साततले दरबारको पुनर्निर्माण हुँदै

कान्तिपुर संवाददाता

नुवाकोट — पुरातात्त्विक सम्पदा साततले दरबारको मार्चदेखि पुनर्निर्माण थालिने भएको छ । चीन सरकारको सहयोगमा निर्माण हुन लागेको साततलेसहित आधा दर्जन पुरातात्त्विक सम्पदा छन् । 

ती सम्पदाहरूको पुनर्निर्माण फागुन तेस्रो साताबाट सुरु हुने राष्ट्रिय पुनर्निर्माण प्राधिकरणका सीईओ सुशील ज्ञवाली बताए । ‘फेब्रुअरीमा चिनियाँ नयाँ वर्ष पर्छ,’ उनले भने, ‘मार्चपछि पुनर्निर्माण सुरु हुन्छ ।’

पुनर्निर्माण प्राधिकरणको दुई वर्षको अवधिभित्रमा नुवाकोटका सबै पुरातात्त्विक सम्पदाहरूको पुरानै स्वरूपमा निर्माण भइसक्ने सीईओ ज्ञवालीले बताए । ‘प्राधिकरणको दुई वर्ष छ,’ उनले भने, ‘त्यस अवधिमा सबै बनिसक्छन् ।’

चीनले साततल्लेको विस्तृत सर्भे डिजाइन डीपीआर अन्तिम चरणमा पुगेको प्राधिकरणले जनाएको छ । यसअघि चीन सरकारले साउन, त्यसपछि भदौमा चिनियाँ प्राविधिक टोलीले द्रोण उडाएर प्राविधिक काम सकेको थियो । त्यसपछि चिनियाँ राजदूत यु होङको टोलीले दरबारको अवलोकन गरे । त्यति बेला कात्तिक–मंसिरसम्ममा काम थालनी गर्ने भनिए पनि कामको सुरुवात भएन ।

चीन सरकारले पुनर्निर्माण गर्ने सम्पदाहरूमा साततले दरबारलगायत लामपाटी, सेतो पाटी, विष्णु मन्दिर, नारायण मन्दिर, गारद घर, रंगमहल, तुलजा भवानी मन्दिर छन् । गुरुयोजना बनाएर पुनर्निर्माणको काम थालिने पुनर्निर्माण प्राधिकरणले जनाएको छ ।

‘पुनर्निर्माणको काम र गुरुयोजनाको योजनासँगसँगै गरिनेछ,’ सीईओ ज्ञवालीले भने । गुरुयोजना बनाउँदैमा पुनर्निर्माणको काममा असर नपर्ने उनले बताए । पुनर्निर्माणको प्राथमिकता साततल्ले दरबार परेको छ । ‘पहिलो प्राथमिकता दरबार हो,’ सीईओ ज्ञवालीलले भने, ‘त्यसपछि एकैसाथ मन्दिर र अन्य बनाउँदै जान्छौँ ।’ पुरातात्त्विक महत्त्व बोकेको जिल्लाको ठूलो शक्तिपीठ नुवाकोट भैरवी मन्दिरमा भइरहेको ढिलाइप्रति उनले चासो लिए ।

प्रकाशित : पुस ३, २०७५ ०७:४०
प्रतिक्रिया
पठाउनुहोस्

राष्ट्रपतिका लागि हेलिप्याड बनाउन पत्राचार

कान्तिपुर संवाददाता

काठमाडौँ — सहरी विकास मन्त्रालयले महाराजगन्जस्थित प्रहरी प्रशिक्षण प्रतिष्ठानमा राष्ट्रपतिका लागि हेलिप्याड बनाउने प्रक्रिया सुरु गरेको छ । हेलिप्याड बनाउन आवश्यक सहयोग एवं समन्वयको आग्रह गर्दै प्रतिष्ठानलाई पत्र लेखेको छ ।

राष्ट्रपति निवास र प्रहरी प्रशिक्षण प्रतिष्ठान । तस्बिर : कविन अधिकारी/कान्तिपुर 

पहिलो चरणमा विस्तारित क्षेत्रको टोपोग्राफिक सर्भे गर्ने, त्यहाँ रहेका संरचनाको विवरण तयार तथा हेलिप्याड बनाउने स्थल पहिचान गरी डिजाइन गर्ने काममा सघाउन आग्रह गरेको हो । राष्ट्रपतिको कार्यालय र गृह मन्त्रालयलाई बोधार्थ दिइएको पत्रमा भनिएको छ, ‘परामर्शदाता कम्पनीलाई तोकिएका कार्य गर्न आवश्यक समन्वय एवं सहयोग गरिदिनू ।’

भदौ २१ को मन्त्रिपरिषद् बैठकले प्रतिष्ठानलाई काभ्रेको बनेपामा सारेर राष्ट्रपति निवास र कार्यालय विस्तार गर्ने निर्णय लिएको थियो । सरकारले प्रतिष्ठानको जग्गामा नयाँ संरचना नबनाउन निर्देशन दिइसकेको छ ।

राष्ट्रपति कार्यालय तथा निवास क्षेत्र विस्तार गरी हेलिप्याड, नेपाल भ्रमणमा आउने विदेशी राष्ट्राध्यक्षका लागि राजकीय अतिथि गृह, स्टेट ब्यांकेट, विदेशी राष्ट्राध्यक्षलाई राष्ट्रपतिले स्वागत र बिदाइ गर्ने भवन, गारथ ग्रहणस्थल र राष्ट्रपतिको सुरक्षार्थ खटिने सेनाको ब्यारेकलगायत संरचना निर्माण गर्न सरकारले तयारी थालेको हो । मन्त्रालयले नयाँ बानेश्वरको कम्पास इन्जिनियरिङ कन्सल्टलाई निर्माण कार्यको परामर्शदाता तोकिसकेको छ ।

जेठ ९ गते सरकारले प्रधानमन्त्री तथा मन्त्रिपरिषद् कार्यालयका सचिव केदारबहादुर अधिकारीको नेतृत्वमा चार सदस्यीय कार्यदल गठन गरेर राष्ट्रपति कार्यालय सार्ने वा विस्तार गर्ने विषयमा अध्ययन गराएको थियो । सोही समितिको सिफारिसका आधारमा प्रहरी एकेडेमी सारेर राष्ट्रपति कार्यालय विस्तार गर्ने काम सुरु गरिएको हो ।

काभ्रेको पनौतीमा भारतले बनाइदिने भनिएको प्रतिष्ठान निर्माण तीन वर्षसम्म सुरु भएको छैन । ‘यता राष्ट्रपति कार्यालय विस्तार गर्न सर्वेक्षणको काम सुरु हुन लागिसक्यो, सरेर हामी जाने ठाउँको भने टुंगो छैन,’ प्रतिष्ठानका एक उच्च अधिकारीले भने ।

प्रकाशित : पुस ३, २०७५ ०७:३४
पूरा पढ्नुहोस्
प्रतिक्रिया
पठाउनुहोस्