सडक सञ्जालमा जोडियो उत्तरी धादिङ

भूकम्पपछि पुनर्निर्माण थालेको जेसुइट नेपालले सोमदाङ–तिप्लिङ सडकको २८ किमि ट्रयाक खोल्न २ वर्ष 
हरिहरसिंह राठौर

धादिङ — सडक सञ्जालबाट टाढा रहेको जिल्लाको उत्तरी क्षेत्र तिप्लिङमा डोजर पुगेको छ । रुवीभ्याली २ ठूलोगाउँमा आइतबार २ डोजर पुगेपछि स्थानीयवासीले खुसी मनाएका छन् ।

सडक सन्जाल जोडिएसँगै उत्तरी धादिङका बासिन्दा छिमेकी जिल्ला रसुवाको स्याफ्रुबेंसीसँग जोडिएका छन् । रसुवाको स्याफ्रुबेंसीबाट ३ दिन हिँड्नुपर्ने बाध्यता अब हट्ने भएको छ । सडक निर्माणपश्चात् दैनिक उपभोग्यवस्तु ढुवानी गर्न सहज भएको छ ।

रसुवाको स्याफ्रुबेंसीबाट धादिङको सिमाना सोमदाङ हुँदै ४ हजार मिटर उचाइको तिप्लिङको उच्च पहाडी क्षेत्र पाङसाङसम्म सडकको ट्रयाक गत वर्ष नै खोलिएको थियो । भूकम्पपछि पुनर्निर्माणमा आएको जेसुइट नेपालले निर्माण गरेको उक्त सोमदाङ–तिप्लिङ सडक खण्डको २८ किमि ट्रयाक खोल्न २ वर्ष लागेको जेसुइट नेपालले जनाएको छ ।

उक्त सडक निर्माण लागत भने संस्थाले सार्वजनिक गरेको छैन । सरकारले गणेश हिमालमा रहेको जस्ताखानी अध्ययन र सञ्चालन गर्न नेपाली सेनाको सहयोगमा ०४४ मै नुवाकोट बेत्रावती हुँदै रसुवाको स्याफ्रुबेंसीबाट धादिङको सीमानाका सोमदाङसम्म सडक पुर्‍याइसकेको थियो ।

तत्कालीन जिविसले सोमदाङबाट तिप्लिङसम्म सडक निर्माण गर्न बजेट छुट्याउँदै आएको १० वर्षभन्दा लामो समय भएको थियो तर कामै नभएपछि सडक निर्माण अलपत्र परेको थियो । सोमदाङबाट अहिले जेसुइट नेपालले ७ किलोमिटर पहाड कटान गरी उच्च पहाडी क्षेत्र पाङसाङसम्म साना सवारीसाधन चल्ने गरी बाटो बनाइसकेको थियो ।

तिप्लिङका जोमसाई थापाका अनुसार जेसुइटले जिविससँग साबिकको तिप्लिङ गाविसको आधाखोलासम्म ट्रयाक खन्ने सम्झौता गरेको थियो । रुवीभ्याली गाउँपालिका–१ का वडाध्यक्ष पेम्बा घलेले पुनर्निर्माणका सामग्री सहज रूपमा पुर्‍याउन सडक निर्माण गरिएको बताए ।

बजार पुग्न दुई दिन पैदल हिंड्नुपर्ने बाध्यता हट्यो
रुवीभ्यालीका बासिन्दालाई सडकमार्ग नहुँदा दैनिक उपभोग्य वस्तु किनमेल गर्न २ दिनसम्म पैदल हिंडेर दार्खाको डुन्डुरे पुग्नुपर्ने बाध्यता छ । गाडी पुगेपछि त्यहाँका बासिन्दालाई किनमेलका लागि निकै सहज हुने पेम्बाले बताए ।

ग्रामीण सडक सुदृढीकरण कार्यक्रम (एसएनआरटीपी) को सहयोगमा जिल्ला प्राविधिक कार्यालयमार्फत सदरमुकाम धादिङबेंसीदेखि ३० किलोमिटर टाढा किन्ताङफेदीसम्मको सडक स्तरोन्नतिको कामभइरहेको छ ।

सदरमुकामबाट कम्तीमा ३ दिनको पैदल दूरी लाग्ने तिब्बतसँग जोडिएका विकट तामाङ बस्तीलाई सदरमुकामसम्म जोड्ने सडक निर्माण योजना सञ्चालन भएको अढाई दशक बितेको छ ।

दुवैतर्फको सडक योजना सम्पन्न भएपश्चात् स्थानीलाई पनि दैनिक जीवनयापनमा सहज हुने देखिएको छ । सेर्तुङको हिन्दुङ गाउँका तेक्चा तामाङले भने, ‘धेरै बाली उब्जनी नहुने गाउँमा बजारबाट खाद्यान्न बोकेरै खानुपर्छ । भारी बोकेर अनि खच्चडबाट बोकाएर नुन, तेल र खाद्यान्न लैजाने गरिएको थियो, आफ्नै खच्चड नहुनेहरू २/३ दिन लगाएर दार्खाफेदीसम्म भारी बोक्न जाने बाध्यता अब हट्ने भएको छ ।’

