ठूला योजनामा प्रदेश सरकार

रामेछापमा २७ वटा सडक निर्माण  िकरोडौं लगानीमा शीतभण्डार, कवर्डहल र रंगशाला
टीकाप्रसाद भट्ट

रामेछाप — संघीय सरकारको बजेटले सञ्चालित योजना सुस्त भइरहेका बेला प्रदेश–३ सरकारका ठूला योजनाका काम तीव्र रूपमा अघि बढेको छ । लगानीको हिसाबले पनि संघीय योजनालाई प्रदेशका योजनाले उछिनेका छन् । तीन वर्षअघिदेखि संघीय सरकारले रामेछाप जिल्लाका दुईवटा सडक कार्यान्वयनमा ल्याएको थियो ।

गाईखुरा–गेलु र खिम्ती–शिवालय सडकमा गएको वर्षदेखि काम भएको छैन । निर्वाचन क्षेत्रअन्तर्गतको कार्यक्रमबाट सडक विभागको खुर्कोट डिभिजनमार्फत निर्माण थालिएको थियो । यी दुईबाहेक जिल्लामा संघका अन्य योजना कार्यान्वयमा छैनन् ।

तर, प्रदेश सरकारले कार्यान्वयनमा ल्याएका सडक योजनामा आशालाग्दो काम भएको छ । पूर्वाधार विकास कार्यालय रामेछापमार्फत तीनवटा सडक पूर्वाधार निर्माणको काम तीव्र गतिमा अघि बढेको छ । सित्खा–भीरपानी–गोगनपानी, मन्थली–गोगनपानी र मन्थली–सानीमदौं–रालटार सडक कालोपर्ने गर्ने योजनामा झन्डै ४० प्रतिशतको हाराहारीमा काम सकिएको कार्यालय प्रमुख इन्जिनियर सोमराज तिमिल्सिनाले बताए । अघिल्लो वर्षमात्र ठेक्का लागेका ती सडकको काम असोजसम्म सम्पन्न हुने उनको भनाइ छ ।

जिल्ला सदरमुकाम जोड्ने ३५ किलोमिटर र मन्थली रामेछाप १३ किलोमिटरबाहेक जिल्लामा हालसम्म कालोपत्रे सडक छैनन् ।
प्रदेश सरकारले यस आर्थिक वर्षमा जिल्लाका २७ वटा सडक निर्माण गर्ने कार्यक्रम दिएको छ । तीमध्ये ११ वटा कालोपत्रे र अन्य सडक सुदृढीकरणको काम हुने इन्जिनियर तिमल्सिनाले बताए । उनका अनुसार हलेदे–धोबी–ढाँडे, हिलेपानी–च्यास्कु–कोलञ्जोर, मन्थली–भलुवाजोर, गाईखुरा–चिसापानी, मन्थली–सुनारपानी–सालु, खैरेनीघाट–राकाथुम–गौश्वारा, हिलेपानी–कुशवसेरी र सित्खा–आँपचौर–चुल्ठेपानी सडक कालोपत्रे गर्ने काम अघि बढेको छ । सबै सडक बहुवर्षे ठेक्का प्रणालीबाट निर्माण गरिन लागेको हो । यसबाहेक विभिन्न ११ वटा सडकको सुदृढीकरण पनि यसै वर्ष हुने लक्ष्य कार्यालयले लिएको छ । सबै योजना निर्माणका लागि कार्यालयले १ अर्ब १० करोड खर्च गर्दै छ ।

आर्थिक मामिला तथा योजनामन्त्री कैलाशप्रसाद ढुंगेलले नागरिकले विगतमा भोगेका सास्ती अब भोग्नु नपर्ने गरी योजनाको कार्यान्वयनमा जुटेको बताए । पूर्वाधार कार्यालयले तीनवटा महत्वपूर्ण पुलको कामसमेत अघि बढाएको छ । अर्चले–सालु जोड्ने रणजोर खोलाको पुल र केही वर्षदेखि अलपत्र परेको गुम्देलको क्यामाखोला पुलसमेत हुने भएको छ । गागलको धुलेदेवी पुलको काम भने सम्पन्न भइसकेको छ ।

यसका साथै प्रदेश सरकारले मन्थलीमा शीतभण्डार, कवर्डहल र रंगशाला निर्माणका लागि करोडौं लगानी गरेको छ ।

प्रकाशित : मंसिर २, २०७६ ०८:१९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

