घडेरी नहुँदा अनुदान मिलेन

कान्तिपुर संवाददाता

रसुवा — २०७२ वैशाख १२ गतेको भूकम्पले कालिका गाउँपालिका ५ जिवजिवेका रामहरि नेपालीको घर लड्यो । भूकम्पपीडित लाभग्राही सूचीमा उनको नाम पनि निस्कियो । उनीसँग भूकम्पपीडित परिचयपत्र पनि छ । तर उनले अहिलेसम्म पहिलो किस्ताबापत्को ५० हजार पाउन सकेका छैन्न । 

रामहरि नेपाली भूमिहीन हुन् । आफ्नो नाममा कतै पनि जग्गा जमिन छैन । सरकारले घर निर्माण गर्न दिन तीन लाख रुपैयाँ भूमिहीन भएकै कारण आफूले पाउन नसकेको उनले गुनासो गरे ।

भूमिहीनलाई सरकारले घडेरी किन्न दुई लाख दिने सुनेपछि उनले वडाको मुचुल्का र गाउँपालिकाको सिफारिस बनाए । सिफारिससहित उनले जिल्ला आयोजना कार्यान्वयन इकाई अनुदान व्यवस्थापन तथा स्थानीय पूर्वाधार कार्यालयमा निवेदन दिएको लामो समय भयो तर अहिलेसम्म रकमपाउने अत्तोपत्तो छैन ।

रामहरिजस्तै लले दमाईंको अवस्था पनि उस्तै छ । घर बनाउन भूकम्पपीडितको नाममा लालपुर्जा हुनुपर्छ । ‘भूकम्पपीडित लाभग्राही सूचीमा आफ्नो नाममा छ तर घडेरी छैन, कता गएर घर बनाउने ?’ दमाईले दु:खेसो पोखे ।

भूकम्पपीडित लाभग्राही सूचीमा नाम भएका तर जग्गा जमिन नभएर घर बनाउन नपाएका भूकम्पपीडित जिल्लामा धेरै छन् । भूमि अधिकार मञ्चमार्फत अहिलेसम्म १७ भूमिहीन भूकम्पपीडितले घडेरी किन्नका लागि जिल्ला आयोजना कार्यान्वयन इकाई अनुदान व्यवस्थापन तथा स्थानीय पूर्वाधार कार्यालयमा निवेदन दिएका छन् ।

रसुवामा १२ हजार ४ सय ९२ जना लाभग्राही छन् । ११ हजार ५ सय ६१ जना लाभग्राहीले पहिलो किस्ताबापत् ५० हजार बुझिसकेका छन् । दोस्रो किस्ता बुझ्नेको संख्या १० हजार २ सय ९५ छ । अझै ९ सय ३१ जना लाभग्राहीसँग सम्झौता हुन सकेको छैन् ।

पहिलो किस्ताबापत्को ५० हजार बुझेका १ हजार २ सय ६६ लाभग्राहीले घर बनाउन सुरु गरेका छैनन् । भूकम्प गएको ४३ महिनामा ८ हजार ७ सय ८४ जना लाभग्राहीले तेस्रो किस्ता बुझिसकेका छन् ।

पहिलो किस्ता बुझेका तर घर निर्माण गर्न नचाहने लाभग्राहीलाई कार्यालयले रकम फिर्ता गर्न अनुरोध गरेको छ ।

राष्ट्रिय पुनर्निर्माण प्राधिकरणले रसुवा जिल्लाको जोखिमयुक्त बस्तीमा परेका १ हजार ७ जना परिवारको नाम लाभग्राही सूचीमा प्रकाशन गरेको छ । त्यसमध्ये अहिलेसम्म ३ सय ६४ परिवारले २ लाख बुझेर पुर्नबास प्रक्रिया पूरा गरेको जिल्ला आयोजना कार्यान्वयन इकाई अनुदान व्यवस्थापन तथा स्थानीय पूर्वाधार कार्यालयका प्रमुख कृष्णकान्त उपाध्यायले बताए ।

