गेर्खुटार खोलाले डाइभर्सन बगाएर सास्ती

कृष्ण थापा

गेर्खुटार, नुवाकोट — चीनको केरुङबाट विद्युतीय सामग्री लिएर काठमाडौं हिँडेका ट्रक चालक विदुरनगरपालिका २ का कृष्ण रावल बेत्रावतीमा रोकिए । उनको शुक्रबार राति काठमाडौं पुग्ने योजना थियो तर भारी वर्षाका कारण पासाङ ल्हामु मार्गको गेर्खुखोलामा आएको बाढीले अस्थायी डाइभर्सन बगाएपछि उनी बेत्रावतीमा बास बस्नुपर्‍यो ।

रसुवागढी नाकाबाट शुक्रबार राति ९ बजे सामान लिएर आइपुगेका रावलसहित दर्जनौं गाडीचालकको बास नुवाकोट र रसुवा बेत्रावतीमा र केहीको रसुवाको कालिकास्थान भयो । विदुरनगरपालिका १ र १० वडाको सिमाना गेर्खुखोलाले डाइभर्सन बगाएपछि उनीहरूको बास बाटामा भएको बताए ।

‘राति आइयो,’ रावलले भने, ‘धन्न त्यहाँ होटल रहेछ र खाना खाएर गाडीमै सुतियो । नत्र भोकै परिन्थ्यो ।’ उनी एक्लो भने होइनन् । चितवनका राजु भुजेलको अवस्था उस्तै छ । चीनको केरुङ नाका हुँदै रसुवागढी र टिमुरेमा भन्सार पास गरेर उनले स्याउ ल्याएका थिए । ‘आउँदै गरेको बाटो त खोलाले बगाइसकेछ,’ उनले भने, ‘स्थायी रूपमा पुल बनेको भए समयमा सामान काठमाडौं पुर्‍याइन्थ्यो । गाडीमा बास बस्नुपर्ने थिएन ।’

शुक्रबार राति आएको बाढीले अस्थायी रूपमा बनाइएको डाइभर्सन बगाएपछि सडक अवरुद्ध भइरहेको जिल्ला ट्राफिक कार्यालयका इन्चार्ज विकल भट्टराईले बताए । ट्राफिकका अनुसार उक्त सडक खण्डमा दैनिक ३५ सयभन्दा बढी साना र ठूला सवारी आवतजावत गर्छन् । सडक खण्डको बेत्रावतीपट्टि दर्जन सवारी रोकिएका थिए भने ढुंगेपट्टि पनि दुई दर्जन सानाठूला सवारी रोकिए ।

रसुवाको टिमुरेको रसुवा भन्सार यार्डमा ४०–५० वटा ट्रक र कन्टेनर रोकिएको भन्सार छुटेर आएका भुजेलले बताए । त्यति मात्र नभई पछिल्लो समय स्थलमार्ग हँदै मानसरोवर जाने तीर्थयात्री यही सडक हुँदै आवतजावत गर्छन् । यात्राका क्रममा सडक अवरोध भएपछि उनीहरू बीच बाटामै सवारीसाधनभित्र बास बस्न बाध्य छन् । यही सडकखण्ड हुँदै चीनको नाका केरुङ र रसुवासँग जोड्ने मुख्य मार्ग हो ।

सिन्धुपाल्चोकको तातोपानी नाका जाने सडक खण्ड अवरोध भएपछि रसुवागढी नाका सञ्चालनमा आएको हो । केही दिनयता गेर्खुटारखोलामा अस्थायी डाइभर्सन बनाउने र खोलाको भेलले भत्काउने खेल जारी छ । यही सडक गल्छी—त्रिशूली—मैलुङ–स्याफ्रुबेसी–रसुवागढी सडक आयोजनाले निर्माण गरिरहेको छ । आयोजनाको ठेकेदार कम्पनी कोभेक–तुण्डी–रसुवा कन्स्ट्रक्सनले निर्माण गरिरहेको छ ।

उक्त सडक खण्डमा पर्ने पक्की पुलको ठेक्का हिमदुङ एन्ड थोकरले लिएको आयोजनाले जनाएको छ । आयोजनाका अनुसार पुल एकातिर, खोला अर्कोतिर बगेपछि खोलाले अस्थायी डाइभर्सन बगाउने क्रम रोकिएको छैन । सडक आयोजनाका ठेकेदार कम्पनी तुण्डीले पुल निर्माणछेउ आफ्नो कार्यक्षेत्र नपरे पनि मानवीय र सडक अवरोधका कारण अस्थायी डाइभर्सन बनाइरहेको आयोजनाले जनायो ।

तुण्डीले बिहीबार, शुक्रबार र शनिबार पनि अस्थायी डाइभर्सन बनाएर यातायात आवतजावत गराइरहेको छ तर स्थायी रूपमा खोलामा पुल निर्माण ढिलाइले समस्या यथावत रहेको छ ।

पासाङल्हामु मार्ग भासियो
रसुवा– पासाङल्हामु मार्गको सदरमुकाम धुन्चे नजिकै ब्राबल खण्डमा सडक भासिएर यातायत अवरुद्ध भएको छ । शनिबार रातिको अविरल वर्षाले भासिएको सडक आइतबार बिहान मर्मत गरिएको थियो । मर्मत गरेको करिब तीन घण्टामै पुनः भासिएपछि यातायात अवरुद्ध भएको प्रमुख जिल्ला अधिकारी अर्जुन भण्डारीले बताए ।

उनले भने, ‘भासिएको स्थानमा सडक निर्माण गर्ने कार्य भइरहेको छ ।’ सडकको कुनातर्फ ब्रेकर लगाएर पहरो काट्ने काम भइरहेको छ । साना यातायात आजै चल्न मिल्ने गरी निर्माणकार्य भइरहेको भण्डारीले जनाए । चीनसँगको प्रमुख व्यापारिक नाका रसुवागढी पुग्ने सडक यही नै हो ।

सडक अवरुद्ध हुँदा चीनको केरुङबाटसामान लिएर आएका कन्टेनर बाटामै रोकिएका छन् । पासाङल्हामु मार्गको स्याउबारी, राम्चे, ग्राङ र मूलखर्क, खोपाङको भीर, सानो भार्कु लगायत धेरै ठाउँमा पहिरोको समस्या छ । त्यस्तै, स्याफ्रुबेंसी रसुवागढी सडक खण्डको अवस्था पनि उस्तै छ । उक्त सडक खण्डमा पहिरोको जोखिम धेरै रहेको छ ।

प्रकाशित : भाद्र ९, २०७६ ०७:१६
प्रतिक्रिया
पठाउनुहोस्

एउटै पुल दुई पटक उद्घाटन

कान्तिपुर संवाददाता

सिन्धुपाल्चोक — बलेफी र त्रिपुरासुन्दरी गाउँपालिका जोड्ने मोटरबेल पुलको बाजागाजासहित शनिबार दोस्रो पटक उद्घाटन भइरहँदा स्थानीय खुबै अचम्मित देखिन्थ्ये । गत चैतमा तयार भइसकेको पुल एक महिनाअघि स्थानीयले खाबो हटाउँदै उदघाट्न गर्दै सुचारु गरेका थिए ।

सिन्धुपाल्चोकको बलेफी–त्रिपुरासुन्दरी गाउँपालिका जोड्ने पुल उदघाटनमा सहभागीहरू । तस्बिर : कान्तिपुर 

अहिले भौतिक पूर्वाधार तथा यातायात मन्त्री रघुवीर महासेठसहित प्रदेशमन्त्री, सांसदको जम्बो टोलीले रिबन काट्दै पुल सञ्चालन भएको घोषणा गरे ।
‘यो कस्तो अचम्म हो, एउटै पुलको दुई पटक उदघाट्न भयो, बाँच्नु मात्रै पर्दोरहेछ अनेक देख्न पाइने रहेछ,’ दुवै उदघाट्नमा सहभागी ६० वर्षीय सोनाम लामाले भने । बलेफी ८ र त्रिपुरासुन्दरी ६ जोड्ने सुनकोसी मोटरबेल पुल नेता, मन्त्री र सांसदले उद्घाटन गर्ने खबर पाएका स्थानीयले खुब कुर्नुपरेको उनले सुनाए ।
चैतमै सकिएको पुल निर्माण वर्षात सक्दा पनि ठूलाको उद्घाटन पर्खाएर सञ्चालनमा ल्याइएको थिएन । ‘६ महिनापछि बल्ल ठूला मान्छेबाट उदघाट्न भयो, त्यही प्रवृत्तिलाई लत्याएर उबेला स्थानीयले चलाइसके,’ उनले भने । कार्यक्रममा मन्त्री महासेठ, प्रदेश ३ का पर्यटन तथा वनमन्त्री अरुण नेपाल, सांसद्वय अग्निप्रसाद सापकोटा र सुरेश नेपालसहित जनप्रतिनिधि उपस्थित थिए ।
६ वर्षमा बन्यो पुल
चरिकोट सडक डिभिजन कार्यालयका इन्जिनियर गार्गल भण्डारीका अनुसार चैत महिनामा सुविधाजनक मोटरवेल पुल सकिएको थियो । दश करोड ९० लाख बराबरको लागतमा बनेको मोटरवेल पुल २०७१ सालमा ठेक्का प्रक्रिया सकेर बनाउन थालिएको थियो ।
०७१ जुरे पहिरो र ०७२ भुकम्प, बर्खापिच्छैको पहिरो, कोसी कटानले बारम्बार अवरोध भएपछि पुलको काम रोकियो । विपत्ती सहँदै सोवर्ण निर्माण सेवा कम्पनी ठेकेदार अर्जुन थापाले ६ वर्षमा झोलुंगे मोटरवेल पुल निर्माणलाई टुंग्याए ।

प्रकाशित : भाद्र ९, २०७६ ०७:१५
पूरा पढ्नुहोस्
प्रतिक्रिया
पठाउनुहोस्