गुडिरहेको ट्रकमा आगलागी

राजकुमार कार्की

सिन्धुली — बीपी राजमार्ग अन्तर्गत कमलामाइ नगरपालिका-२ को पिपलभन्ज्याङमा गुडिरहेको ट्रकमा आगलागी भएको छ । मंगलबार सदरमुकाम सिन्धुलीमाढीबाट मन्थलीतर्फ जाँदै गरेको बा ५ ख ३७३६ नम्बरको सिमेन्ट लोड भएको ट्रकमा आगलागी भइ जलेर नष्ट भएको प्रहरीले जनाएको छ ।

प्रतिकात्मक तस्बिर

ट्रकको पछाडिको टायरबाट आगो सल्किएको थियो। आगलागीबाट ट्रक र सामान गरि ३४ लाख बराबरको क्षति भएको समेत प्रहरीले जनाएको छ।
ट्रकमा आगलागी भएपछि दुईघण्टा बीपी राजमार्ग बन्द भएको थियो। जलेको ट्रकलाई पन्छाएर यातायात सुचारु गरिएको छ।

प्रकाशित : चैत्र ५, २०७५ १३:०२
प्रतिक्रिया
पठाउनुहोस्

वैशाख भित्र माथिल्लो त्रिशूली थ्री 'ए' ले ३० मेगावाट उत्पादन थाल्ने 

असार भित्र पूर्ण क्षमतामा विद्युत उत्पादन हुने ठेकेदार कम्पनीको दाबी 
कान्तिपुर संवाददाता

काठमाडौँ — रसुवा र नुवाकोटमा निर्माणाधीन माथिल्लो त्रिशूली थ्री 'ए' जलविद्युत आयोजनाले ३० मेगावाट (पहिलो युनिट) विद्युत् आगामी वैशाख १७ गते (३० अप्रेल) भित्र आउने भएको छ ।

प्राधिकरणका कार्यकारी निर्देशक कुलमान घिसिङको उपस्थितिमा सोमबार बसेको आयोजना व्यवस्थापन, परामर्शदाता, मुख्य संरचना र प्रसारण लाइन निर्माणको जिम्मा पाएका ठेकेदार कम्पनीहरुको बैठकले पहिलो युनिटबाट १७ वैशाखभित्रमा विद्युत् उत्पादन सुरु गर्ने निर्णय गरेको हो।

'पहिलो युनिटबाट १७ वैशाखभित्रमा र दोस्रो युनिटबाट १५ असार (३० जुन २०१९)बाट विद्युत उत्पादन गर्ने गरी आयोजनाको काम सम्पन्न गर्न ठेकेदार कम्पनीहरुले प्रतिबद्धता जनाएका छन, विभिन्न समस्या झैल्दै आएको आयोजना ऊर्जा मन्त्रालय र प्राधिकरणको निरन्तरको प्रयासबाट सम्पन्न हुने अवस्थामा पुगेको छ', कार्यकारी निर्देशक घिसिङले भने। 'यसबाट एकातर्फ काठमाडौं उपत्यकाबाट नजिक रहेकाले यहाँको विद्युत माग र आपूर्तिको व्यवस्थापनको लागि आयोजना योगदान महत्वपूर्ण रहेको छ भने अर्कोतर्फ त्रिशुली नदी बेसिनमा निर्माण भइरहेका जलविद्युत आयोजनाको विद्युत काठमाडौं उपत्यकामा ल्याउन प्रसारण लाइनको पूर्वाधार पनि तयार भएको छ।'

६० मेगावाटको आयोजनामा ६०/६० मेगावाटका दुईवटा युनिटहरु रहेका छन्। ऊर्जा जलस्रोत तथा सिंचाइ मन्त्री वर्षमान पुनले केहीअघि आयोजनाको स्थलगत निरीक्षण गरी तोकिएको समयमै काम सम्पन्न गर्न आयोजना प्राधिकरण, आयोजना व्यवस्थापन र ठेकेदार कम्पनीहरुलाई निर्देशन दिएका थिए।

