नक्कली सुनसहित दुई जना पक्राउ
(मकवानपुर) — नक्कली सुनसहित मकवानपुर प्रहरीले हेटौंडाबाट दुई जनालाई पक्राउ गरेको छ ।
जिल्ला प्रहरी कार्यालय मकवानपुरले शुक्रबार पत्रकार सम्मेलनको आयोजना गरी यस बारेमा जानकारी गराएको हो । नक्कली सुनसहित पक्राउ पर्नेमा दोलखा जिरी नगरपालिका–३ का ४७ वर्षीय ध्यालसिंह शेर्पा र मोटरसाइकल पछाडी सवार मकवानपुर राक्सिराङ गाउँपालिका–४ का अभयकुमार थिङ रहेको जिल्ला प्रहरी कार्यालय मकवानपुरका प्रहरी उपरीक्षक मुकेशकुमार सिंहले जनाएका छन् ।
जिल्ला प्रहरी कार्यालय मकवानपुरबाट खटिएको प्रहरी टोलीले त्रिभुवन राजपथअन्तर्गत् हेटौंडा-१, चौकीटोलमा भैसेंबाट हेटौंडातर्फ आउँदै गरेको बा.९३ प ९०६ नम्बरको मोटरसाइकल जाँच गर्दा शेर्पाको साथबाट सुइसी १ किलो फइन गोल्ड ९९९.९ सिओ २२६६६५० लेखिएको सुनजस्तो देखिने चारपाटे आकारको नक्कली सुन बरामद गरेको जिल्ला प्रहरी कार्यालय मकवानपुरले जनाएको छ । पक्राउ परेका दुबै जनालाई ठगी मुद्दामा अनुसन्धान भइरहेको जनाइएको छ ।
