शुल्क वृद्धिको निर्णय फिर्ता

कान्तिपुर संवाददाता

काठमाडौँ — काठमाडौं महानगरपालिकाले गत चैत २६ गते अनधिकृत रूपमा बढाएको निजी विद्यालयको शुल्क वृद्धिलाई खारेज गरेको छ । मेयर विद्यासुन्दर शाक्यको अध्यक्षतामा बुधबार बसेको महानगर बैठकले खारेजीको निर्णय गरेको हो । 

अभिभावक महासंघ, विभिन्न निकायले कानुनी आधारविना शुल्क बढाइएप्रति आपत्ति जनाएपछि साबिक शुल्कमात्र लागू गर्ने महानगरपालिकाले निर्णय गरेको छ । ‘महानगरमा रहेका निजी विद्यालयहरूको शुल्क बृद्धि कार्यकारी परिषदले मात्र निर्णय गर्न सक्छ,’ वडा नं.१६ का अध्यक्ष मुकुन्द रिजालले भने, ‘महानगरको शिक्षा ऐन, नियमावलीविपरीत कार्यपालिकालाई छलेर भएको शुल्क वृद्धिको निर्णय खारेज गरिएको छ । साबिककै लागू हुनेछ । कुनै विद्यालयले बढाएको भए अभिभावकलाई बढेको
शुल्क फिर्ता गर्नुपर्नेछ ।’

यसअघि महानगर शिक्षा समिति र निजी विद्यालय संगठन प्रतिनिधिहरूले करिब २७ प्रतिशत शुल्क बढाउने निर्णय गरेका थिए । गत चैतमा ‘क’ श्रेणी विद्यालयले १ देखि ५ कक्षा २ हजार ८ सय १२ रुपैयाँ शुल्क तोकिएको थियो ।

त्यसैगरी कक्षा ६ देखि ८ मा ३ हजार २ सय ५१ तथा कक्षा ९ र १० को शुल्क ४ हजार ३ सय ७३ रुपैयाँ कायम गरिएको थियो । उक्त शुल्क खारेजीपछि साबिक ‘क’ श्रेणीका विद्यालयले कक्षा १–५ मा २ हजार ३ सय ६३, कक्षा ५–८ ले २ हजार ७ सय तथा कक्षा ९ र १० मा ३ हजार ६ सय ७५रुपैयाँमात्र अशुल्न पाउने छन् ।

‘अधिकांश निजी विद्यालयले शुल्क बढाइसकेका छन्,’ अभिभभावक महासंघका संयोजक सुप्रभात भण्डारीले भने, ‘त्यसैले बढाइएको शुल्क इमानदारीपूर्वक फिर्ता गरिनु पर्छ । अटेर गर्नेलाई महानगरले कारबाही गर्न जरुरी छ ।’ महानगरमात्र नभएर अन्य नगरपालिका र गाउँपालिकाले आफ्नो क्षेत्रमा रहेका विद्यालयहरूको अवस्थाबारे निगरानी र नियम गर्नआवश्यक रहेको बताए ।

प्रकाशित : वैशाख १२, २०७६ ०७:३७
प्रतिक्रिया
पठाउनुहोस्

गाउँमै रोजगारी भन्दै ठगी

कान्तिपुर संवाददाता

सिन्धुलीमाढी — गाउँमै रोजगारीका लागि तालिम भन्दै जिल्लाका १ सय ११ जना युवा ठगिएका छन । जिल्लाको गोलञ्जोर गाउँपालिका ४ का एकेन्द्र मगर (कुमार) र हेमराज गुरुङले युवाहरूलाई रोजगारी दिने भन्दै ठगेका हुन् ।

ग्रिन क्लव नेपालका विभागिय अध्यक्ष बताउने एकेन्द्र र जिल्ला संयोजक भन्ने हेमराजले २ महिना युवाहरूलाई काममा लगाएर अहिले सम्पर्कविहिन बनेको पीडित युवाहरूले बताए ।

हेमराजले आफूहरूलाई स्वास्थ्य सम्बन्धी गाउँ–गाउँमा गएर काम गर्नुपर्ने बताएको पीडित तिनपाटन गाउँपालिकाङ ५ डुम्ब्रेबेसीकी कुसुम कार्कीले बताइन् । मासिक ४० हजार रुपैयाँ तलब दिने भनेर आफूहरूलाई काममा लगाएको उनी सुनाउँछिन् । २१ वर्षकी कुसुम बीएड चौथो वर्षमा सिन्धुली बहुमुखी क्याम्पसमा अध्ययनरत छिन् । ‘मासिक ३० हजार रुपैयाँ र फिल्ड भत्ता १० हजार गरी ४० हजार रुपैयाँ दिन्छु भनेका थिए’ उनी भन्छिन्, ‘सुरुमा त तलब माग्दा दिन्छु दिन्छु भनिरहन्थे । अहिले त फोन नै उठ्दैन ।’

तालिमका लागि भनेर सुरुमा प्रतिव्यक्ति ६ हजार ७ सय रुपैयाँ उठाएका थिए । ‘२ महिना गाउँमा गएर काम गरियो । खान बस्न सबै आफ्नै पैसा खर्च भयो । अहिले मान्छे नै सम्पर्कविहीन भए’ उनले दुःखेसो पोखिन् । कुसुमको ग्रिन क्लव नेपालका विभागीय अध्यक्ष एकेन्द्र मगरसँग फेसबुकमा चिनजान भएको हो ।

कमलामाई नगरपालिका २ भद्रकालीका २४ वर्षीय केशव बम्जनको पनि उस्तै गुनासो छ । ४० हजार रुपैयाँ मासिक तलब भनेर काममा खटाएको बताउने केशव अहिले भने एकेन्द्र र हेमराज नै आफूले गरेको फोन उठाउनसमेत छोडेको बताउँछन् । ‘पाथीभरा आयुर्वेद हस्पिटल, सिनामंगल काठमाडौंमा गएर ३ दिनको तालिम लिएपछि गाउँमा आएर काम सुरु गर्‍यौं । पहिलो चरणमा गाउँ गाउँमा गएर स्थानीयको स्वास्थ्य अवस्थाबारे टिपोट गर्‍यौं । दोस्रो चरणमा शिविर सञ्चालन भयो । त्यसपछि उनीहरू सम्पर्कविहीन भए ।’

एकेन्द्र र हेमराजले सुरुमा फेसबुकमा चिनजान गर्ने र एउटालाई चिनेपछि अरू साथीहरूलाई पनि भन काम सजिलो छ, पैसा राम्रो छ भनेर काम लगाएको पीडित युवाहरूले बताए । कार्की र बम्जनको जस्तो नियती १ सय ११ जना युवाहरूले भोगेका छन् । युवाबाट उनीहरूले प्रतिव्यक्ति ६ हजार ७ सय रुपैयाँ उठाएका थिए । ठगिनेमा १८ देखि ३० वर्षसम्मका युवाहरू छन् ।

सामुदायिक सेवा केन्द्रका अध्यक्ष रामबहादुर हायुले प्रहरीमा निवेदन दिन सुझाव दिएपछि उनीहरू जिल्ला प्रहरी कार्यालय सिन्धुली पुगेका थिए । प्रहरी उपरीक्षक चक्रबहादुर सिंहले भने– उनीहरूले मौखिक रूपमा दिएको जानकारीअनुसार आरोपी काठमाडौं रहेकाले अपराध महाशाखा सीआइबी काठमाडौंमा उजुरी दिन सुझाव दिएका छौं । सीआइबीमा कुरा पनि गरिदिएको छु, उनले भने ।

संस्थाका विभागीय अध्यक्ष मगर भने युवाहरूलाई रोजगारी दिने उद्देश्यले नै क्लब खोले पनि विभिन्न समस्याका कारण बीचमै छोड्नुपरेको बताए । ‘उनीहरूले ६ महिना काम गरेपछि मात्र तलव दिन सकिन्छ । काम नै केही भएको छैन हामीले कसरी तलब दिनु ?’ उनले भने, ‘३ महिना काम गरेपछि प्रमाण पत्र दिने योजना थियो । त्यसैका लागि पैसा उठाएका हौं ।’

प्रकाशित : वैशाख १२, २०७६ ०७:३६
पूरा पढ्नुहोस्
प्रतिक्रिया
पठाउनुहोस्