भूकम्पले विस्थापित छाप्रोमै

कान्तिपुर संवाददाता

दोलखा — भूकम्पले विस्थापित भीम थामी अरू तीन सय विस्थापितका समस्या लिएर दिनहुँजसो सदरमुकाम चरिकोट धाउँछन्  । थातथलो भूकम्पले जोखिममा पारेपछि स्थानन्तरण गरिएको बोसिम्पा एकीकृत बस्तीमा सरेका उनीहरूको समस्या लिएर भीम दैनिक सरोकारवाला कार्यालय चाहर्छन्  ।

लगभग एउटै प्रकृतिको आश्वासन लिएर फर्कन्छन् । उनीहरूलाई दिने भनिएको सार्वजनिक जग्गाको अन्योलता सुल्झन नसकेपछि उनी सदरमुकाम धाइरहेका हुन् । भीमश्वर नगरपालिका १ बोसिम्पाका ५६ परिवारका तीन सय व्यक्ति सरकारी निर्णयमा ढिलासुस्तीले अझै छाप्रोमै गुजारा चलाइरहेका छन् ।


अब उक्त बस्तीका बासिन्दालाई सार्वजनिक जग्गा काटेर लालपुर्जा वितरण कार्य मात्रै बाॅकी छ । घर बनाउने सरकारी अनुदान बैंकमा थन्क्यिाएर बसेको छ । उनीहरूले पुर्जा पाउनेबित्तिकै घर बनाउन ठिकठाकमा छन् । तर, पुर्जा वितरणका लागि आवश्यक प्रक्रियाका वाहनामा विस्थापितहरूलाई अल्झाइराखिएको छ । छाप्रोमा चार वर्ष बिताएका उनीहरूका अगुवा भीम थामी भन्छन्, ‘धाएको धाएै छौं, पुर्जा आउने अत्तोपत्तो छैन ।’ भीम थामी पनि पीडित हुन्, तर तीन सय पीडितको समस्या उनको थाप्लोमा छ ।

अरू कसैले सदरमुकामसम्म आएर कुरा राख्नसमेत नसक्ने अवस्थामा छैनन् । उक्त बस्तीको समस्या सुल्झाउन उनले जिम्मेवारी पाएकाले दैनिकजसो आधा दिनको बाटोबाट सदरमुकाम धाउने उनको दैनिकीजस्तै बनेको हो ।उनीहरूका लागि राष्ट्रिय पुनर्निर्माण प्राधिकरण केन्द्रले सार्वजनिक जग्गा उपलब्ध गराउने निर्णय गरिसकेको छ ।

प्राधिकरणले स्वीकृत गरी पठाएको आकारमा घर बनाउन मापदण्डअनुसार नहुने भीमेश्वर नगरपालिले बताएपछि ढिलासुस्ती झन बढेको हो । यस्तै अस्पष्टतामा चार वर्ष बित्न लागेको पीडितका लागि सास्तीका दिन झन् थपिने देखिन्छ । छाप्रोको बसाइले बूढाबूढीमा जीउ दुख्ने, श्वास बढ्ने समस्या बढेको छ भने भीमको भनाइमा सुत्केरी महिला, बालालिका बिरामी भइरहन्छन् ।


जिल्लास्थित मालपोत र नापी कार्यायल प्राधिकरणको निर्णयअनुसार हो भने जग्गाको कित्ताकाट र पुर्जा उपलब्ध तयार देखिएका छन । सोमबार जिल्लास्थित सरोकारवालाहरूको बैठकमा मालपोत र नापी कार्यालयले पहिलाको प्लानिङअनुसार उक्त स्थानका भूकम्पीडितलाई जग्गा उपलब्ध गराउन बाधा नपर्ने बतायो । मालपोत अधिकृत गोविन्दप्रसाद अधिकारीले भने, ‘उक्त स्थानका पीडितका लागि जग्गा थपेर दिने भन्ने निर्णय प्राधिकरण केन्द्रबाट आएपछि मात्रै पुर्जा वितरण गर्न मिल्छ ।’

प्राधिकरणले पत्र नलेखेसम्म थपेर जग्गा दिन नमिल्ने नापी अधिकृत राजु पुरीले बताए । भीमेश्वर नगरपालिकाका मेयर भरत केसीले जग्गा थप्नेबारे प्राधिकरण केन्द्रमा पहल भइरहेको बताए । उनका अनुसार नगरपालिकाको मापदण्डअनुसार हाल दिने भनिएको जग्गाले घर बनाउन पुग्दैन । त्यसैले थप जग्गा उपलब्ध गराउनुपर्ने आवश्यकता देखिएको उनी बताउँछन् ।

