गाउँपालिका तोडफोड, सामान कब्जा !

राजेन्द्र मानन्धर

दोलखा — प्रशासनिक केन्द्र कहाँ राख्ने भन्ने विवाद चुलीमा पुगेको कालिञ्चोक गाउँपालिकाको कार्यालयबाट आइतबार राति तोडफोड गर्दै सामानहरु लगिएको छ ।

कालिञ्चोक गाउँपालिका-८ कालिनागथानमा रहेको प्रशासनिक केन्द्रको सामान कब्जामा गर्दै वडा नम्बर ५ को बान्देथलीमा लगिएको छ । उक्त गाउँपालिकाको बहुमतको निर्णयबाट सामान सार्ने कार्य जनताबाट भएको दाबी पालिका अध्यक्ष वीनकुमार थामीले गरे । उनले भने, ‘सामेबारबाट बान्देथलीबाट कार्यालय सञ्चालन हुन्छ ।’

तर उक्त कार्य डकैत शैलीमा भएको दाबी उपाध्यक्ष कालिका पाठकले गरिन् । ‘सात वटा ढोकाहरु फुटालेर लेखा र अन्य महत्पूर्ण समानहरु चोरिनुलाई के भन्ने?,’ उनले भनिन्, ‘यो कार्यलाई लगिएको भन्न मिल्दैन डकैट हो डकैत ।’ प्रहरीलाई खबर गरिकन चोरी गरिएको पनि उनले बताए । सामान उठाएर लगेपछि प्रहरी पुगेको पनि उनले जानकारी दिइन् ।

उक्त गाउँपालिको केन्द्र विवादले झडप, हातपात, कुटाकुटको अवस्थामा गुज्रिरहेको थियो । अध्यक्ष वडा नम्बर ५ को बन्देशली र उपाध्यक्ष कालिनागथानमा केन्द्र राख्न पक्ष र विपक्षमा उत्रेपछि दुईबीच संवादहीनताको स्थिति थियो । केन्द्रको कारणले विकास निर्माणमा नै बाधा परेपछि उक्त पालिका पछिल्लो समय केन्द्र विवाद थाँती राखेर विकास निर्माणमा केन्द्रित थियो । विकास शिविर नाम दिँदै अध्यक्ष र उपाध्यक्ष साथसाथै औपचारिक कार्यक्रममा देखिन्थे ।

परिस्थिति सहज हुँदै गएको अवस्थामा वडा नम्बर ५ का अध्यक्ष सुभास थामीको नेतृत्वमा केन्द्रका सामाग्रीहरु लगिएपछि उक्त पालिका फेरि समस्यामा फसेको छ । वडाअध्यक्ष सुभास थामीले निर्णयवमोजिम पालिकाको प्रशासनिक केन्द्र सारिएको स्वीकार्दै १३ जना जनप्रतिनिधिसहितले कार्यालय सारेको विज्ञप्तिमा उल्लेख गरेका छन् ।

पालिका अध्यक्ष वीनकुमार थामीका अनुसार छ वटा वडाका अध्यक्षसहित जनप्रतिनिधिको रोहवरमा सामान सारिएको दाबी गर्छन् । उनका अनुसार पालिकाको माइन्युट, कार्यालय सञ्चालन गर्न आवश्यक पर्ने हाजिर खाता, कम्प्युटर, प्रिन्टर, राष्ट्रिय झण्डालगायतको सामानमात्रै लगिएको छ । लेखालगायत अन्य सम्बेदनशील कागजपत्र छोइएको पनि छैन । उपाध्यक्ष कालिका पाठक भने लेखाको सामाग्रीमाथि नै बढी क्षति पुर्‍याइएको दाबी गर्छिन् ।

प्रशासनिक केन्द्र विवाद ३ नम्बर प्रदेश सरकारसम्म पुगेको थियो । पालिका अध्यक्ष वीनकुमार थामीकोले प्रक्रिया पुरा गरी पेश गरिएको अवस्थामा पनि वास्ता नगरिएपछि बाध्य भइ रातको समयमा कार्यालय सार्नु परेको बताए । पायक पर्ने स्थानमा केन्द्र राख्ने विषयमा राज्यको कुनै पनि अङ्गले वास्ता नगरेपछि जनताले उक्त कार्य गरेको दाबी पनि उनले गरे । पालिका उपाध्यक्ष पाठकले प्रशासनिक केन्द्र सार्ने विषयमा जबरजस्तीबाहेक कुनै पनि साझा निर्णयहरु नभएको दाबी गरिन् । उक्त विषय छलफलकै क्रममा भएको बेला चोरीको घटना हुनु दुःखद भएको उनले बताइन् ।

