प्रदेशसभामा चार विधेयक पेस

सवारी, लोकसेवा आयोग, प्रदेशसभा सचिवालय र सार्वजनिक निजी सहकारी साझेदारी सम्बन्धमा व्यवस्था गर्न बनेको विधेयक पेस गरिएको छ
सुवास विडारी

मकवानपुर — झन्डै दुई महिनापछि आइतबार सुरु प्रदेशसभामा चार वटा नयाँ विधेयक पेस भएका छन् । प्रदेश सवारी ऐन संशोधन गर्न बनेको विधेयक, प्रदेश लोकसेवा आयोग गठन, काम, कर्तव्य, अधिकार र कार्यविधिका सम्बन्धमा व्यवस्था गर्न बनेको विधेयक प्रदेशसभामा पेस भएको हो ।

प्रदेशसभा बैठकमा आइतबार सहभागी प्रदेशसभा सदस्यहरू ।   तस्बिर : सुवास/कान्तिपुर

त्यस्तै, प्रदेशसभा सचिवालय सम्बन्धमा व्यवस्था गर्न बनेको ऐन, २०७५ लाई संशोधन गर्न बनेको विधेयक र सार्वजनिक निजी सहकारी साझेदारी सम्बन्धमा व्यवस्था गर्न बनेको विधेयक पनि पेस भएको छ ।

सभामा दुईवटा विधेयकको प्रतिवेदन पनि पेस भएको छ । सूचनाको हक सम्बन्धमा व्यवस्था गर्न बनेको विधेयकमाथि प्रदेश मामिला समितिले तयार पारेको प्रतिवेदन पेस भएको हो । प्रदेश मामिला समितिका सभापति माधव पौडेलले प्रतिवेदन पेस गरेका हुन् ।

मदनकुमार भण्डारी स्वास्थ्य विज्ञान प्रतिष्ठानका सम्बन्धमा व्यवस्था गर्न बनेको विधेयकमाथिको प्रतिवेदन पनि पेस भएको छ । कृषि, स्वास्थ्य तथा शिक्षा समितिका सभापति घनश्याम दाहालले उक्त विधेयकमाथिको प्रतिवेदन पेस गरेका हुन् । यसैगरी प्रदेशसभाबाट पारित भएका पाँचवटा विधेयक प्रमाणीकरण भएको छ ।

प्रदेश प्रमुख अनुराधा कोइरालाले विभूषण सिफारिस तथा सम्मान र पदक सम्बन्धमा कानुनी व्यवस्था गर्न बनेको विधेयक, प्रदेश विनियोजन विधेयक, प्रदेश आर्थिक विधेयक, प्रदेश आर्थिक ऐन २०७५ लाई संशोधन गर्न बनेको विधेयक तथा प्रदेश जलचरासम्बन्धी व्यवस्था गर्न बनेको विधेयक प्रमाणीकरण गरेकी हुन् । हालसम्म ३५ वटा विधेयक प्रमाणीकरण भइसकेका छन् ।

यसैबीच प्रदेश सरकारलाई जिम्मेवार बन्न सांसदहरूले आग्रह गरेका छन् । प्रदेश सरकार गठन भएको १८ महिनाको अवधि बितिसक्दा पनि जिम्मेवार ढंगबाट जनताको समस्याप्रति प्रस्तुत नभएको आरोप सांसदहरूले लगाएका छन् । आइतबार प्रदेशसभा बैठकको विशेष समयमा बोल्ने सांसदहरूले प्रदेश सरकार जनताको दैनिक समस्या समाधानमा केन्द्रित नभएको आरोप लगाए ।

सांसदहरूले विपद्पछिको व्यवस्थापनमा प्रदेश सरकारले ठोस काम गर्न नसकेको, प्रदेशको स्थायी राजधानी र नामकरणबाट पछाडि हटेको तथा प्रदेशसभाको बैठक बोलाउन ढिलाइ गरेको भन्दै सत्तापक्ष र प्रतिपक्ष सांसदहरूले प्रदेश सरकारकै आलोचना गरेका थिए ।

प्रदेशसभा बैठकको विशेष समयमा बोल्दै सांसद विशाल खड्काले विपद्को समयमा प्रदेश सरकारले आफ्नो उपस्थिति देखाउन नसकेको बताए । ‘दोलखामा विपद्पछि ठूलो क्षति भएको छ,’ उनलेभने, ‘ तर यसबीचमा त्यहाँका जनताले खासै राहत महसुस गर्न पाएका छैनन् । जनताले प्रदेश सरकारको उपस्थिति महसुस गर्न सकेनन् ।’

