दोलखामा ‘रोपाइँ समिति’

राजेन्द्र मानन्धर

दोलखा — ठाउँठाउँमा विभिन्न खाले समितिहरू बनिरहेकै हुन्छन् । दोलखाको रामकोटमा भने रोपाइँ समिति बनेको छ । समितिले धान रोपाइँको तालिका बनाइदिन्छ । त्यसैका आधारमा दोलखा सदरमुकाम चरिकोटछेऊको खेतमा धमाधम रोपाई भइरहेको छ ।

रोपाइँको निहुँमा वर्षेनी झगडा र झमेला हुन थालेकाले समिति र तालिका प्रकाशनको उपाय निकालिएको हो।

रोपाइँमा झगडाको कारण पानीको स्रोत हो। धान फल्ने राम्रा राम्रा खेत भएको तर पानी कम भएकाले समिति बनाइएको स्थानीय हिमाल न्यौपानेले बताए। ‘समितिले सामूहिक भेला गरी रुटिङ बनाउँछ, त्यसैको आधारमा रोपाइँका दिनहरू तोकिन्छन्,’ उनले भने।

यो उपायले कृषकहरुबीच समन्वय र सदभाव बढेको स्थानीय रामप्रसाद न्यौपानेको भनाई छ। ‘पहिला पहिला रोपाइँ गर्ने बेला आयो की किचलो सुरु हुन्थ्यो,’ उनले भने, ‘अहिले पालो अनुसार अर्मपर्मसहित रोपाइँ भइरहेको छ।’ एक पटक खेतमै दाजुभाइबीच कुटाकुट हुँदा केही घाइतेलाई अस्पताल नै भर्ना गर्नु परेपछि समिति खडा गरिएको उनी बताउँछन्।

दोलखामा यतिखेर रोपाइँको चटारो छ। असार १५ सम्म यस जिल्लामा आधा धान खेत रोपाइँ भइसक्छन्। रामकोट रोपाई समितिले जेठ ९ गतेदेखि असारको २० गतेसम्मको तालिका सार्वजनिक गरेको छ। निर्णयअनुसार प्रत्येक दिन दुई वटा परिवारको खेत रोप्ने कार्य भइरहेको समिति अध्यक्ष भगवान् न्यौपानेले बताए।

रामकोटमा दैनिक दुई परिवारका खेत रोप्न सकिने दुई वटा पानीका मुहान छन्। मुहानलाई न्यायोचित बाँडफाँड गरेकाले पानी अभाव हुन छाडेको उनले जानकारी दिए। उनका अनुसार तालिकाअनुसार पानीको स्रोत उपलब्ध गराइदिने कार्यका लागि प्रति परिवार वार्षिक पाँच सय बुझाउनुपर्छ।
समितिमा सात जना सदस्य छन्। उनीहरुले उक्त बस्तीका झन्डै ७० परिवारका रोपाइँलाई व्यवस्थापन गर्छन्। तालिका निर्माण गर्दा कर्मचारी र शिक्षकलाई प्राथमिकतामा राखिन्छ।

उनीहरूलाई सकेसम्म बिदाको दिन परिने समितिले जनाएको छ। तालिका अनुसार रोपाई हुन थालेपछि खेतालाको समस्या हुन छाडेको छ। मिलाएर रोपाई गर्दा पानी र खेतालाको व्यवस्था हुनाले किसानहरू खुसी देखिन्छन्।

प्रकाशित : असार ११, २०७६ १४:३१
ADVERTISEMENT
प्रतिक्रिया
पठाउनुहोस्

सट्टेबाजीको आरोपमा नगदसहित पक्राउ

रमेशकुमार पौडेल

चितवन — विश्वकप क्रिकेटको विभिन्न खेलमा जीत हार हुने देशलाई आधार बनाएर सट्टेबाजी गरेको आरोपमा चितवन प्रहरीले मङ्गलवार साँझ तीन लाख ४५ हजार रुपैयाँसहित मुकेशकुमार साहलाई पक्राउ गरेको छ ।

नवलपरासी प्रतापपुर गाउँपालिका-८ घर भएका ३३ वर्षीय साह भरतपुर-३ बेलचोकमा डेरा गरेर बस्ने खाद्यान्न व्यापारी भएको प्रहरीले जनाएको छ । उनी बेलचोकबाटै समातिएका हुन् ।

चितवन जिल्ला प्रहरी कार्यालयका डीएसपी एकनारायण कोइरालाको कमाण्डमा खटेको टोलीले साहुलाई मंगलबार बेलुका साढे ८ बजे पक्राउ गरेको हो । विश्वकप क्रिकेटको खेलमा व्यापक सट्टेबाजी भएको भन्ने सूचनाको आधारमा प्रहरीले विभिन्न ठाउँमा सट्टेबाजमा संलग्न व्यक्तिहरूको खोजी गर्दै जाँदा साह पक्राउ परेको चितवन प्रहरीले जनाएको छ ।

प्रहरीले साहको साथबाट नगदका साथै पाँच थान मोबाइल, एउटा ट्याब र विभिन्न बैंक र मनी एक्सप्रेसका भौचरहरू बरामद गरेको छ । ‘मोबाइलबाट ठाउँ ठाउँका व्यक्तिसँग सम्पर्क गर्ने, जित्ने देशको अन्दाज गर्न लगाएर बाजी राख्ने, बैंक र मनी एक्सप्रेसबाट पैसाको कारोबार गर्ने गरेको पत्ता लाग्यो’ डीएसपी कोइरालाले भने । उनले भारतीयहरूलाई समेत सट्टेबाजमा संलग्न गराएको प्रहरीको भनाइ छ ।

साह विरुद्ध मुलुकी अपराध संहिताको सार्वजनिक हित, स्वास्थ्य, सुरक्षा, सुविधा र नैतिकता विरुद्धको महल अन्तर्गत जुवा खेल्न सट्टेबाजी गर्न नहुने अपराधमा मुद्दा चलाइने डिएसपी कोइरालाले बताए ।

प्रकाशित : असार ११, २०७६ १३:३९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×