कान्तिपुर वेबसाईट
AdvertisementAdvertisement

एएफयूले कृषि प्रदर्शनी गर्ने

कान्तिपुर संवाददाता

चितवन — कृषि तथा वन विज्ञान विश्वविद्यालय (एएफयू) ले कृषि प्रदर्शनी तथा कृषक मेला गर्ने भएको छ । विश्वविद्यालय स्थापना भएको १० वर्ष पुगेको अवसरमा मेला गर्न लागेको रजिस्ट्रार तथा मूल आयोजक समितिका अध्यक्ष मनराज कोलाक्षपतिले बताए । 

रामपुरमा रहेको विश्वविद्यालय परिसरमा जेठ ३२ ेदेखि असार ३ सम्म मेला सञ्चालन हुनेछ । प्रदर्शनीमा कृषि यन्त्र, कृषिमा सूचना प्रविधिको प्रयोगसम्बन्धी जानकारी, बाली बिमाका सूचना दिने ५० स्टल रहने कोलाक्षपतिको भनाइ छ । एएफयुका उपकुलपति ईश्वरीप्रसाद ढकाल किसानलाई सहभागि गराएर कृषि क्षेत्रमा भएका प्राज्ञिक र अनुशन्धानका कुरा राख्न खोजेको बताए ।


प्रदर्शनीमा किसान, वैज्ञानिक, विज्ञ र कृषि व्यवसायीको जमघट हुने उनले बताए । त्रिविको आंगिक क्याम्पसको रूपमा रहेको रामपुरको केन्द्रीय कृषि तथा पशु विज्ञान अध्ययन संस्थान नै विश्वविद्यालयमा परिणत भएको हो । २०४५ सालसम्म प्रत्येक वर्ष रामपुरमा कृषि मेला र प्रदर्शनी हुने गर्थ्यो । एएफयू स्थापना भएपछि पनि सुरु नभएको ऊक्त कार्यत्रम अहिलेबाट सञ्चालनमा आउन लागेको रजिस्ट्रार कोलाक्षपतिले बताए ।


१० वर्षमा १० अनुसन्धान

कृषि विश्वविद्यालय स्थापना भएको १० वर्षमा कृषिसँग सम्बन्धित १० अनुसन्धान पूरा भएका छन् । माछाको एक प्रजाति टिलापियाको उपयुक्त प्रजनन् विधि, आहार व्यवस्थापनमा सफल अनुसन्धान भएको अनुसन्धान तथा प्रसार निर्देशनालयका निर्देशक नवराज देवकोटाले बताए ।


त्यसैगरी पशु आहार, धान उत्पादनमा पोषण तत्त्वको व्यवस्थापन र सुन्तला उत्पादन प्रविधिमा पनि सफल अनुसन्धान भएको उनले बताए । विश्वविद्यालयले भैंसी प्रजननको विषयमा पनि महत्त्वपूर्ण अनुसन्धान गरेको उनले जानकारी दिए । भैंसीमा प्रजनन् नहुने, बाँझोपन बढ्नेजस्ता समस्याको निराकरणका लागि विश्वविद्यालयको समूहले अनुसन्धान गरेर उत्साहजनक नतिजा ल्याएको देवकोटाले जानकारी दिए ।

प्रकाशित : जेष्ठ २०, २०७६ ०९:०३
प्रतिक्रिया
पठाउनुहोस्

किसानलाई आलु खन्न भ्याइनभ्याइ

कान्तिपुर संवाददाता

थाहा — मकवानपुरको उत्तरी क्षेत्रमा पर्ने थाहा नगरपालिकाका कृषकलाई आलु खन्न भ्याइनभ्याइ छ । अहिले बारीको होइन खेतको आलु खन्ने गर्छन् । ‘बारीको आलु ढिलै लगाएको हुँदा खन्ने बेला पनि अलिपछि नै हुन्छ । गत वर्षजस्तो यो वर्ष आलु उत्पादन भएको छैन । आलुको गेडा लागेको छ तर स–सानो छ,’ स्थानीयवासी विमल ढकालले भने, ‘आलु पोहोरको जस्तो फलेको पनि छैन, वजारमा भाउ पनि छैन ।’