प्रकाशित : पुस १, २०७५ ०९:०२
प्रतिक्रिया
पठाउनुहोस्

मन्त्रीलाई माग नै माग

नगेन्द्र अधिकारी

काभ्रे — चौरीदेउरालीस्थित स्वर्णिम सरस्वती युवा क्लबको कार्यक्रममा पुगेका सूचना तथा सञ्चार प्रविधि मन्त्री गोकुलप्रसाद बाँस्कोटालाई स्थानीय सरस्वती माविले ज्ञापनपत्र बुझायो ।

ज्ञापनपत्रमा कक्षाकोठा भवन अपुग भएकाले १० कोठे भवन निर्माणमा सहयोग, विद्यार्थी र शिक्षकका लागि आवासको व्यवस्था, प्राविधिक शिक्षाको कक्षा सञ्चालनका लागि प्रयोगशालाको माग रहेका छन् । विद्यालयले एक सय वटा कम्प्युटर, हाइस्पिड इन्टरनेट र मन्त्रालयमार्फत प्रविधि तालिमको पनि माग गरेको छ ।

कार्यक्रममा आयोजकदेखि जनप्रतिनिधिसम्मले मन्त्री बाँस्कोटासँग विभिन्न मागहरू राखे । आयोजक क्लबका अध्यक्ष दीपक गौतमले बाटो दुरावस्था चित्रण गर्दै पिच गरिदिन अनुरोध गरे । ‘मन्त्रीहरू आउने भनेर २ दिनअघि मर्मत गरेको बाटोको अवस्था यहाँ आउने मन्त्री लगायतका अतिथिले देखिहाल्नुभयो होला,’ उनले भने, ‘गाउँपालिकाको कमान्डरलाई साक्षी राखेरभनेको छु, यहाँको बाटोका लागि संघीय सरकारले केही गरोस् ।’ ४ नं वडा अध्यक्ष सुरेश लामाले पनि बाटोको नै समस्या राख्दै समाधान गरिदिन मन्त्रीलाई अनुरोध गरे ।

चौरीदेउराली गाउँपालिका अध्यक्ष दीनानाथ गौतमले आफ्नो पालिकाका सबै स्थानमा मोबाइल नेटवर्क नदिने भन्दै समस्या समधान गरिदिन अनुरोध गरे । ‘गाउँपालिकाका सबै होचोअग्लो स्थानमा मोबाइल टिप्दैन,’ उनले भने, ‘टावर थपेर सहज गराइदिन र विद्यालयहरूमा ई–क्लासको व्यवस्था गरिदिन अनुरोध गर्दछु ।’

सबै वक्ताले केही न केही अपेक्षा गरेपछि काभ्रे क्षेत्र नं २ का सांसदसमेत रहेका मन्त्री बाँस्कोटाले आफ्नो मन्तव्यमा तिनलाई सम्बोधन गरे ।

‘१ वर्षभित्रमा भवन बन्नेछ, २४ वटा कम्प्युटर यो विद्यालयले पाउँछ,’ मन्त्रीले आश्वासन दिए, ‘अरू स्थानमा पनि इन्टरनेट विस्तार गर्दा यो विद्यालयमा पनि पाउँछ ।’ उनले बाटोका लागि बजेट छुट्टिएको भन्दै क्रमश: विकास हुँदै जाने बताए । ‘काभ्रेका धेरै योजनामा बजेट छुट्टिएर आएका छन्,’ मन्त्री बाँस्कोटाले भने, ‘विकास एकैपटक फ्याट्ट हुने कुरा पनि हैन, यो विस्तारै हुने कुरा हो ।’

प्रतिनिधिसभा सदस्य गंगाबहादुर तामाङ र प्रदेशसभा सदस्य रत्न ढकालले पनि बाटो, खानेपानी लगायका योजनामा संघ र प्रदेशबाट बजेट छुट्टिएको भन्दै क्रमश: विकास हुने दाबी गरे ।

प्रकाशित : पुस १, २०७५ ०९:०१
पूरा पढ्नुहोस्
प्रतिक्रिया
पठाउनुहोस्