राजमार्ग अवरुद्ध

अविरल वर्षाका कारण नमोबुद्ध–५ स्थित पशुपति रोडा ढुंगा उद्योग (खानी) र मनकामना एग्रिगेट प्रालि (क्रसर) ले थुपारेको धुलो बगाउँदा बीपी राजमार्ग अवरुद्ध भएको हो । वर्षापिच्छे त्यहाँ अवरुद्ध हुँदै आएको छ ।

राजमार्गमै क्षति पुग्ने गरी खानी तथा क्रसर उद्योग सञ्चालन हुँदा पनि स्थानीय सरकार निरीह छन् । जिल्ला समन्वय समिति प्रमुख उद्धव केसीले कारबाही प्रक्रिया अघि बढाउने बताए । ‘राजमार्गमा रहेको क्रसरका कारण नियमित समस्या आउन थाल्यो,’ उनले भने, ‘कारबाही प्रक्रिया अघि बढाउन प्रदेशलाई लेख्छौं ।’

खोला मिचेर सञ्चाललमा रहेका खानी तथा क्रसरले थुपारेको धूलोका कारण खोलाको सतह बढेको छ भने बहाव परिवर्तन हुँदा राजमार्गका पुल जोखिममा छन् । खेतीयोग्य जमिन बगरमा परिणत भएका छन् । ०७० बाट बिनानवीकरण सञ्चालन भइरहेका क्रसर उद्योगहरूबाट स्थानीय तहले राजस्व भने उठाइरहेका छन् । जिल्लामा सञ्चालित कुनै पनि क्रसर उद्योग मापदण्डअनुसार चलेका छैनन् ।