प्रकाशित : माघ २१, २०७५ ०७:४३
ADVERTISEMENT
प्रतिक्रिया
पठाउनुहोस्
ADVERTISEMENT

सदरमुकामकाे विवाद चर्किएपछि रुकुमकोटमा कर्फ्यू 

हरि गौतम

रुकुम पूर्व — जिल्ला प्रशासन कार्यालयले रुकुमकोटमा कर्फ्यू जारी गरेको छ । स्थायी सदरमुकाम गोल्खाडा कायम गर्ने सरकारको निर्णय कार्यान्यनको मागसहित गोल्खाडा पक्षधरले रुकुमकोटमा र्‍याली तथा सभा गरी छाड्ने अडान लिएपछि प्रशासनले रुकुमकोटको ठूलो भूगोल समेटेर निषेधाज्ञा जारी गरेको हो । 

आइतबार बेलुकी ७ बजेटबाट सुरु भएको कर्फ्यू अनिश्चितकालका लागि भएको जनाइएको छ । प्रशासनले अनुरोध गर्दागर्दै विवाद नटुंगिएपछि घटनाक्रम बढ्न नदिन र शान्ति सुरक्षा कायम गर्न जिल्ला प्रशासन कार्यालयले स्थानीय प्रशासन ऐन २०२८ को दफा (६) को उपदफा (३) अनुसार अर्को आदेश नभएसम्मका लागि चार किल्ला तोकेर निषेधाज्ञा जारी गरेको प्रमुख जिल्ला अधिकारी मित्रलाल शर्माले बताए ।

उनका अनुसार पूर्वमा सिस्ने गाउँपालिका–५ धौलापैरा खोला, पश्चिममा सिस्ने गाउँपालिका–५, रानीकोट उत्तरमा सिस्ने गाउँपालिका–६, को रुकुमगाड हुँदै धाउनेको पाटीघट्टसम्म, दक्षिणमा सिस्ने–५, को रुमालबारा हुँदै सहिदपार्कसम्म कफ्र्यु आदेश जारी गरिएको छ ।

तोकिएको चार किल्लामा अर्को सूचना नआएसम्म कुनै किसिमको विरोध प्रदर्शन, सभा जुलुस र भेला गर्न गराउन निषेध गरिएको प्रजिअ शर्माले बताए । गोल्खाडा सदरमुकाम कायम हुनुपर्ने पक्षधरले भोली २२ गते रुकुमकोटमा शान्तिपूर्ण र्‍याली तथा सभा गर्ने तयारी गरिरहेको छ भने रुकुमकोट पक्षधरले कुनै पनि हालतमा कार्यक्रम हुन नदिने बताउँदै आएका छन् ।

जिल्लाको सदरमुकामको विषय सर्वोच्च अदालतमा विचाराधीन छ । २०७४ माघ ११ गतेको मन्त्रीपरिषद् बैठकले जिल्लाको स्थायी सदरमुकाम पुथाउत्तरगंगा गाउँपालिका–१२, गोल्खाडा कायम गर्ने निर्णय गरेको थियो । निर्णय लगत्तै अस्थायी सदरमुकाम रहेको सिस्ने गाउँपालिका ५ र ६ रुकुमकोट तथा त्यस आसपासका सर्वसाधारण आन्दोलनमा उत्रिएका थिए ।

सरकारको निर्णय खारेजको माग गर्दै २०७४ माघ १७ गते सर्वोच्चमा रिट दायर गरिएको थियो । दुवै पक्ष आ–आफ्नै अडानमा कायम छन् । गोल्खाडा पक्षधर रुकुमकोटमा कार्यक्रम गर्ने पक्षमा छन् भने रुकुमकोट पक्षधर कार्यक्रम गर्न नदिने भनेर आन्दोलनमा छन् ।

समस्या बढ्दै गएपछि जिल्लामा सुरक्षाकर्मी थपिएका छन् । समस्या समाधानका लागि शनिबार र आइतबार जिल्ला प्रशासन कार्यालयमा बसेको बैठक विना निष्कर्ष सकिएको थियो । दुवै पक्ष अडानबाट पछि नहटेपछि छलफलमा कुनै निस्कर्ष आउन सकेन ।

रुकुमकोट पक्षधर संघर्ष समितिका संयोजक नन्दलाल शर्माले रुकुमकोटमा कुनै पनि हालतमा बाहिरको कार्यक्रम गर्न नदिने बताए । गोल्खाडा पक्षधर सरोकार समितिका संयोजक केशरमान रोकाले सरकारी अड्डा रहेकै ठाउँमा र्‍याली गर्ने र शान्तिपूर्ण र्‍याली, सभा तथा विरोध गर्न पाउने अधिकार जनताको नैसर्गिक अधिकार भएको बताए ।

प्रकाशित : माघ २१, २०७५ ०७:४०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT