हेलिकप्टर लिएर आउँछन् पर्यटक

रमेशकुमार पौडेल

चितवन — पूर्वअर्थमन्त्री सुरेन्द्र पाण्डे गत भदौ १२ गते सौराहाको एक कार्यक्रमका प्रमुख अतिथि थिए । सौराहामा गुणस्तरीय पर्यटक बढाउनुपर्ने जोड दिँदै उनले भने, ‘मेघौलीमा रहेको बराही जंगल लजमा एकजना पर्यटक हेलिकप्टर चढेर आएछन् । जंगलमा बाघ देखेपछि हौसिएका उनले कर्मचारीलाई राम्रै टिप्स दिए । होटलले पनि गज्जबकै आम्दानी गर्‍यो ।’

उनले हेलिकप्टरको प्रसंग यत्तिकै जोडेका थिएनन् । बाराही जंगल लजमा कात्तिक ११ गते मात्रै ६ वटा हेलिकप्टर आएका थिए । ‘यहाँ बस्न हेलिकप्टर नैचढेर आउने पर्यटकको चाप छ,’ लजका सञ्चालक विप्लव पौडेलले भने ।

चितवन सदरमुकाम भरतपुरदेखि करिब ३० किलोमिटर पश्चिममा छ, मेघौलीको होटल बराही । आडैमा ताज ग्रुपसमेत संलग्न चौधरी समूहले चलाएको होटल मेघौली सेराई पनि छ । यी दुई होटलमा हेलिकप्टर चढेर आउने पर्यटकको संख्या उल्लेख्य छ । ‘तिहारका बेला एकैदिन ६ वटा हेलिकप्टर आए,’ पौडेल भन्छन्, ‘सधैं त यस्तो हुँदैन, औसतमा पर्यटकीय याममा महिनामा १० वटासम्म हेलिकप्टर आउँछन् ।’

मेघौली चितवनको निकै पुरानो पर्यटकीय क्षेत्र हो । बाघ, गैंडाजस्ता दुर्लभ वन्यजन्तु रहेको चितवन निकुञ्ज घुम्नका लागि यहाँ देश–विदेशबाट लाखौं पर्यटक आउने गर्छन् । मेघौली सेराईका जनसम्पर्क अधिकारी बृजकुमार महतोले भने, ‘पर्यटकीय याममा दिन बिराएर एउटा हेलिकप्टर आएकै हुन्छ ।’ प्रमुख पर्यटकीय गन्तव्य बनेको चितवन निकुञ्ज ०३० सालमा स्थापना भएको हो । मेघौली नजिक ०२२ सालमा नै बेलायती नागरिक जिम एडवर्डले पर्यटकीय होटल टाइगर टप्स जंगल लज खोलेका थिए । निकुञ्ज खुल्नुभन्दा आठ वर्ष पहिल्यै मेघौलीमा पर्यटक भित्रिएका हुन् । निकुञ्जभित्र होटल सञ्चालन गर्न नपाउने नीति सरकारले लिएपछि टाइगर टप्स लगभग ६ वर्षदेखि बन्द छ । भित्रका होटल बन्द भएपछि गुणस्तरीय पर्यटक चितवन आउन कम भयो । त्यो अभावलाई आफूहरूले मेटाउन खोजेको बराहीका सञ्चालक पौडेलको भनाइ छ ।

हेलिकप्टर चढेर आउने पर्यटक हजार डलरभन्दा माथि खर्च गर्न सक्ने हैसियतका हुने सञ्चालकहरू बताउँछन् । काठमाडौं–भरतपुर करिब १५० किलोमिटर दूरीको सडक त्यत्ति राम्रो छैन । विमानमा पनि घन्टौं कुर्नुपर्ने अवस्था छ । ‘एकपटक जहाज चढेर भरतपुर ओर्लेका पर्यटकहरू गाडी चढेर मेघौलीसम्म आए,’ महतो सुनाउँछन्, ‘तर बाटोको दुरवस्था देखेपछि फर्कने बेलामा हेलिकप्टर नै चढ्नुपर्‍यो ।’

प्रकाशित : मंसिर २, २०७६ ०८:२४
प्रतिक्रिया
पठाउनुहोस्
ADVERTISEMENT
ADVERTISEMENT

त्रिशूली ३ ‘बी’को ४० प्रतिशत काम पूरा

कान्तिपुर संवाददाता

नुवाकोट — २०७७ फागुन मसान्तभित्रमा बिजुली उत्पादन गर्ने लक्ष्य राखेको माथिल्लो त्रिशूली ३ बीको निर्माण कार्य ४० प्रतिशत सकिएको छ । विद्युत् गृहसहित अधिकांश भाग किस्पाङ गाउँपालिका–५ मा रहेको आयोजनाको सुरुङ खन्ने, विद्युत्गृह, सर्च ट्यांक, पेनस्टकको प्रारम्भिक निर्माण कार्य भइरहेको छ । अहिलेसम्म १२ सय मिटर सुरुङ खनिएको आयोजनाले जनाएको छ ।

इन्जिनियरिङ, खरिद तथा निर्माण (ईपीसी) मोडेलमा आयोजना निर्माणका लागि चिनियाँ कम्पनी सिचुआन एएनएचई हाइड्रोइलेक्ट्रिक इन्जिनियरिङसँग ठेक्का सम्झौता भएको थियो ।

यो आयोजना नुवाकोट र रसुवामा निर्माण भइरहेको ६० मेगावाटको माथिल्लो त्रिशूली थ्री एको क्यास्केड आयोजना हो । क्यास्केड भएकाले माथिल्लो त्रिशूली थ्री बीले बाँध, बालुवा थिग्र्याउने पोखरी (डिसेन्डर) लगायत संरचना बनाउन पर्दैन ।

३७ मेगावाट क्षमताको उक्त आयोजना नेपाल विद्युत् प्राधिकरण र नेपाल दूरसञ्चार कम्पनीको मुख्य लगानीमा त्रिशूली जलविद्युत् कम्पनी लिमिटेडले निर्माण गर्न लागेको हो । ‘मुख्य सुरुङ निर्माण भइहेको छ,’ कम्पनीका प्रबन्ध सञ्चालक मोहन गौतमले भने, ‘अहिले ४० प्रतिशत कामको प्रगति भएको छ ।’ प्राधिकरण र नेपाल टेलिकमले ३०/३० प्रतिशत सेयर हालेका छन् । कम्पनीमा रसुवा र नुवाकोटका स्थानीय तहहरूको ५ प्रतिशत, रसुवा तथा नुवाकोटका स्थानीय वित्तीय संस्थाको ५ प्रतिशत, रसुवा तथा नुवाकोटवासीको १० प्रतिशत, सर्वसाधारणको १५ प्रतिशत तथा प्राधिकरण तथा टेलिकमका कर्मचारीको ५ प्रतिशत सेयर रहनेछ ।

सुक्खायाममा (मंसिर १६ देखि जेठ १५) १३ करोड ४८ लाख ८० हजार र वर्षायाममा (जेठ १६ देखि मंसिर १५) १५ करोड ७७ लाख १० हजार युनिट विद्युत् उत्पादन हुने आयोजनाले जनाएको छ । आयोजनाबाट उत्पादन हुने विद्युत् खरिद–बिक्रीका लागि प्राधिकरणसँग विद्युत् खरिद–बिक्री सम्झौता (पीपीए) भइसकेको छ । आयोजनाको विद्युत्गृहबाट ३ किलोमिटर प्रसारण लाइनमार्फत त्रिशूली थ्रीबी सबस्टेसनमा जडान गरी राष्ट्रिय प्रसारण लाइनमा प्रवाह हुनेछ ।

प्रकाशित : मंसिर २, २०७६ ०८:२२
पूरा पढ्नुहोस्
ADVERTISEMENT
प्रतिक्रिया
पठाउनुहोस्