प्रकाशित : कार्तिक ४, २०७६ ११:३२
ADVERTISEMENT
प्रतिक्रिया
पठाउनुहोस्
ADVERTISEMENT

रोहितको दोहोरो शतक

(एएफपी)

राँची — रोहित शर्माले आफ्नो खेल जीवनको पहिलो दोहोरो शतक प्रहार गरेपछि भारतले आइतबार तेस्रो तथा अन्तिम टेस्ट पूर्णत: आफ्नो नियन्त्रणमा लिएको छ । भारतले आफ्नो पहिलो इनिङ्स नौ विकेट गुमाएर ४ सय ९७ रनमा टुंगेको घोषणा गरेको छ ।

रोहितले २ सय १२ रन बनाए । उनले चौथो विकेटमा अजिन्के रहानेसँग मिलेर २ सय ६७ रनको साझेदारी पनि गरे । दोस्रो दिनको खेल समाप्त हुँदा दक्षिण अफ्रिका संकटतर्फ अग्रसर छ । उसले ९ रन बनाउँदासम्म दुई विकेट गुमासकेको छ । भारतीय फास्ट बलरले राँचीमा पाहुना टिमका दुवै प्रारम्भिक ब्याट्सम्यानलाई पेभिलियन फर्काइसेका छन् । दक्षिण अफ्रिकाका लागि जुबयर हाम्जा शून्य र कप्तान फाफ डे फलेसिस एक रन बनाएर खेलिरहेका छन् । खराव प्रकाशका कारण लगातार दोस्रो दिन खेल चाँडै रोकिएको छ ।

पेस बलर मोहम्मद सामीले इनिङ्सको दोस्रो बलमै बायाँहाते ब्याट्सम्यान डिन एल्गरलाई शून्यमा आउट पारे । त्यसलगत्तै उमेश यादवले क्विन्टन डे ककलाई चार व्यक्तिगत रनमा आउट पारे । उमेशले फालेको बाउन्सर उनको ग्लोभमा लागेर गएको थियो र त्यसमा क्याच लिन विकेटकिपर
रिद्दिमान साहले कुनै भुल गरेनन् । दिनको खेल भने रोहितको नाममा रहयो । उनले दक्षिण अफ्रिकी पेसम्यान लन्गी एनगिडीको बलमा छक्का प्रहार गर्दै आफ्नो दोहोरो शतक पूरा गरे ।

लन्चपछिको तेस्रो ओभरमा प्राप्त यो सफलतापछि उनलाई घरेलु दर्शकले उभिएर अभिनन्दन पनि गरे । लयमा देखिएका प्रारम्भिक ब्याट्सम्यान रोहितले लगत्तै एनगिदीको बलमा अर्को छक्का प्रहा गरे । त्यसपछि उनी रबाडामा बलमा आउट भए । प्रारम्भिक ब्याट्सम्यानको रूपमा डेब्यु खेलमै दुवै इनिङ्समा शतक बनाएका उनले म्याराथन साझेदारी गर्दै भारतलाई मबजुत स्थितितर्फ लगे । उनलाई बलियो साथ दिन रहानले १ सय १५ रन बनाए । यसै क्रममा रोहितले वेस्ट इन्डिजविरुद्ध सन् २०१३ मा बनाएको व्यक्तिगत उत्कृष्ट १ सय ७७ रनको प्रदर्शनलाई पनि उछिने । एकदिवसीय अन्तर्राष्ट्रिय करियरमा तीन दोहोरो शतक बनाइसकेका रोहितले बललाई मैदानको चारै दिशामा प्रहार गर्ने क्रममा २ सय ५५ बलको सामना गरे र २८ चौका तथा छक्का प्रहार गरे ।

रहानले भने ८३ रनबाट अगाडि खेल्न सुरु गरेका थिए । उनी लिन्डेको पहिलो टेस्ट विकेट रहे । विहानको सेसनमा आउट हुने उनी मात्र रहे । दिउसोको सेसनमा भने उनले ५१ रन बनाएका रवीन्द्र जडेजालाई पनि आउट पारे । उनले १ सय ३३ रनमा चार विकेट लिए ।

प्रकाशित : कार्तिक ४, २०७६ ११:३१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT