कान्तिपुर वेबसाईट
AdvertisementAdvertisement

तीन अर्ब ठग्ने योजना असफल

कान्तिपुर संवाददाता

काठमाडौं — नक्कली पत्थर देखाएर करिब तीन अर्ब रुपैयाँ ठगी गर्ने गिरोहको योजना असफल भएको छ  । सर्वसाधारण र व्यापारीलाई बहुमूल्य पत्थर भन्दै ठगी गर्ने गिरोहका पाँचजनालाई नेपाल प्रहरीको महानगरीय अपराध महाशाखाको टोलीले करिब एक लाख मूल्य पर्ने पत्थरजन्य वस्तुसहित काभ्रेको पनौतीबाट पक्राउ गरेको हो  ।

काभ्रे बेथानचोकका नवराज खड्का, झापाका हरि खापुङ र यमकुमार गिरी, मोरङका लोकबहादुर सार्की र रौतहटका भीमबहादुर लामा पक्राउ परेका हुन् ।

‘बिहीबार बिहान गैरकानुनी रूपमा बहुमूल्य पत्थर बिक्री गर्ने समूह सक्रिय रहेको भन्दै प्रहरीलाई सूचना आएको थियो,’ महाशाखा प्रमुख एसएसपी सहकुल थापाले कान्तिपुरसँग भने, ‘त्यसपछि मध्याह्न १२ बजेतिरबाट गिरोहसँग व्यापारी बनेर हामीले खरिद गर्ने बहानामा डिल गर्न थाल्यौं ।’

व्यापारी बनेर गिरोहसम्म सम्पर्क बनाएपछि महाशाखाले एसपी ईश्वर कार्कीको नेतृत्वमा हतियारसहित सादा पोसाकका प्रहरीलाई ‘पत्थर खरिदकर्ता’ बनेर काभ्रे पठायो । गिरोहले पत्थर किन्न डिल गर्ने समूहलाई पनौती बोलाएको थियो । गिरोहले मोजनाइट, काइनेटिक, ब्ल्याकस्टोन, ग्रिन डायमन्ड, एलबी डायमन्ड, फेन्सी डायमन्ड, पुष्पराज, नीलम, लसुनिया, रुवी लगायतका पत्थर रहेको जानकारी दिएको थियो । सोहीअनुसार ‘शो मनी’ (अनुसन्धानका क्रममा आपराधिक तथा गैरकानुनी गतिविधिमा संलग्न व्यक्तिलाई लोभमा पार्न देखाइने पैसा) सहित प्रहरी गिरोह नियन्त्रणका लागि काभ्रे प्रस्थान गर्‍यो ।

व्यापारी बनेर पुगेको प्रहरीले सुरुमा पत्थर हेर्ने भन्दै प्रस्ताव गरेपछि नक्कली सामान देखाइएको थियो । गिरोह र सामानमा पहुँच पुगेलगत्तै प्रहरीले बिहीबार साँझ ६ बजे हतियार देखाएर उनीहरूलाई नियन्त्रणमा लिएको हो । उनीहरूको साथबाट एक केजी एक सय २३ ग्राम नक्कली पत्थर र पहेँलो धातुमा जडित ८.९३ ग्रामका औंठीसमेत बरामद भएको छ । प्रहरीका अनुसार उक्त पत्थर सक्कली भएको भए त्यसको मूल्य तीन अर्बभन्दा बढी पर्ने थियो ।

प्रकाशित : मंसिर १५, २०७६ १०:१०
प्रतिक्रिया
पठाउनुहोस्

बर्सेनि ज्यान गुमाउँछन् ६८ पैदलयात्रु

कान्तिपुर संवाददाता

काठमाडौं — उपत्यकामा पैदलयात्रु निकै जोखिममा छन्  । सवारी दुर्घटनामा बर्सेनि औसत ६८ पैदलयात्रुले ज्यान गुमाउने गरेको तथ्यांक छ  ।

काठमाडौं उपत्यकामा पैदलयात्रु निकै जोखिममा छन् । सवारी दुर्घटनामा बर्सेनि औसत ६८ पैदलयात्रुले ज्यान गुमाउने गरेको तथ्यांक छ । पछिल्लो दुई वर्षयता सवारी दुर्घटनामा मोटरसाइकल र स्कुटर चालकपछि मृत्यु हुनेमा पैदलयात्रु छन् । ०७४ मा एक सय ९४ दुर्घटनामा पैदलयात्रु ९३, मोटरसाइकल र स्कुटर चालक एक सय ११, ट्रक चालक र यात्रु चार, साइकलयात्रु तीन, बसका चालक र यात्रु आठ र कारका चालक चार जना छन् । गतवर्ष पनि दुई सय ९४ जनाको मृत्यु भएकोमा मोटरसाइकल र स्कुटरका एक सय १५ जना र पैदलयात्रु ९३ जनाले दुर्घटनामा ज्यान गुमाएका छन् । मृत्यु हुने पैदलयात्रुमध्ये जेब्रा क्रसमा बाटो काट्ने र सडकमा हिँड्ने यात्रु रहेको ट्राफिक प्रहरी महाशाखाले जनाएको छ ।

उपत्यकामा कतिले ज्यान गुमाए ?

वर्ष मृतक पैदलयात्रु
२०७० ५३
२०७१ ५७
२०७२ ६५
२०७३ ७९
२०७४ ६३
२०७५ ९३
स्रोत ः ट्राफिक प्रहरी महाशाखा

प्रकाशित : मंसिर १५, २०७६ १०:१०
पूरा पढ्नुहोस्
प्रतिक्रिया
पठाउनुहोस्
×