अपांग आमा र भाइबहिनी स्याहार्छिन् १३ वर्षीया बालिका

उपचारमा सम्पत्ति सकिएपछि बाबुले आत्महत्या गरे
हरिहरसिंह राठौर

(धादिङ) — एक साताअघिसम्म १३ वर्षीया करिना थापा भाइबहिनीसँगै स्कुल जान्थिन् । घरमा बा–आमालाई सघाउँथिन् । तर, अहिले उनको दैनिकीमात्रै फेरिएको छैन, घरको सम्पूर्ण जिम्मेवारीसमेत कलिलो काँधमा आइलागेको छ । 

चार वर्षअघि रुखबाट लडेपछि ३३ वर्षीया आमा लक्ष्मी अपांगसरह बनेकी छिन् । दुई वर्षयता त उनी बोल्नसमेत सक्दिनन् । आमाको पीडा देखिरहेकी करिनाले सात दिनअघि अझ ठूलो बज्रपात सहनुपर्‍यो । बुवा यामबहादुरले आत्महत्या गरे ।

आमालाई स्याहार्नु, एक भाइ र बहिनीलाई खाना पकाएर विद्यालय पठाउनु अहिले उनको दिनचर्या बनेको छ । रुखबाट लडेर ढाडको हाड भा‘च्चिएकी श्रीमतीलाई यमबहादुरले काठमाडौंको जनमैत्री अस्पताल र पाटन अस्पतालमा उपचार गराउँदा साढे १९ लाख रकम खर्च भयो । वैदेशिक रोजगारबाट कमाएको १२ लाख र भूकम्पले भत्काएको घर बनाउन लिएको ५० हजार अनुदान पनि श्रीमतीकै उपचारमा सके । त्यतिले पनि नपुगेर ७ लाखमा घरबारी बेचे । अब मगर परिवारसँग घडेरीमात्रै बचेको छ । सारा सम्पत्ति श्रीमतीको उपचारमै सकेका यमबहादुरसँग श्रीमतीको ढाडको हड्डी जोड्न राखेको स्टिल झिक्नलाई समेत खर्च पुगेन ।

गरिबीको चपेटामा परेका यमबहादुरले तीन सन्तानको पालनपोषण र अपांग श्रीमतीको उपचारमा निकै कष्ट बेहोर्नुपर्‍यो । अन्तत: उनले कात्तिक २० गते आत्महत्याको बाटो रोजे ।

मगर परिवार नीलकण्ठ नगरपालिका–१२ आंगेटार मगरबस्तीमा बस्दै आएको छ । भूकम्पले घर भत्केपछि जस्तापाताले छाएको बाँसको टहरा उनीहरूको आश्रय बनेको छ ।

हाल करिना भाइबहिनीलाई नजिकैको पाँचघरेस्थित साङ्गकोष माध्यमिक विद्यालयमा पुर्‍याउँछिन् । बिदा भएपछि लिन जान्छिन् । उनका ११ वर्षीय भाइ काजी ५ मा र ८ वर्षीया बहिनी सोमकुमारी कक्षा ३ मा पढ्छिन् । ‘बिहान उठेर छिमेकीले दिएको चामल र सोयाबिन पकाएर भाइबहिनीलाई दिन्छु,’ ७ कक्षामा पढ्ने करिनाले भनिन्, ‘आमालाई पनि खुवाइदिन्छु ।’

उनीहरूको अवस्थालाई हेरेर विद्यालयले सहयोग जुटाउन १० हजारको अक्षयकोष स्थापना गरेको छ । ‘छरछिमेकले अन्नपातलगायत अन्य सहयोग गरिरहेका छन्,’ शिक्षक रामप्रसाद लामिछानेले भने, ‘करिना र काजीको पढाइ राम्रो छ ।’ स्थानीय दामोदर अर्यालले बुधबार आफ्नो ४२औं जन्मदिनको अवसर पारेर खाद्यान्न, लत्ताकपडा, शैक्षिक सामग्री सहयोग गरेका छन् ।

‘आवास निर्माणमा ल्याएको रकम उपचारमै सके । घरको जग पनि बनाउन पाएनन्,’ छिमेकी नरबहादुर थापा भन्छन्, ‘निर्माण सामग्री भए घर निर्माणमा सहयोग गर्न तयार थियौं ।’

नीलकण्ठ नगरपालिका प्रमुख भीम ढुंगानाका अनुसार वडाध्यक्षको सिफारिसमा असहाय, अशक्त र अपांग रहेका भूकम्पपीडितका लागि सरकारीस्तरबाटै आवास निर्माण गरिदिने नीति छ । ‘जिल्लास्थित राष्ट्रिय पुनर्निर्माण प्राधिकरणसँग समन्वय गरी तत्काल सुरक्षित आवास निर्माणको पहल गर्ने सोचमा छौं,’ उनले भने । अहिले करिनाका परिवारलाई यमबहादुरका दाइ इन्द्रबहादुरले पनि सहयोग गरिरहेका छन् । हल न चल भएकी आमाको सम्पूर्ण स्याहारमा करिना नै खटिइरहेकी छन् । ‘मनतातो पानीमा रुमाल भिजाएर आमाको सबै शरीर पुछिदिन्छु तर टहराभित्र लान सकिन्न,’ उनले भनिन्, ‘बाबा हुन्जेल सबै उहाँले नै गर्नुहुन्थ्यो, हामीलाई निकै कठिन भएको छ ।’

प्रकाशित : कार्तिक २८, २०७६ ०९:४५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

कांग्रेस महाधिवेशन प्रतिनिधिको भेला : ‘उपनिर्वाचन प्रतिष्ठाको विषय’

कान्तिपुर संवाददाता

मकवानपुर — नेपाली कांग्रेसका महाधिवेशन प्रतिनिधिहरूले मंसिर १४ गते हुने उपनिर्वाचनलाई पार्टीले प्रतिष्ठा र परीक्षाको रूपमा लिएर अगाडि बढ्नुपर्ने बताएका छन् । प्रदेश ३ को मुकाम हेटौंडामा भएको महाधिवेशन प्रतिनिधिको भेला तथा प्रशिक्षणमा सहभागीले वर्तमान सरकार आलोचित भइरहेका कारण उपनिर्वाचनलाई प्रतिष्ठाको रूपमा लिएर प्रचारप्रसारमा जुट्न प्रतिनिधिहरूले जोड दिए ।

‘पार्टीको शीर्ष नेतृत्वलाई एक ढिक्का भएर गुट अन्त्य भएको सन्देश दिँदै उपनिर्वाचनमा सशक्त रूपमा प्रस्तुत हुने गरी रणनीति बनाउन आग्रह गरिएको छ,’ महाधिवेशन प्रतिनिधि टेकनाथ शिवाकोटीले भने । भेलामा सहभागीले वर्तमान नेकपा नेतृत्वको सरकार क्रमश: अलोकप्रिय भइरहेको र जनमत गुमाइरहेको निष्कर्ष निकालेको उनले बताए ।

समापन समारोहमा कांग्रेसका उपसभापति विमलेन्द्र निधिले सरकारले संघीय लोकतान्त्रिक गणतन्त्रतात्मक प्रणालीअनुसार काम नगरेको आरोप लगाएका थिए । संवैधानिक प्रणालीलाई कमजोर पार्ने, राज्यका अंगमाथि नियन्त्रण गर्न खोज्ने, सी विचारधाराबारे प्रशिक्षण चलाउने लगायतका गतिविधिले देशलाई अधिनायकवादतर्फ उन्मुख गराउन खोजेको उनको भनाइ थियो । ‘यस्ता अधिनायकवादी चरित्रबारे जनतालाई बेलैमा सूचित गर्न प्रशिक्षण कार्यक्रम गरिएको हो,’ प्रशिक्षण विभागका प्रमुखसमेत रहेका निधिले भने ।

दुईदिने प्रशिक्षणमा रसुवा, नुवाकोट, धादिङ, चितवन, मकवानपुर र सिन्धुलीका दुई सय ९० महाधिवेशन प्रतिनिधि तथा केन्द्रीय सदस्यको सहभागिता थियो । सहभागीलाई प्रतिष्ठानका प्रमुख निधि, सदस्य एवं राष्ट्रिय योजना अयोगका पूर्वउपाध्यक्ष डा. गोविन्द पोखरेल, डा. जगदीशचन्द्र पोखरेल, प्रशिक्षण विभागका कार्यकारी निर्देशक पुरुषोत्तम दाहाल, प्रतिष्ठानका सदस्य डा. आरजु देउवा, खिला दाहाल र राजु नेपालले सहजीकरण गरेका थिए ।





प्रकाशित : कार्तिक २८, २०७६ ०९:४२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×