सुनकोसी दुर्घटना : शोकमा डुब्यो शैलुङ

गाउँपालिकाभरि रुवाबासी छ भने स्थानीय कार्यालय र विद्यालयहरु सोमबार शोकमा बन्द रहे    
राजेन्द्र मानन्धर

(दोलखा) — बस तीव्र गतिमा थियो । लाउडस्पिकरको ठूलो आवाजले बसभित्र आपसी कुरा गरेको सुनिदैनथ्यो । एक्कासी लाउडस्पिकर रोकियो । बसभित्र कोलाहाल मच्चियो— ऐया, आथ्या, बचाऊ बचाऊ । ‘बस सुनकोसी खोलामा आधा भाग डुब्दा मैले आफूलाई पानीमा डुबुल्की मादै गरेको पाएँ,’ धुलिखेल अस्पतालमा उपचार गराई रहेका घाइते आठ बर्षिय प्रवीण आले मगरले भने, ‘आधा शरीर खोलामा डुबेको आमाको हात समातेर तानेँ । आमा झन डुब्दै गएपछि हात छाडेँ ।’ आमाको काखमा बसेर कोचाकोच बसमा यात्रा गरिरहेको प्रवीणले दुर्घटनामा आमा सानु राउतलाई भने गुमाएँ । 

सानैदेखि कराते खेल्न र पौडी जान्नका कारणले प्रवीण मृत्युको मुखबाट फुत्किएको उनका ठूलीआमा कल्याणी खड्काले भनिन्, ‘स्पिडले चलाएको र बढी मान्छे कोचेकाले गाडी खोलामा खस्यो ।’ आइतबार सिन्धुपाल्चोकको सुकुटेमा खोलामा खसेको बा२ख ७२४५ बस सुरुदेखि नै अनियन्त्रित भएको घाइते यात्रुहरू बताउँछन् । गाडी चल्न थालेदेखि नै कान फुट्लाजस्तो लाउडिस्पकर बजाइएको घाइते जीवन खड्काले बताए । कोचाकोच यात्रुका बसको कारण पाता भाँचिएपछि बाटामा मर्मत गरिएको थियो । मन नै झस्किने गरी कुदाइएको उक्त गाडी सुकुटेमा दुर्घटना हुँदा दोलखाको शैलुङ्गेश्वरको कम्तीमा १६ जनाको मृत्यु भएको छ । सिन्धुपाल्चोकको बाह्रबिसे स्वास्थ्यचौकीमा शवहरू खात लगाएर राखिएका छन् । सानो कोठामा कोचेर राखिएको शवमध्ये दुईजना नाबालक छन् ।


शैलुङ्गेश्वर— ४ स्थित मानेडाँडामा उक्त नावालकहरूका हजुरआमा राम्री तामाङ भावविह्ल भेटिइन् । फेसबुकमा केहीअघि पोस्ट गरिएको साढे दुई वर्षीया नातिनी र १२ वर्षका नातिको तस्बिर हेरेर उनी भक्कानिन् । उनले भनिन, ‘काठमाडौं बस्ने नातिनातिनी दसैंतिहार मानेर फर्कंदा त्यस्तो अवस्था भयो ।’ उनीका अनुसार अझै एउटी छोरी बेपत्ता छिन । छोरा बुहारी भने सकुशल छन् । शैलुङ गाउँ शोकमा छ,’ सोमबार उक्त पालिका अध्यक्ष भरत दुलालले भने । दुर्घटनामा अधिकांश मृतक र घाइते शैलुङ गाउँपालिको परेपछि मृतक र घाइतेका घरमा रुवाबासी छ । उक्त गाउँका अगुवाहरू र सांसदहरू सिन्धुपाल्चोकको बाह्रबिसेमा मृतकको परिवारलाई क्षतिपूर्ति र घाइतेको उपचारका लागि वार्तामा पीडित पक्षका तर्फबाट बसेका थिए । पीडितहरूले केहीबेर दुर्घटनास्थल सुकुटेमा सडक अवरुद्ध पारेका थिए ।


