सभामुख–सांसद जुहारी- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

सभामुख–सांसद जुहारी

कान्तिपुर संवाददाता

काभ्रे — प्रदेश ३ को सामाजिक विकास मन्त्रालयले मंगलबार गरेको लैंगिक हिंसाविरुद्धको १६ दिने अभियान समापन कार्यक्रममा सभाभुख सानुकुमार श्रेष्ठ र प्रदेशसभा सदस्यबीच जुहारी चलेको छ । लामो समय प्रदेशसभा बैठक नबोलाएको भन्दै कडा व्यंग्य प्रहार गरेका उनीहरूले सभाुमखलाई र्‍याखर्‍याख्ती पारे । 

सांसद मीना ज्ञवालीले प्रदेशसभा बैठक नै नबोलाएका कारण यस्तै कार्यक्रममा आफ्ना कुरा राख्नुपर्ने भन्दै व्यंग गरिन् । ‘संसद्‌मा कुरा राख्न त तपाईंले बैठक नै राख्नुभएन,’ उनले भनिन्, ‘आफ्ना कुरा यहीँ त राख्ने होला नि ।’ भदौ २५ गते संसद्को चौथो अधिवेशन अन्त्य भएको घोषणा भएदेखि अर्को बैठक आह्वान भएको छैन । सांसद राजकाजी महर्जनले प्रदेश राजधानीबारे अर्को बैठकमा निर्णय हुन्छ कि हुँदैन भनेर सभामुखलाई प्रश्न गरे ।


सभामुख श्रेष्ठले पनि खुलेरै आफ्ना कुरा राखे । ‘संसद् नबोलाएकाले म पनि यतै मन खोलेर बोल्नुपर्‍यो, यति सुन्दर र रमणीय स्थान रहेछ धुलिखेल, अझ यहाँ यत्रो राम्रो हल रहेछ, वातावरण पनि उत्तिकै राम्रो,’ उनले भने, ‘यस्तो राम्रो व्यवस्थापन रहेछ, अवसर जुटाइदिएकोमा सामाजिक विकास मन्त्रालयलाई धन्यवाद ।’ सभामुख श्रेष्ठले बोलेलगत्तै सांसदहरूले अब बोलाउने बैठकमा राजधानी धुलिखेल राख्ने विषय टुंगिन्छ त भन्दै थप प्रश्न गरे ।


मुख्यमन्त्री डोरमणि पौडेल अर्को बैठकमा राजधानीको विषय टुंग्याउने बताएका थिए तर मिति तोक्न सकिएको छैन । संसदीय दलमा राजधानीको विषयमा सहमति नभएको कारण देखाउँदै आलटाल हुँदै आएको छ । राजधानी सम्भाव्यता अध्ययन समितिले काभ्रे, चितवन, नुवाकोट, भक्तपुर र मकवानपुर उपयुक्त हुने भन्दै सिफारिस गरे पनि प्रक्रियामा लगिएको छैन ।


प्रकाशित : मंसिर २५, २०७६ १०:०२
प्रतिक्रिया
पठाउनुहोस्

सडकमा माग्न नपाइने

कान्तिपुर संवाददाता

काठमाडौँ — काठमाडौंका सडकमा अब भिक्षा माग्न नपाइने भएको छ । काठमाडौं महानगरपालिको मंगलबार सूचना जारी गर्दै यस्तो निर्णय गरेको हो । सार्वजनिक स्थानमा हातखुट्टा भाँचिएका, बेसहारा, मिर्गौलापीडित, दृष्टिविहीनलगायतले पैदलयात्रुसँग पैसा मागेर दु:ख दिने गरेका थिए । 

बाध्यता तथा पेसा बनाई भिक्षा माग्न बस्नेहरूलाई हट्न लगाउने र अटेर गरे कारबाही गर्ने महानगरपालिकाले जनाएको छ । तीनदिने सूचनाको म्याद सकिएपछि पहिलो चरणमा सडकमा रहेका बेवारिसे, मनोरोगी तथा असहायको उद्धार गरी बालाजुस्थित स्क्रिनिङ सेन्टरमा लैजाने र तथ्यांक सकंलन गर्ने महानगरपालिकाका सूचना अधिकारी वसन्त आचार्यले बताए ।

‘सेन्टरमा लागि त्यस्ता व्यक्तिहरूको पालनपोषण, औषधोपचार गर्ने र घर पहिचान भएकालाई परिवारमा पुनर्मिलन गराइनेछ,’ उनले भने, ‘त्यसपश्चात् आर्थिक अवस्था कमजोर भएका तर विभिन्न रोगबाट पीडितको उपचारसहित आधारभूत आवश्यकता पूरा गरिनेछ ।’ सडकमा बेसहारा अवस्थामा बालबालिका भेटिएमा उनीहरूलाई नि:शुल्क खानाबस्न तथा शिक्षाको व्यवस्था गर्ने महानगरपालिकाले जनाएको छ । मुलुकी अपराध संहिता २०७४ ले सडक, गल्ली, पार्क, सवारी बिसौनीस्थल, सरकारी कार्यालय वा कार्यालय परिसर र सार्वजनिक सवारीसाधनमा भिक्षा माग्न वा माग्न लगाउन नहुने व्यवस्था गरेको छ ।

यसरी माग्नेलाई दुई महिनासम्म कैद र दुई हजारसम्म जरिवाना तथा माग्न लगाउनेलाई तीन वर्षसम्म कैद र ३० हजारसम्म जरिवाना हुने कानुनी प्रावधान छ । महानगरपालिकाले २५औं महानगर दिवसको अवसरमा मंसिर २९ गते ‘सहयोगापेक्षी सडक मानवमुक्त महानगर’ घोषणा गर्ने तयारी गरेको छ ।

प्रकाशित : मंसिर २५, २०७६ १०:०१
पूरा पढ्नुहोस्
प्रतिक्रिया
पठाउनुहोस्
×