संघीयता कार्यान्वयन मामलामा प्रदेश सरकार जिम्मेवार हुनुपर्ने भन्दै उनले प्रदेशको उपस्थिति जनताले महसुस गर्न सक्नुपर्छ । उनले दोलखाको केही बस्ती नै स्थानान्तरण गर्नुपर्ने सुझाव दिए । प्रदेश सरकारले विपद्मा परेर मृतकका परिवार र घाइतेको उपचारका लागि घोषणा गरेको राहत अझैसम्म वितरण गर्न सकेको छैन ।

सांसद सरस्वती बस्नेतले दोलखाको गौरीशंकर गाउपालिकाका केही बस्ती स्थानान्तरण गर्नुपर्ने भन्दै मुख्यमन्त्रीको ध्यानाकर्षण गराइन् । ‘दोलखामा कतिपय ग्रामीण सडकको अवस्था कमजोर छ,’ उनले भनिन्, ‘बाढीपहिरोको कारण भएको क्षतिमा प्रदेश सरकारले ध्यान दिन सकेको देखिएन ।’

कांग्रेस सांसद निमा लामाले विपद्को समयमा सरकारले आफूहरूलाई छलफलको अवसर पनि नदिएको भन्दै असन्तुष्टि व्यक्त गरे । ‘६० दिनपछि हामी प्रदेशसभाको बैठक बसेको छ,’ उनले भने, ‘प्रदेशको वस्तुस्थितिका विषयमा हामीले जानकारी पाउनुपर्छ कि पर्दैन ? सोहीअनुसार हामीले यहाँ छलफल गर्नुपर्थ्यो । यसबाट सरकारले हामीलाई वञ्चित गराएको छ ।’

सांसद लालकुमारी पुनले वर्षातपछिको विपद्का कारण ठूलो भौतिक क्षति भएको भन्दै प्रदेश सरकारले घोषणा गरेको राहत अपुग भएको बताइन् । ‘प्रदेश सरकारले स्थानीय तहलाई ५० लाख दिने निर्णय गरेको छ,’ उनले भनिन्, ‘यो रकम अपुग छ । ठूलो मात्रामा भौतिक संरचनाको क्षति भएको छ ।

यसलाई छिटोभन्दा छिटो व्यवस्थित गर्न जरुरी छ ।’ यस्तै, केशवराज पाण्डेले सरकार र सदनको तर्फबाट एकमुष्ट राहतको घोषणा गर्नुपर्ने बताए । सडक सञ्जाल अत्यन्त अव्यवस्थित भएको भन्दै उनले प्रदेश सरकारले यसतर्फ ध्यान दिन जरुरी रहेको औंल्याए ।

प्रकाशित : भाद्र ९, २०७६ ०७:१७
प्रतिक्रिया
पठाउनुहोस्

गेर्खुटार खोलाले डाइभर्सन बगाएर सास्ती

कृष्ण थापा

गेर्खुटार, नुवाकोट — चीनको केरुङबाट विद्युतीय सामग्री लिएर काठमाडौं हिँडेका ट्रक चालक विदुरनगरपालिका २ का कृष्ण रावल बेत्रावतीमा रोकिए । उनको शुक्रबार राति काठमाडौं पुग्ने योजना थियो तर भारी वर्षाका कारण पासाङ ल्हामु मार्गको गेर्खुखोलामा आएको बाढीले अस्थायी डाइभर्सन बगाएपछि उनी बेत्रावतीमा बास बस्नुपर्‍यो ।

रसुवागढी नाकाबाट शुक्रबार राति ९ बजे सामान लिएर आइपुगेका रावलसहित दर्जनौं गाडीचालकको बास नुवाकोट र रसुवा बेत्रावतीमा र केहीको रसुवाको कालिकास्थान भयो । विदुरनगरपालिका १ र १० वडाको सिमाना गेर्खुखोलाले डाइभर्सन बगाएपछि उनीहरूको बास बाटामा भएको बताए ।

‘राति आइयो,’ रावलले भने, ‘धन्न त्यहाँ होटल रहेछ र खाना खाएर गाडीमै सुतियो । नत्र भोकै परिन्थ्यो ।’ उनी एक्लो भने होइनन् । चितवनका राजु भुजेलको अवस्था उस्तै छ । चीनको केरुङ नाका हुँदै रसुवागढी र टिमुरेमा भन्सार पास गरेर उनले स्याउ ल्याएका थिए । ‘आउँदै गरेको बाटो त खोलाले बगाइसकेछ,’ उनले भने, ‘स्थायी रूपमा पुल बनेको भए समयमा सामान काठमाडौं पुर्‍याइन्थ्यो । गाडीमा बास बस्नुपर्ने थिएन ।’