बीपी मेमोरियलमा विस्तारित सेवा

कान्तिपुर संवाददाता

चितवन — भरतपुरको बीपी कोइराला मेमोरियल क्यान्सर अस्पतालले आइतबारदेखि विस्तारित सेवा (ईएचएस) सुरु गरेको छ । चिकित्सकले अस्पतालमा भन्दा बाहिरका निजी अस्पतालमा बिरामी जाँच्ने र उपचार गर्ने क्रम बढेपछि ईएचएस सुरु गर्न वर्षौंदेखि माग हुँदै आएको थियो । यो अस्पताल क्यान्सरको उपचार हुने देशकै मुख्य अस्पताल हो । 

‘अहिले हामीले अस्पतालको नियमित समयबाहेक तीन घण्टा समय बढाएर ईएचएस सञ्चालन गरेका छौं,’ आइतबार अस्पतालमा आयोजित पत्रकार सम्मेलनमा कार्यकारी निर्देशक डा. विजयचन्द्र आचार्यले भने । ईएचएस सेवा दिउँसो साढे ३ बजेदेखि सुरु हुनेछ । जाडो समयमा एक घण्टा पहिले सेवा सुरु हुने उनले बताए । सेवा लिनेले ओपीडीका लागि पाँच सय रुपैयाँको टिकट लिनुपर्नेछ । नियमित सेवामा २५ रुपैयाँ लाग्ने आचार्यले जनाकारी गराए । ‘टिकटबाहेक सेवाका हकमा रेडिएसन सेवामा सवा गुणा र शल्यक्रिया सेवामा डेढ गुणा रकम बढी लाग्नेछ,’ आचार्यले भने । सिटी स्क्यान, एमआरआई, अल्ट्रासाउन्ड, मेमोग्राम, गामको सेवामा भने शुल्क वृद्धि गरिएको छैन । प्याथोलोजिकल सेवामा पनि पहिलेकै शुल्क कायम गरिएको छ । शय्या र ईसीजी, इडोस्कोपी, एनपीएल, कोलोनेस्कोपी, सेवामा पनि शुल्क यथावत् राखेको उनले जानकारी दिए ।

क्यान्सर अस्पतालका चिकित्सक र प्राविधिकलाई अस्पतालभित्रै आवासीय सुविधा र भत्ताको व्यवस्था छ । त्यसैले अस्पताल नियमावलीअनुसार उनीहरूले बाहिरका निजी अस्पतालमा काम गर्न पाउँदैनन् । तर सञ्चालक समितिको निर्णयले छुट दिएपछि बाहिर नै बढी व्यस्त हुन थालेका थिए ।

तीन वर्षअघि चिकित्सकलाई बाहिर काम गर्न जान रोक लगाएपछि अस्पतालले ईएचएस सुरु गर्ने योजना बनाएको थियो । तर अहिले ईएचएस सुरु भए पनि अस्पतालमा कार्यरत चिकित्सकलाई बाहिर काम गर्न भने बन्देज नलागेको कार्यकारी निर्देशक डा. आचार्यले बताए । अस्पतालमा कार्यरत रेडियसन अंकोलोजी विभागबाहेक अन्य विभागका प्रायः चिकित्सक र प्राविधिकले निजी अस्पतालमा काम गर्छन् ।

अस्पताल सञ्चालक समितिको पदेन सदस्यसमेत रहेकी भरतपुर महानगरपालिकाकी मेयर रेनु दाहालले ईएचएस सुरु भएपछि बाहिरका निजी अस्पतालमा बिरामी बोलाउने परिपाटी रोकिने आशा राखिन् । चितवनका प्रमुख जिल्ला अधिकारी जितेन्द्र बस्नेतले सेवा सुरु गर्ने तर डाक्टर, प्राविधिकहरू नबस्ने परिपाटी अन्त्य हुनुपर्ने सुझाव राखे ।

तत्कालीन कार्यकारी निर्देशक डा. सीबी पुनले तीन वर्षअघि ईएचएस सुरु गर्न डा. आचार्यको संयोजकत्वमा कार्यदल बनाएका थिए । उनै आचार्य पछि कार्यकारी निर्देशक भए । आचार्यको कार्यकाल सकिन ६ महिना बाँकी हुँदा बल्ल ईएचएस सुरु भएको हो ।

प्रकाशित : मंसिर २, २०७६ ०८:१७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT