१४.१२°C काठमाडौं
काठमाडौंमा वायुको गुणस्तर: १११

'सहिदहरुको बलिदानले नेपालमा संघीय लोकतान्त्रिक गणतन्त्र स्थापना भएको हो'

प्रताप विष्ट

हेटौंडा — मुख्यमन्त्री डोरमणि पौडेलले सहिदहरुको बलिदान र उत्सर्गले मुलुकमा संघीय लोकतान्त्रिक गणतन्त्र स्थापना भएको बताएका छन् ।

'सहिदहरुको बलिदानले नेपालमा संघीय लोकतान्त्रिक गणतन्त्र स्थापना भएको हो'

‘संघीय लोकतान्त्रिक गणतन्त्रलाई नागरिकले आफ्नो जीवनमा अनुसरण गर्नुपर्ने जिम्मेवारी हाम्रो काँधमा आएको छ,’ उनले भने । सहिद दिवसको अवसरमा हेटौंडा उपमहानगरपालिका—११ नवलपुरस्थित सहिद स्मारकमा बुधबार आयोजित कार्यक्रममा बोल्दै मुख्यमन्त्री पौडेलले सहिदहरुको सपना पुरा गर्न सबैले इमान्दारी पूर्वक काम गर्नुपर्ने बताए ।

‘हाम्रा आचरण र चिन्तनहरु अझै पुरातन र पम्परागत शैलीका छन्,’ मुख्यमन्त्री पौडेलले भने, ‘सहिदहरुको सपना पुरा गर्न हाम्रा आचरण र शैलीहरु परिवर्तन गर्नुपर्छ ।’

प्रदेश—३ सरकारले आयोजना गरेको शहिद दिवस कार्यक्रममा शहिद स्मारक हेटौडाका अध्यक्षसमेत रहेका मुख्यमन्त्री पौडेलले सहिद स्मारकले विगत २४ वर्षदेखि सहिद दिवस मनाउँदै आएको बताए । स्मारकमा परिवर्तनका निम्ति विभिन्न कालखण्डमा बलिदान दिने १२ जना सहिदहरुको मूर्ति एउटै ढुंगामा कुदिएको छ । विक्रम संवत १९९७ सालदेखि ०६२/०६३ सालसम्म विभिन्न राजनीतिक आन्दोलनमा जीवन उत्सर्ग गर्नेहरुको स्मृति स्मारकमा सहिद स्तम्भ निर्माण गरिएको मुख्यमन्त्री पौडेलले बताए ।

सहिद स्मारक मुलुकको परिवर्तनमा जीवन गुमाउने सहिदहरुको तिर्थस्थल भएको उनले दाबी गरे । प्रदेश—३ का आन्तरिक मामिला तथा कानुनमन्त्री सालिकराम जमरकट्टेलले सहिदहरुको बलिदानबाट राणा शासन, निरकुश पंचायत, तानाशाही राजतन्त्र फालेर मुलुकमा संघीय लोकतान्त्रिक गणतान्त्र स्थापना गर्न सफल भएको बताए । ‘सहिदहरुले देखाएको बाटोमा इमान्दारपूर्वक अघि बढ्न सकेमा मुलुक समृद्ध र नागरिक सुखी बन्नेछन्,’ उनले भने ।

कार्यक्रममा जिल्ला समन्वय समितिका प्रमुख रघुनाथ खुलाल, स्मारक विकास समितिका सदस्य एवं पूर्व जिविस सभापति रामेश्वर रानालगायतले बोलेका थिए । कार्यक्रम सुरु हुनु भन्दाअघि हेटौंडा—११ नवलपुरस्थित सहिद गेटबाट स्मारकसम्म प्रभातफेरी गरिएको थियो । कार्यक्रममा प्रदेश—३ मन्त्रीहरु, प्रदेश सभाका सदस्य, प्रदेशका मुख्य सचिवलगायत उच्चपदस्थ कर्मचारीहरु, स्थानीय तहका जनप्रतिनिधीहरु र स्थानीयवासीको उल्लेख्य सहभागी थियो ।

प्रदेश—३ सरकारले सहिद दिवसको अवसरमा बुधबार प्रदेश—३ मा सार्वजनिक बिदा दिएको छ ।

प्रकाशित : माघ १६, २०७५ १२:४३
प्रतिक्रिया
पठाउनुहोस्
जनताको राय

एक वर्षमै कांग्रेससँगको गठबन्धन भत्कियो, नयाँ गठबन्धन कति दिगो रहला ?