उक्त कार्य सम्भव छैन ।’ गैरसरकारी संस्थाको सहयोगमा दुरागाउँ र गुन्सालको डीपीआर बनाउन थालिए पनि पूरा हुन सकेको छैन ।

एकीकृत बस्ती निर्माण हुने गाईखुरामा पीडितहरूले आफूखुसी घर बनाएका छन । एकीकृत बस्तीमा आवासका अतिरिक्त अन्य विकासका पूर्वाधारसमेत निर्माण गर्नुपर्ने हुन्छ । गुन्सीको गुन्सालमा स्थानीय सेतियुवा क्लबको अगुवाइमा अघि सारिएको ३५ परिवारको एकीकृत बस्ती भने लगानीको अभावमा अलपत्र छ । ‘थोरै काम गरेका छौं, पूर्वाधारको काममा भने हातै हालिएको छैन,’ स्थानीय प्रज्वल श्रेष्ठले भने । दोरम्बा गाउँपालिकाले उक्त बस्ती निर्माणका लागि न्यूनतम लगानी गर्ने योजना अघि सारेको छ ।