शुक्रबार राति आएको बाढीले अस्थायी रूपमा बनाइएको डाइभर्सन बगाएपछि सडक अवरुद्ध भइरहेको जिल्ला ट्राफिक कार्यालयका इन्चार्ज विकल भट्टराईले बताए । ट्राफिकका अनुसार उक्त सडक खण्डमा दैनिक ३५ सयभन्दा बढी साना र ठूला सवारी आवतजावत गर्छन् । सडक खण्डको बेत्रावतीपट्टि दर्जन सवारी रोकिएका थिए भने ढुंगेपट्टि पनि दुई दर्जन सानाठूला सवारी रोकिए ।

रसुवाको टिमुरेको रसुवा भन्सार यार्डमा ४०–५० वटा ट्रक र कन्टेनर रोकिएको भन्सार छुटेर आएका भुजेलले बताए । त्यति मात्र नभई पछिल्लो समय स्थलमार्ग हँदै मानसरोवर जाने तीर्थयात्री यही सडक हुँदै आवतजावत गर्छन् । यात्राका क्रममा सडक अवरोध भएपछि उनीहरू बीच बाटामै सवारीसाधनभित्र बास बस्न बाध्य छन् । यही सडकखण्ड हुँदै चीनको नाका केरुङ र रसुवासँग जोड्ने मुख्य मार्ग हो ।

सिन्धुपाल्चोकको तातोपानी नाका जाने सडक खण्ड अवरोध भएपछि रसुवागढी नाका सञ्चालनमा आएको हो । केही दिनयता गेर्खुटारखोलामा अस्थायी डाइभर्सन बनाउने र खोलाको भेलले भत्काउने खेल जारी छ । यही सडक गल्छी—त्रिशूली—मैलुङ–स्याफ्रुबेसी–रसुवागढी सडक आयोजनाले निर्माण गरिरहेको छ । आयोजनाको ठेकेदार कम्पनी कोभेक–तुण्डी–रसुवा कन्स्ट्रक्सनले निर्माण गरिरहेको छ ।

उक्त सडक खण्डमा पर्ने पक्की पुलको ठेक्का हिमदुङ एन्ड थोकरले लिएको आयोजनाले जनाएको छ । आयोजनाका अनुसार पुल एकातिर, खोला अर्कोतिर बगेपछि खोलाले अस्थायी डाइभर्सन बगाउने क्रम रोकिएको छैन । सडक आयोजनाका ठेकेदार कम्पनी तुण्डीले पुल निर्माणछेउ आफ्नो कार्यक्षेत्र नपरे पनि मानवीय र सडक अवरोधका कारण अस्थायी डाइभर्सन बनाइरहेको आयोजनाले जनायो ।

तुण्डीले बिहीबार, शुक्रबार र शनिबार पनि अस्थायी डाइभर्सन बनाएर यातायात आवतजावत गराइरहेको छ तर स्थायी रूपमा खोलामा पुल निर्माण ढिलाइले समस्या यथावत रहेको छ ।

पासाङल्हामु मार्ग भासियो
रसुवा– पासाङल्हामु मार्गको सदरमुकाम धुन्चे नजिकै ब्राबल खण्डमा सडक भासिएर यातायत अवरुद्ध भएको छ । शनिबार रातिको अविरल वर्षाले भासिएको सडक आइतबार बिहान मर्मत गरिएको थियो । मर्मत गरेको करिब तीन घण्टामै पुनः भासिएपछि यातायात अवरुद्ध भएको प्रमुख जिल्ला अधिकारी अर्जुन भण्डारीले बताए ।

उनले भने, ‘भासिएको स्थानमा सडक निर्माण गर्ने कार्य भइरहेको छ ।’ सडकको कुनातर्फ ब्रेकर लगाएर पहरो काट्ने काम भइरहेको छ । साना यातायात आजै चल्न मिल्ने गरी निर्माणकार्य भइरहेको भण्डारीले जनाए । चीनसँगको प्रमुख व्यापारिक नाका रसुवागढी पुग्ने सडक यही नै हो ।

सडक अवरुद्ध हुँदा चीनको केरुङबाटसामान लिएर आएका कन्टेनर बाटामै रोकिएका छन् । पासाङल्हामु मार्गको स्याउबारी, राम्चे, ग्राङ र मूलखर्क, खोपाङको भीर, सानो भार्कु लगायत धेरै ठाउँमा पहिरोको समस्या छ । त्यस्तै, स्याफ्रुबेंसी रसुवागढी सडक खण्डको अवस्था पनि उस्तै छ । उक्त सडक खण्डमा पहिरोको जोखिम धेरै रहेको छ ।

प्रकाशित : भाद्र ९, २०७६ ०७:१६
पूरा पढ्नुहोस्
प्रतिक्रिया
पठाउनुहोस्