ग्राहकलाई दुर्व्यवहार गर्ने होटेल सञ्चालक पक्राउ

हरिहरसिंह राठौर

धादिङ — ग्राहकलाई दुर्व्यवहार गरेको आरोपमा नौबिसेका होटेल व्यवसायीलाई स्थानीय प्रशासनले पक्राउ गरेको छ ।

पृथ्वीराजमार्गको धुनिबेंसी- ६ नौबिसेमा नास्ता पसल सञ्चालन गर्दै आएका नुवाकोट निवासी पल्पसा क्याफेका २४ वर्षीय कुमार आचार्यलाई खानीखोला प्रहरीमार्फत स्थानीय प्रशासनले नियन्त्रणमा लिएको हो ।
सार्वजनिक सवारी साधनमा आएका ग्राहकले फोहोर भाँडामा खाजा दिएको भनेपछि विवाद हुँदा होटल सञ्चालकले दुर्व्यवहार गरेको उजुरी प्रहरीमा परेको थियो । आचार्यलाई दुर्व्यवहारविरुद्ध सार्वजनिक अपराध विरुद्धको कसुरमा मुद्दा लाग्ने प्रहरीले जनाएको छ ।

प्रकाशित : श्रावण २८, २०७६ २०:१७
प्रतिक्रिया
पठाउनुहोस्

घूस बन्द भएको छैन : मन्त्री यादव

कान्तिपुर संवाददाता

काठमाडौँ — उद्योग, वाणिज्य तथा आपूर्तिमन्त्री मातृकाप्रसाद यादवले आफ्नो मन्त्रालयमा घूस बन्द नभएको बताएका छन् । उनले आफ्नो मन्त्रालयका घूसखोरमाथि कारबाही भइरहेको दाबीसमेत गरे ।

प्रतिनिधिसभामा मंगलबार सांसदहरूका प्रश्नहरूको जवाफ दिने क्रममा मन्त्री यादवले ‘घूस’ लिन खोज्नेहरूविरुद्ध मन्त्रालय कडा रूपमा प्रस्तुत भएको दाबी गरे । ‘त्यस्ता व्यक्तिलाई अख्तियारले कारबाही गरिरहेको छ,’ उनले भने, ‘अनियमितता गर्नेहरू धमाधम पक्राउ परेकाले अहिले बढी चर्चा हुने गरेको छ ।’ उनले अनियमितता र खानीजन्य वस्तुको चोरी निकासी नियन्त्रण गर्नका लागि सघाउन सांसदहरूलाई आग्रह गरे ।

सांसदहरूले मन्त्री यादवसँग महँगी, खनिज वस्तुको चोरी निकासी, तरकारीमा विषादीलगायत विषयमा जिज्ञासा राखेका थिए । जवाफ दिँदै उनले महँगी र अखाद्य वस्तुको प्रयोग विगतकै निरन्तरता भएको दाबी गर्दै यो सरकार आएपछि सबैतिर चौपट भयो भन्ने मानसिकता त्याग्न आग्रह गरे ।

‘विगतमा बिग्रे/भत्केका विषयलाई क्रमशः सुधार्दै लैजान लागेका छौं,’ उनले भने, ‘एकै पटक सबै समस्याको हल हुँदैन ।’ मन्त्री यादवले उपभोक्तालाई हुने हानि नोक्सानीको क्षतिपूर्ति दिलाउन उपभोक्ता संरक्षण ऐन लागू गरिएको जानकारी दिए । ‘बजार अनुगमनलाई व्यापकता दिएका छौं,’ उनले भने, ‘गएको आर्थिक वर्ष १६ सय ६१ वटा अनुगमन गरिएको थियो । चालु आवमा ७४ वटा अनुगमन भइसकेको छ ।’

मन्त्री यादवले सरकारले प्रदेश सरकार र स्थानीय तहको समेत सहभागितामा अनुगमनलाई निरन्तरता दिने दाबी गरे । उनले दैलेखको पेट्रोलियम, जाजरकोटको पत्थर एवं तामा, पर्वत र तनहुँको फलाम, मुस्ताङको युरिनियम तथा सम्भावित क्षेत्रमा सुनखानीको अध्ययन र उत्खननका लागि प्रक्रिया अघि बढाएको जानकारी दिए । उनले चोरी निकासी नियन्त्रण गर्न सुरक्षाकर्मी खटाइएको जानकारी दिँदै विभिन्न भागबाट २ हजार केजी खनिज बरामद गरिएको जानकारी दिए ।

कांग्रेस सांसद दिलेन्द्र बडूले खनिजलाई वैधानिकता दिए चोरी निकासी रोकिने बताए । ‘यसबाट राजस्व आउँछ र व्यवसायीले व्यावसायिक रूपमा काम गर्छन्,’ बडूले भने, ‘सरकारले यस्तो बाटो लिन किन सक्दैन ।’

सांसद प्रेम सुवालले भ्रष्टाचारका कारण काइनेटलगयातका वस्तु चोरी निकासी भएको बताए । उनले चीनबाट कच्चा पदार्थ ल्याउँदा औषधि उत्पादनमा ४० प्रतिशत सस्तो हुने कुरामा सरकारको तयारी के छ भन्दै मन्त्रीको उत्तर माग गरेका थिए ।

प्रकाशित : श्रावण २८, २०७६ २०:०७
पूरा पढ्नुहोस्
प्रतिक्रिया
पठाउनुहोस्