गोसाइँकुण्ड आउने भक्तजनलाई शुल्क नलाग्ने
रसुवा — गोसाइँकुण्डमा मेला भर्न आउने नेपाली तीर्थयात्रीलाई लाङटाङ राष्ट्रिय निकुञ्जले प्रवेश शुल्क नलिने भएको छ । निकुञ्जले २०७५ कार्तिकदेखि स्वदेशी पर्यटकलाई पनि प्रतिव्यक्ती एक सय प्रवेश शुल्क लिदै आएको छ ।
कुण्ड गोसाइँकुण्ड गाउँपालिका –५ लाङटाङ राष्ट्रिय निकुञ्जभित्र पर्दछ । स्वदेश तथा विदेशमा समेत प्रसिद्ध रहेको छ गोसाइँकुण्डमा मेला भर्न आउने भक्तजनहरुलाई प्रवेश शुल्क नलिने लाङटाङ राष्ट्रिय निकुञ्जका प्रमुख संरक्षण अधिकृत सुष्मा रानाले बताइन् ।
मेला साउन २० गतेदेखि ३० गतेसम्म लाग्छ । मेलाको समयमा वार्षिक रूपमा सयौँ तीर्थयात्री आउने गरेका छन् । गोसाइँकुण्डमा प्रत्येक वर्ष गंगादसहरा र साउन शुक्ल पूर्णिमा अर्थात् (जनैपूर्णिमा) गरी वर्षको २ पटक विशेष मेला लाग्ने गर्दछ ।
प्रवेश शुल्क लिन थालेदेखि २०७६ असार मसान्त सम्म ५ हजार ५ सय ५९ स्वदेशी पर्यटक घुम्न आएको लाङटाङ राष्ट्रिय निकुञ्जले बताएको छ । कार्तिक १ गतेदेखि निकुञ्जभित्र घुम्न, अध्ययन, अवलोकन र अनुसन्धानका लागि आउने नेपालीलाई एक सय रुपैयाँ र भरियालाई २५ रुपैयाँ शुल्क लाग्ने निकुञ्जले जनाएको छ ।
यो पनि पढ्नुहोस्ः
प्रकाशित : श्रावण २१, २०७६ १९:२८
