चीनले सात तले दरबारको रेट्रोफिटिङ गर्ने

कृष्ण थापा

नुवाकोट — डेढ महिनाभित्रमा चीनले पुरातात्त्विक सम्पदा साततले दरबार र तलेजु भवानी दरबारको रेट्रोफिटिङ गर्ने भएको छ । पुरातात्त्विक सम्पदा पुनर्निर्माणको लागि चिनियाँ प्राविधिक टोलीले वैशाखको पहिलो सातामा अन्तिम चरणको सर्भे सकेको छ । टोलीले साततले दरबारदेखि उत्तरपट्टी रहेको तलेजु भवानीको पाँचतले दरबार र साततले दरबारको अन्तिम सर्भे सकेको हो ।

'७ वटा संरचनाको काम हुँदैछ,' जिल्ला आयोजना कार्यान्वयन इकाई (भवन) प्रमुख कोषनाथ अधिकारीले भने, 'अन्तिम चरणको विस्तृत काम भइरहेको बुझिएको छु ।'

यहाँ आधा दर्जनभन्दा बढी सम्पदा पुनर्निर्माण गर्नुपर्ने छ । 'चिनियाँ पक्षले विस्तृत प्रतिवेदन बुझेपछि राष्ट्रिय पुनर्निर्माण प्राधिकरणमा छलफल हुने छ', उनले भने । चिनियाँ प्रविधिक टोलीले तलेजु भवानी, साततले दरबार र बाटोको अवस्था बुझेपछि अन्तिम चरणको प्राप्त सूचनाअनुसार डेढ महिनाभित्रमा काम सुरु हुने भन्ने बुझिन आएको जिल्ला आयोजना कार्यान्वयन इकाई (भवन) प्रमुख अधिकारीले बताए । चिनियाँ पक्षले नुवाकोट दरबारसहित सबै पुरातात्विक सम्पदाहरुको रेक्टोफिटिङ गरी पुनर्निर्माण गर्ने भएको छ,' जिल्ला आयोजना कार्यान्वयन इकाई (भवन) प्रमुख अधिकारीले भने, 'सुरुवात दुई भवन र अन्यको क्रमश: काम गर्दै जाने बुझाई छ ।'

चीन सरकारले पुनर्निर्माण गर्ने सम्पदाहरुमा साततले दरबार, लामपाटी, सेतो पाटी, विष्णु मन्दिर, नारायण मन्दिर, गारद घर, रंगमहल, तुलजा भवानी मन्दिर छन् । विष्णु र नारायण मन्दिरलाई एउटै प्याकेजमा राखेर काम गर्ने भएको छ ।

गुरुयोजना बनाएर पुनर्निर्माणको काम थालिने प्राधिकरणले जनाएको छ । पुरातात्विक महत्व बोकेको जिल्लाको ठूलो शक्तिपीठ नुवाकोट भैरवी मन्दिरमा निर्माण भइरहेको छ । राजा पृथ्वीनारायण शाहले १८१७ देखि १९ मा ललितपुरबाट कालिगढ झिकाएर उक्त दरबार बनाउन लगाएका थिए । सुरुमा नौतले भए पनि ०९० सालको भूकम्पले ७ तलामा सीमित भएको बूढापाकाको भनाइ छ ।

०७२ साल वैशाख १२ र २९ गतेको भूकम्पले साततले दरबार टेकोको भरमा छ । तुलजा भवानीको दरबार भक्तपुरे राजाले बनाउन लगाएको भनिए पनि तिथिमिति भेटिएको छैन । स्थानीय बूढापाकाका लिच्छवीकालीन दरबार भएको दाबी गर्छन् । यसको पूर्वी मोहडाको पूरै भाग गत वर्षात्‌मा झरेको थियो ।

प्रकाशित : वैशाख २१, २०७६ २१:४०
प्रतिक्रिया
पठाउनुहोस्

राजभण्डारीलाई सम्मान

कान्तिपुर संवाददाता

काठमाडौँ — समाजसेवी एवं राजनीतिज्ञ माधवमणि राजभण्डारीलाई दोलखाका एक दर्जन संघसंस्थाले संयुक्त रुपमा सम्मान गरेका छन् । दोलखा जिल्लाको शैक्षिक, सामाजिक, सांस्कृतिक र भौतिक पूर्वाधारलगायत विकासमा अतुलनीय योगदान पुर्‍याएको भन्दै शनिबार राजधानीमा उनलाई अभिनन्दन गरिएको हो ।

द्वाल्खा गुठी, लायन्स क्लब अफ दोलखा, साथी कल्याणकारी समूह, द्वाल्खा म्यासमुचा खलक, कालिञ्चोक युवा क्लबसहितका संस्थाले सम्मान गरेका हुन् । दोलखाको बाटोघाटो, विद्यालय स्थापना, अस्पताल निर्माण लगायतमा राजभण्डारीले सक्रियता देखाएको वरिष्ठ कलाकार मदनदाश श्रेष्ठले जानकारी दिए ।

ऐतिहासिक दोलखा बजारमा २००३ साल पुसमा जन्मेका उनी हाल अस्वस्थ छन् ।

प्रकाशित : वैशाख २१, २०७६ २१:२५
पूरा पढ्नुहोस्
प्रतिक्रिया
पठाउनुहोस्