शैलुङमा अरनिकोका बस निषेध

कान्तिपुर संवाददाता

दोलखा — थोत्रो गाडीमा बढी यात्रु बोकेका कारण बस दुर्घटना भएको भन्दै दोलखाको शैलुङ गाउँपालिकाभित्र पूर्वअरनिको यातायात प्रालिअन्तर्गतका सबै गाडी प्रवेश निषेध गरिएको छ । उक्त पालिकाभित्र सो प्रालिको शैलुङेश्वर यातायातको नामबाट दैनिक आठ वटा आउने र आठवटा बस जाने गर्थे ।

फाइल तस्बिर

शुक्रबार अरनिको केन्द्रीय कार्यालयमा ज्ञापनपत्र बुझाएपछि शैलुङ गाउँपालिका अध्यक्ष भरत दुलालले १३ बुँदे माग राखी ज्ञापनपत्र बुझाएर आन्दोलन सुरु गरेको बताए । माग पूरा नभएसम्म उक्त कम्पनीका बसहरूलाई निषेध गरिने उनको भनाइ छ ।

कात्तिक १७ गते मागादेउरालीबाट छुटेको बा२ख ७२४५ नम्बरको बस सिन्धुपाल्चोकको सुकुटे पुगेपछि दुर्घटना भएको थियो । उक्त बसमा सवारमध्ये १८ जनाको मृत्यु भयो भने तीन वर्षीया बालिका रियुना तामाङ बेपत्ता छिन् । दुर्घटनामा परेकाहरू १६ जना शैलुङ गाउँपालिकाका र तीन जना उनीहरूका नातेदार हुन् ।

‘नरसंहार हुनेगरी भएको दुर्घटनामा शैलुङको अपुरणीय क्षति भएकाले यातायात सेवाहरूले यात्रुमैत्री र सुरक्षित बनाउका लागि पनि आन्दोलन गर्नुपरेको हो,’ अध्यक्ष दुलालले भने । दुर्घटनामा शैलुङका ३० भन्दा बढी घाइतेको विभिन्न अस्पतालमा उपचार भइरहको छ । सुकुटे बस दुर्घटनापीडित संघर्ष समितिका संयोजक रिमालबाबु श्रेष्ठद्वारा हस्ताक्षरित ज्ञापनपत्रमा उक्त क्षेत्रमा सञ्चालित बसहरू जीर्ण अवस्थामा रहेकाले पनि दुर्घटना निम्तिएको उल्लेख छ । मानिस बस्ने सिटमा सामान ढुवानी गर्ने गरेको, यात्रुलाई अभद्र व्यवहार गर्ने गरेको, मनपरी भाडा असुल्ने गरेको, सिट क्षमताभन्दा अत्यधिक यात्रु बोक्ने गरेको उल्लेख छ । मृतक, घाइते, पीडित पक्षका बारेमा छलफल गर्न खोज्दा उक्त कम्पनीका व्यक्तिहरूले कुनै वास्ता नगरेको आरोप लगाइएको छ ।

‘पीडित पक्षलाई बेवास्ता र अपमान गर्ने, दुर्घटनाप्रति कुनै संवेदना नदेखाउने, पीडितलाई धम्की दिने उक्त जिल्लाको प्रहरी र प्रशासनविरुद्ध राष्ट्रिय मानवअधिकार आयोगमा छानबिनका लागि अपिल गर्छौं,’ गाउँपालिका अध्यक्ष दुलालले भने ।

सिन्धुपाल्चोककी प्रमुख जिल्ला अधिकारी गोमादेवी चेम्जोङले उक्त घटनालाई लिएर रातभरि बसेर पीडितपक्षको माग र गुनासो सुनिएको बताउँदै कानुनअनुसार मात्रै कार्य गरिएको बताइन् ।

पूर्वअरनिको यातायात कम्पनी कार्यालयले ज्ञापनपत्र दर्ता भएको जनाएको छ । कम्पनी अध्यक्ष चित्र कुवँर भने टेलिफोन सम्पर्कमा आउन चाहेनन् ।

प्रकाशित : कार्तिक २२, २०७६ ०८:४१
प्रतिक्रिया
पठाउनुहोस्

सामूहिक बलात्कारमा चारलाई ११ वर्ष कैद

कान्तिपुर संवाददाता

चितवन — सामूहिक बलात्कारको पीडा बेहोरेकी एक महिलाको पक्षमा चितवन जिल्ला अदालतले दुई वर्षपछि फैसला गरेको छ । बलात्कारमा संलग्न चार जनालाई अदालतले बुधबार ११ वर्ष कैद हुने सजाय सुनाएको हो ।