प्रकाशित : चैत्र १३, २०७५ ०७:५९
प्रतिक्रिया
पठाउनुहोस्

हवाई उडान माग

टीकाप्रसाद भट्ट

रामेछाप — बन्द रहेको रामेछाप विमानस्थलबाट काठमाडौंका लागि हवाई उडान सञ्चालन गर्नका लागि रामेछापका कार्यालय प्रमुखहरूले माग गरेका छन्  । प्रमुख जिल्ला अधिकारी कृष्णप्रसाद शर्माको अध्यक्षतामा बसेको कार्यालय प्रमुखहरूको बैठकले तत्काल उक्त विमानस्थलबाट काठमाडौंका लागि यात्रुवाहक हवाई सेवा सञ्चालनको माग गरेको हो  ।

शर्माका अनुसार विमानस्थल, टर्मिनल उपकरण, एटीसी लगायतका प्राविधिक र हवाई इन्धन डिपोसमेत भएको रामेछापमा साताको कम्तीमा एक उडानका लागि माग गरिएको हो । २०३५ सालमा निर्माण भएको उक्त विमानस्थलमा २०६४ सालसम्म नेपाल वायुसेवा निगमले नियमित उडान गर्दै आएको थियो । त्यस बीचमा निजी क्षेत्रका एभरेस्ट, गोर्खा, लुम्बिनी र तारा एयरले समेत यात्रुलाई काठमाडौंका लागि सेवा दिएका थिए ।


२०६४ पछि ३ वर्ष बन्द भएको विमानस्थलमा यती एयरका तत्कालीन अध्यक्ष स्वर्गीय आङछिरिङ शेर्पाले २०६७ देखि सातामा एक उडान राखेका थिए । विमानस्थल कालोपत्रे गर्ने योजना कार्यान्वयनका लागि उक्त उडान रोकिएको थियो । कालोपत्रे सकिएको ३ वर्ष बितिसक्दा पनि तारा एयरले यात्रु सेवा सुचारु गरेको छैन । रामेछाप विमानस्थलबाट सोलुको लुक्लाका लागि कार्गो उडान भने हुने गरेको छ । काठमाडौं विमानस्थल व्यस्त हुने, जाडो मौसममा बिहान हुस्सु लाग्ने र प्रतीक्षामा धेरै समय लाग्ने भएकाले रामेछापमा सामान ल्याएर त्यहीँबाटै हवाई कम्पनीले सोलुका लागि कार्गो उडान गर्ने गर्छन् । तारा, सीता र समिट एयरले पछिल्लो चरणमा सोलुका लागि रामेछापबाटै यात्रुसमेत ओसारेका थिए । तर काठमाडौंको उडान भने तीनैवटा कम्पनीले सञ्चालन गरेका छैनन् ।


जिल्लामा रहेको एक मात्र विमानस्थलबाट यात्रु सेवा नहुँदा बिरामी, वृद्धवृद्धा, गर्भवती महिला, अशक्तहरूले सडक मात्र हुँदै कष्टकर यात्रा गर्न बाध्य हुनुपरेको छ । ‘काठमाडौंका अस्पतालमा उपचारका लागि बिरामीलाई ओहोरदोहोर गर्नका लागि पनि सातामा एक उडान आवश्यक छ,’ स्थानीय नवीन घिमिरे भन्छन्, ‘सरकारले यत्रो लगानी गरेको पूर्वाधारबाट नागरिकले उचित लाभ लिन सकेनन् ।’


नेपाल नागरिक उडड्यन प्राधिकरणले त्रिभुवन अन्तर्राष्ट्रिय विमानस्थल आउँदो अप्रिल १ देखि मर्मतसम्भार गर्ने योजना अघि सारेपछि फेरि रामेछापको विमानस्थलबाट सोलुका लागि उडान भर्ने तयारीमा ती कम्पनी जुटेका छन् । तारा, सीता र समिट एयरले रामेछापसम्म काठमाडौंबाट सडक मार्ग हुँदै यात्रु ओसार्ने र त्यसपछि हवाई मार्गबाट लुक्ला पुर्‍याउने योजना अघि सारेका हुन् । काठमाडौं विमानस्थल मर्मतका लागि करिब ३ महिना लाग्ने भएकाले उक्त अवधि तीनैवटा हवाई कम्पनीले रामेछापदेखि सोलुका नियमित उडान गर्ने तयारी भएको रामेछाप नागरिक उडड्यन कार्यालयका प्रमुख अमित चौरसियाले बताए ।

प्रकाशित : चैत्र १३, २०७५ ०७:५६
पूरा पढ्नुहोस्
प्रतिक्रिया
पठाउनुहोस्