गोसाइँकुण्डमा ‘ईआईए’

केबलकारका दुइटा योजना प्रस्तावित
कान्तिपुर संवाददाता

रसुवा — गोसाइँकुण्डसम्म केबलकार निर्माण गर्नका लागि दुइवटा संस्थाले वातावरणीय प्रभाव मूल्यांकन (ईआईए) को प्रक्रिया अघि बढाएका छन् । ईआईए गर्न हालसम्म दुई ठाउँबाट प्रस्ताव आएको छ ।

गोसाइँकुण्ड गाउँपालिका र घ्याङफेदी–गोसाइँकुण्ड केबलकार कम्पनी प्रालि महाराजगन्जले प्रक्रिया अघि बढाएको लाङटाङ राष्ट्रिय निकुञ्जले जनाएको छ । केबलकार निर्माण गर्न प्रस्तावित क्षेत्र निकुञ्जभित्र पर्छ । गोसाइँकुण्ड गाउँपालिका–६ सदरमुकाम धुन्चेदेखि वडा ५ मा पर्ने धार्मिक तथा पर्यटकीय तीर्थस्थल गोसाइँकुण्डसम्म केबलकार बनाउने प्रस्ताव छ ।


निर्माण गर्न गाउँपालिका र दुप्चेश्वर गाउँपालिका–१ घ्याङफेदीदेखि गोसाइँकुण्डसम्म केबलकार निर्माण गर्न घ्याङफेदी–गोसाइँकुण्ड केबलकार कम्पनी प्रालि महाराजगन्जले प्रस्ताव अघि बढाएको लाङटाङ राष्ट्रिय निकुञ्जका सूचना अधिकारी शिवलाल गैरेले बताए ।


‘केबलकार बनाउने भनेर दुवै स्थानबाट राष्ट्रिय निकुञ्ज तथा वन्यजन्तु संरक्षण विभागमा प्रस्ताव पेस भएको थियो,’ उनले भने, ‘उक्त प्रस्तावमा विभागले निकुञ्जसँग केबलकारको संरचना रहने फिल्डको अनुगमन तथा प्रिफिजिबिलिटी प्रतिवेदन माग गरेको थियो ।’

केबलकारको संरचना रहने भनिएका दुवै ठाउँमा स्थलगत अध्ययन गरेर निकुञ्जले वातावरणीय प्रभाव मूल्यांकन गर्नका लागि प्रिफिजिबिलिटी प्रतिवेदन विभागमा पठाइसकेको उनले बताए । गोसाइँकुण्ड समुद्र सतहदेखि ४ हजार ३ सय ८० मिटरको उचाइमा छ । दुप्चेश्वरदेखि गोसाइँकुण्डसम्म निर्माण गरिने भनिएको केबलकारको दूरी करिब १० किलोमिटर लम्बाइको हुनेछ ।


उक्त दूरीमा २ देखि ३ वटा टर्मिनल र २५ वटा टावर राखिने कम्पनीले प्रस्ताव गरेको छ । त्यसैगरी सदरमुकाम धुन्चेदेखि गोसाइँकुण्डसम्म निर्माण गरिने केबलकार दूरी करिब ६.५ किमि लामो हुने छ । उक्त दूरीमा २ वटा टर्मिनल र २८ वटा टावर राखिने प्रस्ताव गरिएको छ । सदरमुकाम धुन्चेदेखि–गोसाइँकुण्डसम्म केबलकार निर्माणका लागि गाउँपालिका आफैंले नै पहल गरिरहेको गोसाइँकुण्ड गाउँपालिकाका अध्यक्ष कैसाङनुर्पु तामाङले बताए ।


‘धुन्चेदेखि–गोसाइँकुण्ड केबलकार निर्माणको प्रिफिजिबिलिटी रिर्पोट तयार भइसकेको छ,’ उनले भने । भ्रमणका लागि फ्रान्स पुगेका तामाङले फ्रान्सका लागि नेपाली राजदूत दीपक अधिकारीलाई प्रिफिजिबिलिटी रिर्पोट बुझाएका छन् । केबलकार निर्माणका लागि वातावरण निर्माण तथा प्रचारमा सहयोग पुर्‍याउनका लागि प्रतिवेदन बुझाएको उनले बताए ।


सार्वजनिक निजी साझेदारीमा धुन्चे–गोसाइँकुण्ड केबलकार निर्माण गर्ने योजना गाउँपालिकाको छ । निर्माण गर्न करिब १ अर्ब ७५ करोड लाग्ने प्रारम्भिक अध्यनबाट देखिएको छ । धुन्चे–गोसाइँकुण्ड केबलकार छोटो दूरीको साथै सस्तोमा निर्माण हुने अध्यक्ष तामाङले बताए ।

प्रकाशित : जेष्ठ २६, २०७६ ०७:३२
प्रतिक्रिया
पठाउनुहोस्

सडक सुविधासँगै होटल थपिँदै 

सुजता लामा

सिन्धुलीमाढी — यातायात आवागमनका लागि सडक सडक सुवधिासँगै सिन्धुली होटल खुल्ने क्र म बढेको छ । पछिल्लो समय जिल्लामा ठूला तथा साना लगानीमा होटल खुल्ने क्रम बढिरहेको छ ।