बसमा करिब ७० जना यात्रु भएको अनुमान छ । बाटोमा रोक्दै यात्रु हाल्दै अघि बढेको बस सिधा र खुला सडकबाट खसेको देखिन्छ । सिट क्षमताभन्दा बढी यात्रु कोच्ने समस्या अरनिको राजमार्ग र लामोसाँघु जिरी सडकमा चल्ने प्रत्येक यात्रुबाहक बसमा देखिन्छ । त्यसैको परिणाम यस्तो दु:खद् घटना भएको शैलुङ गाउँपालिका अध्यक्ष दुलालले भने । पालिकाभित्र ठूलो दु:ख आइपरेको जनाउँदै सोमबार स्थानीय कार्यालय, विद्यालयहरू बन्द गरिए । दुर्घटनामा उक्त पालिकाको वडा नं. ३, ४ र ५ का व्यक्ति परेका छन् ।

प्रकाशित : कार्तिक १९, २०७६ ०९:२१
प्रतिक्रिया
पठाउनुहोस्

सुकुटेमा यात्रु बस दुर्घटना : मृतकको संख्या १८ पुग्यो

अनिश तिवारी

(सिन्धुपाल्चोक) — चौतारा साँगाचोकगढी नगरपालिका ९ सुकुटेमा यात्रु बस दुर्घटना हुँदा मृत्यु हुनेको संख्या सोमबारसम्म १८ पुगेको छ । आइतबार दिउँसो दोलखाबाट काठमाडौंतर्फ जाँदै गरेको बा२ख ७२४५ नम्बरको यात्रु बस सुनकोसी नदीमा खस्दा १५ जनाको घटनास्थलमै मृत्यु भएको हो । उपचारका क्रममा धुलिखेल अस्पताल र शिर मेमोरियल अस्पतालमा गरी दुई जनाको मृत्यु भएको जिल्ला प्रहरी कार्यालयले जानकारी दिएको छ । 

उदयपुर चौदण्डी नगरपालिका ६ का २३ वर्षीय विजय तामाङको शव सुनकोसी बगरमा फेला परेको जिल्ला प्रहरी नायब उपरीक्षक (डीएसपी) माधवप्रसाद काफ्लेले बताए । दोलखा क्षेत्रका दुई जना हराइरहेको खबर आए पनि अझसम्म यकिन नभएको उनको भनाइ छ । शैलुंगेश्वरी यातायातको बस सुकुटे सडकछेउबाट अनियन्त्रित भई नदीमा खसेको थियो । दुर्घटनामा घाइते भएका २९ जना धुलिखेल अस्पतालबाट डिस्चार्ज भइसकेको प्रहरीको तथ्यांक छ । ‘धुलिखेल अस्पतालमा १३, काठमाडौंको नर्भिक अस्पतालमा ३, ट्रमा सेन्टरमा १, शिर मेमोरियल बनेपामा २ र मध्यपुर अस्पतालमा २ जना गरी २१ जना उपचाररत छन्,’ डीएसपी काफ्लेले भने ।

क्षतिपूर्तिका लागि छलफल
मृतकले पाउनुपर्ने क्षतिपूर्तिका लागि बेवास्ता गरिएको भन्दै मृतकका परिवारले सुकुटे क्षेत्रबाट सवारी आवतजावत ठप्प पारेपछि शैलुंगेश्वरी/अरनिको यातायात समिति र मृतकका परिवारबीच छलफल सुरु भएको छ । बाह्रबिसे नगरपालिकाको बाह्रबिसे बजारमा दुई घन्टा कुर्दा पनि समिति र प्रशासनका प्रतिनिधि नआएपछि आन्दोलित स्थानीयले नाराबाजी गरेका थिए । शैलुङ गाउँपालिका अध्यक्ष भरत दुलालको मध्यस्तता र रिमालबाबु श्रेष्ठको संयोजकत्वमा वार्ता समिति बनेको प्रमुख जिल्ला अधिकारी गोमादेवी चेम्जोङले जानकारी दिइन् ।

र्‍याफ्टिङ बोट र स्थानीयले बचाए ४० को ज्यान सुनकोसीमा बस दुर्घटना भएको खबर सुनेलगत्तै सुकुटेका युवा उद्धारमा जुटेका थिए । दुर्घटना भएको पाँच मिनेट नबित्दै नदीमा हाम फालेर धेरैलाई बचाउन सफल भएको स्थानीय रमेश खड्काले बताए । ‘यहाँका आधा दर्जन रिसोर्टले तत्कालै र्‍याफ्टिङ बोटको प्रयोग गरे, जसबाट ४० जनालाई उद्धार गर्न सकियो । १० वटा शव निकाल्यौं,’ उनले भने ।

प्रकाशित : कार्तिक १९, २०७६ ०९:१८
पूरा पढ्नुहोस्
प्रतिक्रिया
पठाउनुहोस्
×