शुक्रबारबाट आयोजनाको बालुवा थिग्र्याउने पोखरीभन्दा बाहिर रहेका बाँध, त्यहाँ रहेका गेट लगायतका संरचनाको परीक्षण भइरहेको छ। यो काम ११ चैत्रभित्र सक्ने समय तालिका तय गरिएको छ। त्यसपछि वैशाख २ सम्म बालुवा थिग्रयाउने पोखरी, मुख्य सुरुङ, लगायतका संरचनाको ड्राई तथा बेट टेष्ट गरिने छ।

वैशाख २ पछि विद्युत गृहमा रहेको जेनेरेटर लगायतका उपकहरणरु, पानी निकास सुरुङको ड्राई तथा बेट टेष्ट सम्पन्न गरी वैशाख १७ बाट पहिलो युनिटबाट विद्युत उत्पादनगर्ने लक्ष्यका साथ काम भइरहेको आयोजना प्रमुख फडिन्द्रराज जोशीले जानकारी दिए।'अहिले हाइड्रोमेकानिकल तथा इलेक्ट्रोमेकानिकलका उपकरणहरुको जडान र परीक्षण गर्ने काम भइरहेको छ,' जोशीले भने, 'प्रसारण लाइन पनि १७ वैशाख अगाडि नै तयार पार्न ठेकेदार कम्पनीलाई निर्देशन दिएका छौं।'

आयोजनास्थलबाट काठमाडौंको मातातीर्थसम्मको २२० केभी प्रसारण लाइनको निर्माण चाइना इन्टरनेशनल वाटर एण्ड इलेक्ट्रिक कर्पोरेसनले गरिरहेको छ। मातातीर्थमा १३ सय मिटर प्रसारण लाइनलाई भूमिगत गरिएको छ। कम्पनीसँग २ करोड २६ लाख अमेरिकी डलरमा ठेक्का सम्झौता भएको थियो।

कुल अनुमानित लागत १२ करोड ५८ लाख डलर रहेको आयोजना सरकार एवं प्राधिकरणको लगानी र चिनियाँ एक्जिम बैकको सहुलितपूर्ण ऋणमा निर्माण भइरहेको हो। इन्जिनियरिङ, खरिद र निर्माण (इपिसी) मोडलमा सिभिल विद्युत्गृह, बाँध, सुरुङलगायतका संरचना र इलेक्ट्रोमेकानिकल तथा हाइड्रो मेकानिकलको काम गर्न चाइना गेजुवा ग्रुप अफ कम्पनीज (सिजिजिसी)सँग १४ जेठ २०६७ (२८ मे २०१०) मा ठेक्का सम्झौता भएको थियो। १७ जेठ २०७१ (३१ मे २०१४) भित्रमा निर्माण सक्ने गरी सिजिजिसीसँग ८ करोड ९१ लाख ७८ हजार डलरमा ठेक्का सम्झौता भएको थियो।

विगतमा विद्युत गृह भूमिगत बनाउने या सतही बनाउने विवाद, क्षमता बढाउने निर्णय लगायतका कारणले आयोजनाको निर्माण ढिलाई भएपछि म्याद १६ असार २०७३ -३० जुन २०१६)सम्म थपिएको थियो। भूकम्पले गर्दा आयोजनाको निर्माण तालिका झनै प्रभावित भएको थियो।

भूकम्प र पहिरोले काबु बाहिरको परिस्थिति (फोर्स मेजर) उत्पन्न भएपछि प्राधिकरणले आयोजनाको म्याद १७ वैशाख ०७६ (३० अप्रिल २०१९) सम्म थप गरेको थियो। भूकम्प र पहिरोले बाँधस्थलको दायाँ-बायाँ र प्रवेश मार्गको विभिन्न स्थानमा क्षति पुर्‌याएको थियो। सरकारले पहिराे रोकथाम र सडक मर्मतको जिम्मा नेपाली सेनालाई दिएको थियो।

प्रकाशित : चैत्र ५, २०७५ १२:४१
पूरा पढ्नुहोस्
प्रतिक्रिया
पठाउनुहोस्