मकवानपुरको उत्तरी क्षेत्रमा पर्ने थाहा नगरपालिका–३ शिखरकोट दोवाटोका कृषक आलु खन्दै । तस्बिर : प्रताप/कान्तिपुर

गत वर्षका आलु खन्दाखन्दै कृषकले खेतवाट नै रातो सेतो दुवै प्रतिकेजी २० देखि २५ रुपैयाँमा बिक्री गरेका थिए ।

अहिले व्यापारीले बढीमा प्रतिकेजी १७ रुपैयाँमा खरिद गर्ने गरेका छन् । आलुको बोट सप्रेको थियो तर आलुचाहिँ राम्रोसँग फलेको छैन । आलु खन्दै अधिकांश कृषकले खेतबाट नै व्यापारीलाई बिक्री गर्ने गरेका छन् । आलु सुरक्षित ढंगले भण्डारण गर्ने शीतभण्डार नभएकाले कुहिने डरले खन्नेबिक्तिकै बित्री गर्ने गरेका छन् । थाहा नगरपालिकाको अधिकांश खेतमा आलु खन्ने काम कृषकहरू व्यस्त छन् ।

थाहा नगरपालिकाको सबै क्षेत्रका जमिनहरूमा आलु खेती गर्ने गरिन्छ । पानी धेरै परेर घाम नलागेकाले आलुको उत्पादनमा कमी आएको थाहा नगरपालिकाका कृषि संयाजक सञ्जय तिवारीले भने, ‘पानी धेरै पर्‍यो, आलुको बोट हलक्क आयो तर आलु राम्रोसँग उत्पादन भएन ।’

गत वर्ष थाहा नगरपालिकामा आलुको उत्पादन राम्रो हुनाले किसानले आम्दानी राम्रै गरेका थिए । जेठको पहिलो सातादेखि थाहा नगरपालिकाको दामन, पालुङ, वज्रवाराही क्षेत्रका कृषकले आलु खन्न सुरु गर्छन् । यस क्षेत्रमा कार्डिनल, कुखुरेज्योति, डेजुरे र स्थानीय जातका आलु लगाउने गर्छन् । थाहा नगरपालिकाका कृषकको मुख्य आम्दानीको स्रोत तरकारी हो । त्यसमा पनि सबैभन्दा बढी आलु हो ।

‘आलु उत्पादनले नै यस क्षेत्रका अधिकांश बासिन्दाको वर्ष दिनको आर्थिक कारोबार चल्ने गरेको छ । साविकको दामन, पालुङ, आग्रा, टिस्टुङ, चित्लाङ र वज्रवाराही गाविस समेटेर बनेको थाहा नगरपालिकाका ६ हजार रोपनी जग्गामा आलु खेती गरिन्छ’ थाहा नपाका कृषि शाखाका प्रमुख तिवारीले भने, ‘प्रतिरोपनीमा सरदर १५ क्विन्टल आलु उत्पादन हुन्छ ।’

जेठको पहिलो सातादेखि अन्तिम सातासम्म आलु किसानले खनिसक्छन् । आलु खन्नेबित्तिकै त्यस जग्गामा काउली, बन्दाकोपी मुलालगायत अन्य तरकारी खेती गर्छन् । आलु सुरक्षितसाथ भण्डारन गर्ने स्थानको अभावले गर्दा कृषकहरूले आलु खन्दाखन्दै खेतबाट नै बिक्री गर्ने गर्छन् ।

कृषि शाखाका अनुसार थाहाबाट बर्सेनि करिब ६० करोड रुपैयाँको आलु निर्यात हुने गर्छ । यहाँ उत्पादन हुने बेमौसमी आलु भारतका विभिन्न भागसहित मुलुकको काठमाडौं, पोखरा, हेटौंडा, बुटवल, भरतपुरलगायत विभिन्न सहरमा पुग्ने गर्छ ।

प्रकाशित : जेष्ठ २०, २०७६ ०९:०२
पूरा पढ्नुहोस्
प्रतिक्रिया
पठाउनुहोस्
×