मेलम्ची आयोजना पीडित र प्रहरीबीच झडप, हवाई फायर र अश्रुग्यास प्रहार

अनिश तिवारी

सिन्धुपाल्चोक — मेलम्ची खानेपानी आयोजनाको काम गरेबापतको रकम माग्दै आन्दोलनमा उत्रिएका पीडितमाथि प्रहरीले हस्तक्षेप गरेको छ । आन्दोलनरत मजदुर तथा सप्लायर्समाथि बिहीबार दिउँसो प्रहरीले हवाई फायरका साथै अश्रुग्याास प्रहार गरेको हो ।

फाइल तस्बिर

इटालियन ठेकेदार कम्पनी सिएमसीले एक अर्ब ६८ करोड रुपैयाँ नतिरी भागेपछि स्थानीयसहित खानेपानीको मुहानस्थलमा आन्दोलित छन् ।

सिएमसीबाट नपाएको रकम सरकारले दिनुपर्ने माग राख्दै आन्दोलनमा उत्रिएका पीडित र प्रहरीबीच अम्बाथान सुरुङ प्रवेश गर्ने स्थानमा झडप भएको थियो । प्रहरीले रबरको गोली र अश्रुग्यास प्रहार गर्दा २ जना प्रदर्शनकारी घाइते भएका छन् । झडपमा केही प्रहरीसमेत घाइते भएका छन् ।

आयोजना पीडित संघर्ष समिति संयोजक विष्णुमणि आचार्यका अनुसार मजदुरहरु सन्तोष चौधरी र बालमुकुन्द अधिकारी घाइते भएका हुन् ।

आन्दोलनकारीले आयोजनाका उपकरणहरु तोडफोड गरेका जिल्ला प्रहरी कार्यालयका डिएसपी माधवप्रसाद काफ्लेले जानकारी दिए । सिएमसीले ठेक्का तोडेर ९ महिनाअघि नै हिडेको थियो । सीएमसी आफ्नै देश फर्केयता मेलम्चीको काम ठप्प छ ।

आयोजना र नेपाल सरकारले जफत गरेको रकम आफूहरुले पाउनुपर्ने माग उनीहरुको छ । सिएमसीको धरौटी, आयोजनाबाट भुक्तानी हुन बाँकी, एक अर्ब मूल्य बराबरको उपकरण, निर्माण सामग्री लगायत रकम आयोजना र सरकारले जफत गरेको थियो ।

मोटर लगायतका उपकरण सप्लाई गरेको बिरा मोटर्सले मात्रै सिएमसीसँग ८० करोड रुपैयाँ लिन बाँकी छ । सिएमसीले ठेक्का तोडेपछि अहिले मेलम्चीलाई काठमाडौं लैजाने जिम्मा चिनियाँ सिनो हाइड्रो कम्पनीले पाएको छ ।

प्रकाशित : भाद्र १९, २०७६ १८:०१
प्रतिक्रिया
पठाउनुहोस्

कालिञ्चोकको अवैध संरचना हटाउन पुनः सूचना

राजेन्द्र मानन्धर

दोलखा — धार्मिक तथा पर्यटकीय क्षेत्र कालिञ्चोक क्षेत्रका अवैध घरटहरा तथा संरचना हटाउन जिल्ला प्रशासन कार्यालयले दोस्रो पटक सूचना जारी गरेको छ ।

पहिलोपटक जारी सूचनालाई वास्ता नगरिएपछि दोस्रोपटक प्रशासनले फेरि सूचना जारी गरेको हो । सदरमुकाम चरिकोटबाट १७ किलोमिटर दूरीमा रहेको प्राकृतिक सुन्दरस्थल कालिञ्चोकमा एक सय भन्दा बढी अवैध संरचनाहरु छन् ।

केबलकारदेखि ठूला लगानीका होटलहरुले कालिञ्चोकको बेसक्याम्प ठानिने कुरीको मैदान भरिएका छन् । त्यस्तै घ्याङडाँडाको मैदानमा पनि घरटहरा थपिदैछ । तीन हजार आठ सय ४२ मिटर अग्लो कालिञ्चोक मन्दिरको केही तलपनि अतिक्रमण बढ्न थालेपछि जिल्ला प्रशासनले पटकपटक सूचना जारी गर्नु परेको प्रमुख जिल्ला अधिकारी खगेन्द्रप्रसाद रिजालले बताए ।

मन्दिर दर्शन र रमाइलो दृष्य हेर्न मानिसहरुको घुइँचो लाग्ने उक्त क्षेत्र सामुदायिक वन क्षेत्र की गुठी संस्थानको भन्ने विवाद कायमै छ । गुठी संस्थानको स्थानीय जिम्मेवार प्रतिनिधि प्रमुख जिल्ला अधिकारीलाई बनाइएको छ । तर, जिल्ला वन कार्यालयले आफ्नो पेरीफेरी भन्दै उक्त सम्बन्धमा प्रमुख जिल्ला अधिकारीले बोलाएको बैठकहरुमा फरक मत दर्ज गर्दै आएको छ ।

दुई सरकारी निकायबीचको विवादको फाइदा लिदै झनझन संरचनाहरु थपिदै गएको स्थानीयको आरोप छ । पछिल्ला समयमा गुठीसंस्थानले आफ्नो नियमअनुसार जग्गाहरु लिजमा दिन थालेपछि अनावश्यक अतिक्रमण बढेको स्थानीयको भनाई छ । गुठी संस्थाले करिब ४२ वटा घर टहरा तथा एउटा केबल कारलाई मात्रै लिज दिएको दाबी गरेको छ । करिब तीन महिनाअघि जिल्ला प्रशासन कार्यालयले तयार पारेको सूचीमा करिब एक सय घर टहराहरु थिए ।

गुठी संस्थानले लिजमा नियमसम्वत दिएको संरचनाबाहेक अन्यलाई अवैध ठान्छ । तर जिल्ला वनले भने उक्त क्षेत्रमा बनिरहेको सबै घरटहरा र संरचना अवैध दाबी गर्दै आएको छ । जिल्ला वनले गुठी संस्थानबाट स्वीकृति लिएर सञ्चालित केबल कारसमेत भत्काउनुपर्ने जिकिर गर्दै आएको छ ।

पछिल्लो समयमा संरचना थपिने क्रम बढेपछि प्रजिअसहितको सुरक्षा टोलीले निरीक्षण गरेको थियो । निरीक्षणको क्रममा प्रहरी चौकी राख्न घडेरी बनाइएको जग्गासमेत अतिक्रमणमा परेको पाइएको थियो । अवैध रुममा ठड्याइएका घर टहरा र अन्य संरचना नभत्काइ सूचनालाई अटेर गरे कारबाही गरिने प्रजिअ रिजालले जानकारी दिए ।

प्रकाशित : भाद्र १९, २०७६ १७:३०
पूरा पढ्नुहोस्
प्रतिक्रिया
पठाउनुहोस्