प्रतिकात्मक तस्बिर

न्यायाधीश अवनी मैनाली भट्टराईले उनीहरूलाई सजाय निर्धारण गरेको अदालतका स्रेस्तेदार रुद्रमणि गिरीले बताए ।

०७४ कात्तिक १२ गते दायर भएको मुद्दामाअदालतले अभियुक्तहरूविरुद्ध दाबी पुग्ने ठहर गर्दै सजाय तोकेको हो । स्रेस्तेदार गिरीका अनुसार सजाय तोकिएकामा भरतपुर–१२ का निसान गुरुङ, सागर गौतम, भरतपुर बसपार्क चोकका विजय सुनार र भरतपुर–८ का सुजन पौडेल रहेका छन् । बलात्कार मुद्दामा पाँचदेखि सात वर्ष कैद हुन्छ । सामूहिक बलात्कारमा थप पाँच वर्ष कैद हुने व्यवस्था छ । ६/६ वर्ष कैद निर्धारण गरी सामूहिक बलात्कार भएको हुँदा सबैलाई पाँच वर्ष पनि कैद थप भएको स्रेस्तेदार गिरीले बताए ।

औषधि किन्न घरबाट निस्केकी महिला रातभर घर नफर्केपछि परिवारले खोजी थालेका थिए । उनको साथमा भएको मोबाइल पनि चोरी भएको थियो । उक्त मोबाइल निसान गुरुङले बेचेको पत्ता लागेपछि सुरुमा उनी पक्राउ परे थिए । अदालतले मोबाइल चोरेर बेचेको अभियोग लागेका गुरुङलाई ११ वर्षमाथि थप एक महिना कैद र ७ हजार १ सय रुपैयाँ जरिवाना गर्ने निर्णय पनि गरेको स्रेस्तेदार गिरीले बताए ।

औषधि किन्न जाँदा ती महिलाले म्याजिक भ्यान चढेकी थिइन् । चालकले पछि दुई युवालाई चढाएर भरतपुर गोन्द्राङ आडको जंगल क्षेत्रमा लगेर बलात्कार गरेको प्रहरीमा दिएको उजुरीमा उल्लेख छ । पछि चालकले ती महिला र दुई युवालाई भरतपुरको सुनसान क्षेत्रमा छाडेर हिँडेका थिए । त्यहाँ अर्का एक युवक आएर बलात्कार गरेको उजुरीमा उल्लेख छ । मुद्दा दायर हुँदा निसान गुरुङ र सुरज पौडेल मात्रै समातिएका थिए । फरार रहेका अन्य दुईमध्ये विजय सुनारले मुद्दा दायर भएपछि अदालतमा हाजिर भई बयान दिएका थिए । आरोपितमध्ये सागर गौतम अझैफरार छन् ।

हत्या अभियोगमा दाबी नपुग्ने फैसला
चितवन जिल्ला अदालतमा कायम रहेको पुरानो मुद्दा पनि बुधबार किनारा लागेको छ । ०७४ जेठ २० मा माडी रामराज्यपुरमा १० वर्ष र ११ वर्षका दुईजना बालिका पोखरीमा मृत फेला परेका थिए । ती बालिकालाई बलात्कारपछि हत्या गरेको भन्दै चितवन जिल्ला अदालतमा सोही वर्षको असार १८ गते मुद्दा दायर भएको थियो ।

यो मुद्दामा १८ वर्षका एकजना, १७ वर्षका दुईजना र त्योभन्दा पनि कम उमेरका दुईजना नाबालिगहरू गरी पाँचजनालाई अभियुक्त कायम गरिएको थियो ।

अदालतमा २६औं पटक पेसी चढेका बेला यो मुद्दाका सबै अभियुक्तले सफाइ पाएका हुन् । अदालतमा मुद्दा दायर भएपछि सामान्यतः दुई वर्षभित्र फैसला हुने परिपाटी छ । तर पेशीमा चढे पनि २१ पटकसम्म सुनुवाइ स्थगित भएको यो मुद्दा दायर भएको दुई वर्ष पाँच महिनापछि बल्ल फैसला भएको छ । जिल्ला न्यायाधीस हेमन्त रावलले मुद्दाको फैसला गरेका हुन् ।

प्रकाशित : कार्तिक २२, २०७६ ०८:३५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT