बासी भात खाँदा १० मजदुर बिरामी
रामेछाप — बासी भात खाँदा रामेछापको गेलुमा निर्माणाधीन मनकामना विद्यालयमा काम गर्ने १० जना मजदुर बिरामी भएका छन् । मन्थली नगरपालिका ११ गेलुको उक्त विद्यालयमा काम गर्ने मजदुरले सोमबार अपराह्न ‘भुटेको भात’ खाएका थिए ।
खाना खाएका सबैलाई पखाला लाग्ने, बान्ता हुने, टाउको दुख्ने र ज्वरोको लक्षण देखिएको थियो । मजदुरहरुलाई मेसमा खानाको प्रबन्ध गरिएको र त्यसैमा विषाक्त मिसिएको अनुमान गरिएको छ ।
एसियाली विकास बैंकको सहयोगमा राष्ट्रिय पुनर्निर्माण प्राधिकरणमार्फत विद्यालय भवन निर्माण भइरहेको छ । निको नभएपछि सबै मजदुरलाई मंगलबार अपराह्न मन्थलीको तामाकोसी अस्पतालमा भर्ना गरिएको छ ।
अस्पतालकी चिकित्सक डा. शुभलक्ष्मी कुँवरका अनुसार सबै मजदुरलाई ज्वरो देखिएको छ ।
प्रकाशित : भाद्र ३, २०७६ १९:१४प्रतिक्रिया