देवघाटमा बगेका युवाको गोताखोरले गर्‍यो सकुशल उद्धार

रमेशकुमार पौडेल

चितवन — देवघाटमा बोलबमको जल लिन नदीभित्र पसेका बेला बगेका एक युवकको सोमबार सशस्त्र प्रहरीको गोताखोर टोलीले सकुशल उद्धार गरेको छ । भरतपुर महानगरपालिका-१३ श्रीपुर फुलबारी गाउँका २५ वर्षीय रमेश परियार देवघाटमा नुहाउने क्रममा नदीमा बगेका थिए । 

बग्दै झण्डै सय मिटर तल पुगेका उनलाई सशस्त्र प्रहरीका गोताखोर ओम सलामी मगरले उद्धार गरेका हुन् ।

सशस्त्र प्रहरीको चितवन कुरिनटारमा रहेको विपद् व्यवस्थपन तालिम शिक्षालयका सशस्त्र प्रहरी नायब निरीक्षक (सई) खिलबहादुर विकको नेतृत्वमा देवघाटमा उद्धार टोली खटिएको थियो । सोमबार बोलबमका लागि जल लिन र चढाउन भक्तहरुको भीड लाग्दछ । ‘त्यही बोलबम मेलामा नुहाउने क्रममा बगेका व्यक्तिलाई गोताखोरहरुले बचाएका हुन्,’ शिक्षालयका प्रमुख सशस्त्र प्रहरीका वरिष्ठ प्रहरी उपरीक्षक किशोर प्रधानले भने ।
शिक्षालयका गोताखोर र उद्धार टोली देशका विभिन्न ठाउँहरुमा खटिने गर्दछ । जिवितै व्यक्ति उद्धार गर्ने घटना बिरलै हुने गर्दछ । ‘टोली ठाउँ ठाउँमा खट्ने गरेको छ । यसअघि जिवितै उद्धार नभएका हैनन् तर देवघाटमा हाम्रा गोताखोरहरुले निकै तदारुकताका साथ काम गरेर एकजना व्यक्तिलाई बचाएका छन् । वर्षाका बेला उर्लेको नदीमा समयको थोरै तलमाथिले पनि जे पनि हुन सक्थ्यो,’ प्रधानले भने ।
घटना मध्यान्ह पौने १२ बजेतिर भएको थियो । बोलबमका लागि जल लिन आउने भक्तहरुको देवघाटमा निकै भीडभाड लाग्ने गरेको छ । १०/१५ वर्षयता भीडभाड बढेर व्यवस्थापन नै गर्नु पर्ने अवस्था आउन लागेको देवघाट क्षेत्र विकास समितिका अध्यक्ष शिवराज पौडेलले बताए । नभए देवघाटमा माघे संक्रान्तिका बेलामा मात्रै नुहाउने आउने चलन थियो । भीड बढ्दै जाँदा सशस्त्र प्रहरीलाई पनि खट्न अनुरोध गरेको पौडेलले बताए ।

प्रकाशित : श्रावण २०, २०७६ १३:४३
प्रतिक्रिया
पठाउनुहोस्

वडा कार्यालय आगजनी

कान्तिपुर संवाददाता

(मुगु) — खत्याड गाउँपालिकाको वडा नम्बर २ को वडा कार्यालय आइतबार राति अज्ञात व्यक्तिले आगजनी गर्दा पूर्ण रुपले ध्वस्त भएको छ । 

वडा अध्यक्ष लालबहादुर मल्लको घरमै वडा कार्यालय संचालन गरिएको थियो । उक्त घर आगजनी गर्दा टक्कबहादुर मल्लको आर बि स्टेशनरी र पदम बुढाको मोबाइलपसल समेत जलेर ध्वस्त भएको पीडितले जनाएका छन् ।

‘राति १२ बजे तिरको कुरो हो हामी अर्को घरमा सुतेका थियौं, अज्ञात व्यक्ति आएर वडा कार्यालय रहेको मेरो घरमा मट्टीतेल छर्केर आगजनी गर्दा घर ध्वस्त भएको छ,’ वडा अध्यक्ष लालबहादुर मल्लले भने ।

कार्यालयको समानसहित धनमाल जलेर खरानी बनेको उनले बताए । आगजनी भएको खबर प्राप्त भएपछि जिल्ला प्रहरी कार्यालय र श्रीकोट प्रहरी चौकीबाट अनुसन्धानको निम्ति सुरक्षाकर्मी खटाइएको प्रहरी नायव उपरिक्षक राजेन्द्रबाबु रेग्मीले बताए ।

प्रकाशित : श्रावण २०, २०७६ १३:४१
पूरा पढ्नुहोस्
प्रतिक्रिया
पठाउनुहोस्