पुनर्निर्माण अन्तिम चरणमा मितेरी पुल

०७२ वैशाख १२ को भूकम्पले नेपाल-चीन जोड्ने पुलमा क्षति पुर्‍याएको थियो । भूकम्पका बेला पहिरोसँगै आएको ढुंगाले लागेर पुरानो पुलको बीचमा ठूलो प्वाल पारेको थियो । पुल काम नलाग्ने भएपछि पुनर्निर्माण गरिएको हो । पुल निर्माण करिब सकिसकेको छ ।

अहिले पुलको दुवैतर्फ गेट निर्माण गर्ने काम पनि हुँदै गरेको सशस्त्र प्रहरीबल राजस्व तथा भन्सार सुरक्षा गुल्मपति जीवन केसीले बताए । ‘पुलको एकातर्फ बार लागिसकेको छ,’ उनले भने, ‘अर्कोतर्फ पनि बार लाग्दै छ ।’

पुल निर्माणसँगै नेपालतर्फ करिब १ सय ५० मिटर डबल लेनको सडक ढलान गर्ने कामसमेत सकिएको छ । निर्माण सकिएपछि पुल जेठको अन्तिममा हस्तान्तरण गर्ने चिनियाँ पक्षले बताएको छ । पुरानो पुलभन्दा ५ मिटर उत्तरपूर्वमा नयाँ पुल बनाइएको हो ।

चीन सरकारको पूर्णसहयोगमा पुलको पुननिर्माण भएको हो । पुलको पुन निर्माण गर्न नेपाल सरकार र चीन सरकार बिच सन् २०१८ जुन २१ मा सहमति पत्रमा हस्ताक्षर भएको थियो । प्रधानमन्त्री केपी ओलीले चीन भ्रमण गर्दा सहमति पत्रमा हस्ताक्षर भएको हो । पुल चीन सरकारले पुनर्निर्माण गरेर नेपाल सरकारलाई हस्तान्तरण गर्ने छ ।

प्रतिनिधि सभाका सभामुख कृष्णबहादुर महराले गत भदौ २३ मा ल्हासाबाट मितेरी पुलको शिलान्यास गरेका थिए । पुलको लम्बाई १ सय १० मिटर र चौडाइ १२ मिटर रहेको छ । मितेरी पुलको पुनर्निर्माण सम्पन्न भएपछि व्यापार सहजीकरणमा थप सहयोग पुग्ने विश्वास गरिएको छ ।