बीपी राजमार्गले काठमाडौं र तराईलाई छोटो दूरीमा जोडेसंँगै होटल खुल्ने क्रम बढेको होटल व्यवसायी संघका महासचिव सीताराम पहाडीले बताए । राजमार्गअन्तर्गत सिन्धुली सदरमुकाम सिन्धुलीमाढी, माझीटार, भिमान, ढुंग्रेबास, भद्रकाली, खनियाँखर्क, खुर्कोट, खाल्टे, मुलकोट, रामटार, झागाझोली र रातमाटा लगायतका क्षेत्रमा होटल खुल्ने क्रम बढिरहेको हो ।

राजमार्ग सञ्चालनले जिल्लामा आन्तरिक तथा बाहृय पर्यटकको आवागमन बढेपछि व्यवसायीहरूले होटलमा लगानी गर्न उत्साहित छन् । नयाँ खोल्ने र पुरानाले सुविधा थप्न थालेपछि होटल व्यवसायमा लगानी बढेको छ । बीपी राजमार्गका छेउछेउमा यात्रुको सुविधाका लागि होटलहरू सञ्चालन हुने क्रम बढेको हो ।

पछिल्लो समय सिन्धुलीमाढीमा सिन्धुली इन र प्रयास होटलजस्ता ठूला लगानीका होटलहरू खुलेका छन् भने अरू पनि खुल्ने क्रममा छन् । सिन्धुलीगढी होटल, होटल भ्याली भ्यु, संगम होटल, महाभारत र हिमशिखरजस्ता ठूला लगानीका होटलहरू पहिल्यैबाट सिन्धुलीमाढीमा सञ्चालित छन् । उनीहरूले पनि सुविधा विस्तार गरिरहेका छन् ।

कमलामाई नगरपालिकाको उद्योग विकास शाखाका अनुसार २०७६ वैशाखसम्ममा ४ सय २४ वटा होटल दर्ता भएका छन् । यिनमा दुइटा ठूला लगानीका रिसोर्ट दर्ता भएका छन् । नगर क्षेत्रमा होटलको आम्दानी वार्षिक २५ करोड हाराहारी छ । ठूला लगानीका रिसोर्ट पनि धमाधम खुल्ने क्रममा छन् । कम्तीमा ७ लाखदेखि बढीमा १० करोडसम्मका लागानीमा होटल खुलेका छन् ।

पछिल्लो समय सबैभन्दा बढी सुनकोसी गाउँपालिकामा होटल खुलेका छन् । मुलकोटमा मात्रै ठूला लगानीका ४० भन्दा बढी होटल तथा रेस्टुरेन्टहरू खुलेका छन् । यहाँ कम्तीमा १० लाखदेखि १६ करोडसम्मका होटल सञ्चालनमा आएको मुलकोट होटल व्यवसायी संघका अध्यक्ष मनोज श्रेष्ठले बताए ।

मुलकोटमा १० करोड लागतमा ताज रिसोर्ट सञ्चालनमा आइसकेको छ भने १६/१६ करोड लागतका दुइवटा रिसोर्ट सञ्चालनका लागि तयारी अवस्थामा छन् । बीपी राजमार्ग हुँदै दैनिक सयौंको संख्यामा यात्रु आवतजावत गर्ने भएकाले व्यापारीहरू होटलतर्फ आकर्षित भएका उनले बताए । बीपी राजमार्गमार्फत काभ्रेको धुलिखेल हुँदै सिन्धुलीमाढी निस्केर महोत्तरीको बर्दिबाससम्मको १ सय ५८ किलोमिटरको दूरी ४ घण्टामै पार गर्न सकिने भएपछि यात्रुको आवतजावत बढेको छ ।

‘प्रायः गाडीहरू सबै एकैपटक आइपुग्छन् । ग्राहकले भनेको बेलामा खाना र खाजा पुर्‍याउनै सकिन्न,’ अध्यक्ष श्रेष्ठले भने, ‘अहिले ठूला–ठूला होटलहरू खुल्न थालेका छन् । ग्राहकलाई भएका होटलहरूले मात्र सेवा दिन नसकेपछि होटलहरू खुल्ने क्रम बढेको हो ।’

सिन्धुलीमा सञ्चालित ४ सय २४ होटलमध्ये ३ सय १८ पुरुषले सञ्चालन गरेका छन् भने १ सय ६ वटा होटल महिलाले नै दर्ता गरेर सञ्चालन गरेका छन् । हाल सञ्चालित होटलमा १ हजार २ सय ६८ जनाले रोजगारी पाएका छन् । जसमा पुरुष ८ सय ५६ जना र महिला ४ सय १२ जनाले रोजगारी पाएको कमलामाई नगरपालिकाको उद्योग विकास शाखाले जनाएको छ ।

प्रकाशित : जेष्ठ २६, २०७६ ०७:३२
पूरा पढ्नुहोस्
प्रतिक्रिया
पठाउनुहोस्
×